1. Mataio 7:13, 14 heḡereḡerena, dahaka dainai baita gwa diba, ita na laolao ta lalonai?

ITA iboudai na laolao ta lalonai. Bona ta ḡaukara goadamu Iehova ta hesiai heniamu, unu amo tanobada matamatana lalonai baita noho diba. Dina ta ta ai, ta hekwarahimu mauri e lao heniamu dalanai baita raka totona. To Iesu eto, una dala na rotona eiava maraḡi, bona nega haida ibadinana na auka. (Mataio 7:13, 14 ba duahi.) Ita na dia ḡoevadae taudia dainai, una dala irakatanina na haraga.​—Gal. 6:1.

2. Ina atikol ai dahaka baita herevalaimu? (Maua ladana “ Manau Karana ese Baine Duruda Eda Dala Baita Hamaoromaoro” danu ba itaia.)

² Bema ita na ta uramu mauri e lao heniamu dala maraḡina baita badinaia, namona na mai eda ura ida eda lalohadai bona kara baita haidau. Aposetolo Paulo ese Korinto ai e nohova Kristen taudia e hagoadadia, eto “lalomui ba hamaomaorodia.” (2 Kor. 13:11, NWT) Ita edai danu una sisiba herevana na mai anina bada. Ina atikol ai Baibul ese be durudamu ḡau haida baita haidau, bona tura namodia ese bae duruda mauri dalanai baita raka daladia baita herevalaimu. Danu, baita itaiamu Iehova ena orea ese hahekau herevadia e henimu neganai, dahaka dainai nega haida ibadinadia na auka. Manau karana ese be durudamu eda lalohadai baita haidau, bona mai moaleda ida Iehova baita hesiai henia hanaihanai daladia baita herevalaimu.

3. Edena dalai Dirava ena Hereva ese oi baine durumu?

³ Ita na dia heḡereḡere siboda eda lalohadai bona hemami baita tahu namonamo totona. Dahaka dainai? Badina ita kudouda eiava laloda ese baine koida diba, bona nega haida abi hidi maorodia baita kara na auka. (Ier. 17:9) Una dainai hereva koikoidia amo siboda baita hekoi diba. (Iak. 1:22) So  namona na Dirava ena Hereva amo siboda baita heseke, unu amo “eda lalo-hadai bona eda ura” baita dibadia namonamo. (Heb. 4:12, 13) X-ray misinina ese ta tauanina lalona e sekeamu heḡereḡerena, Dirava ena Hereva ese e durudamu asita itamu ḡaudia baita dibadia namonamo. To, Baibul eiava hahekau taudia amo sisiba ta abimu neganai, namona na baita manau bona baita badina.

4. Ede ta diba tomamu King Saulo na hekokoroku tauna ai ela?

⁴ King Saulo bamona, bema basita manaumu, ia enai e vara ḡaudia danu ita edai baine vara diba. Saulo na e hekokoroku dainai, se ura ena lalohadai bona kara baine haidau. (Sal. 36:1, 2; Hab. 2:4) Heḡereḡere, Iehova ese Saulo na e hamaoroa Amaleka taudia baine halusidia murinai, ia be dahaka baine kara, to Saulo ese Iehova na se kamonai henia. Bena peroveta tauna Samuel ese e vara ḡauna e herevalaia neganai, Saulo na se ura ena kerere baine gwaurai hedinarai. To, e gwauva una na dia ḡau badana bona gwau na ma haida e henidiava. (1 Sam. 15:13-24) Saulo na ḡuna kara unu bamona danu e hahedinaraia. (1 Sam. 13:10-14) Ia na kudouna ai e hekokoroku. Iena lalohadai na se haidau, una dainai Iehova ese e gwau henia, bona e dadaraia.

5.Saulo ena haheitalai amo dahaka ta dibamu?

⁵ Ita na asita uramu Saulo ena haheitalai baita tohotohoa, una dainai siboda baita henanadai: ‘Dirava ena Hereva amo sisiba herevadia na duahimu neganai, egu lalohadai baina haidaua diba, a? Lau na karaiamu ḡauna be dia kara dika badana, a? Lau na karamu ḡaudia daidiai, gwau be ma haida na henidiamu, a?’ Bema unu henanadai ai eda haere na oibe, eda lalohadai bona kara baita haidau na namo. Bema lasi, baita hekokorokumu bena Iehova ese be dadaraidamu.​—Iak. 4:6.

6. King Saulo bona King David edia idau a herevalaia.

⁶ Mani King Saulo bona ia gabuna e abia tauna, King David edia idau aita itaia. David na “Iehova ena taravatu” e lalokau heniava tauna. (Sal. 1:1-3) David na mai dibana Iehova ese manau taudia e hamauridiamu, to hekokoroku taudia na e dadaraidiamu. (2 Sam. 22:28) Una dainai David na Dirava ena taravatu heḡereḡerena ena lalohadai e haidaua. Ia eto: “Iehova na hanamoamu, ia ese e hahealo henigumu; hanuaboi lalonai lau lalogu ese e hadibagumu.”​—Sal. 16:7.

7. Bema baita manaumu dahaka baita kara dibamu?

⁷ Bema ta manaumu, ita na ta uramu Dirava ena Hereva ese eda lalohadai kereredia baine hamaoromaorodia, unu amo kara kererena ta basita karaia. Dirava ena Hereva na gado ta bamona, ita e hadibadamu: “Dalana binai, ia lalonai ba raka.” Bema idiba kahana eiava lauri kahana ta laomu, una gado ese be hadibadamu. (Isa. 30:21) Iehova baita kamonai heniamu neganai, dala idauidau ai namo baita davarimu. (Isa. 48:17) Heḡereḡere, ta ese eda kara be hamaoromaoroamu neganai, basita hemaraimu. Bona Iehova kahirakahira baita laomu, badina ta dibamu ia na tama lalokauna ta bamona ita be naridamu.​—Heb. 12:7.

8. Iakobo 1:22-25 heḡereḡerena, edena dalai Dirava ena Hereva na galasi ta heḡereḡerena baita ḡaukaralaia diba?

⁸ Dirava ena Hereva ita edai na hevarivari eiava galasi ta heḡereḡerena. (Iakobo 1:22-25 ba duahi.) Daba ta ta ai, ita na galasi ai ta heita gunamu, gabeai ruma ta rakataniamu. Unu amo ta hesekemu bona ḡau haida ta hamaoromaoromu. Una heḡereḡerena, dina ta ta ai, Baibul ta duahiamu neganai, una ese be durudamu eda lalohadai bona kara baita haidau totona. Momo na dabai ruma do asie rakatania lalonai dina sirina e itaiamu. E duahimu ḡaudia ese edia  lalohadai e haidaumu. Bena dina ibounai lalonai, dala idauidau amo e uramu una sisiba herevana bae badinaia. Danu, namona na dina ta ta ai Dirava ena hereva baita stadilaia bona baita laloa dobu. Reana baita laloamu una ikarana na haraga, to mai anina bada ḡaudia ese be durudamu mauri e lao heniamu dala maraḡinai baita raka totona.

9. Dahaka dainai turamu namona ta ese e sisiba henimu?

⁹ Nega ta dala kererena o badinaia, bona una ese emu hetura karana Iehova ida e hadikaia, a? (Sal. 73:2, 3) Bema turamu namona ta ese e sisiba henimu, ena hereva o kamonai bona o badinaia, a? Bema oibe, oi na kara maorona o karaia, bona oi na o moale badina turamu ese e durumu.​—Her. 1:5.

10. Bema turamu ta ese e sisiba henimumu, dahaka ba kara be namo?

¹⁰ Dirava ena Hereva ese e hadibadamu: “Hetura ai e henimu berodia na mai heabidadamadia.” (Her. 27:6) Ina hereva anina be dahaka? Mani ina haheitalai a laloa: Oi na o uramu dala amo ba raka hanai, to motuka momo e lao maimu dainai oi na do o narimu, bona emu fon o itaiamu. Bena ba raka hanai lalonai, turamu ta ese imamu ai e abi bena e verimu lou. Imamu e gigia dainai, imamu na mai berona, to ia ese haraga herea e durumu dainai askiden na so davari. Ena be imamu e haberoa bona dina haida lalonai e hisihisi, to oi be turamu bo badu heniamu, a? Lasi! Oi na ena heduru dainai bo moalemu. Una heḡereḡerena, bema emu hereva bona kara na dia Dirava ena kara maoromaoro taravatudia heḡereḡerena dainai, turamu ese e sisiba henimu, reana bo lalohisihisimu. To iena sisiba herevana dainai basio badu. Una na kavakava karana. (Koh. 7:9) To, ba moale badina turamu na mai momokanina ida oi e hereva henimu.

11. Edena kara dainai ta na turana namona ena sisiba baine dadaraia diba?

¹¹ Edena kara dainai ta na turana namona ena sisiba baine dadaraia diba? Hekokoroku karana. Hekokoroku taudia na e uramu “taiadia do bae hemaihemai.” Bona “taiadia ese hereva momokani enai bae kudima.” (2 Tim. 4:3, 4) Idia na se uramu sisiba bae abi, badina e laloamu idia na mai aonegadia eiava ma haida e hereadia. To aposetolo Paulo na e gwa: “Badina be ta sibona baineto, ‘Lau na namo,’ a ḡau be dia namo, sibona e hekoimu.” (Gal. 6:3) King Solomon ese ina kara na herevalaia namo herea, eto: “Eregabe tauna mai aonegana, ena be ia na e vara ogoḡami tauna mo basileia lalonai bena dibura rumana lalona amo e raka lasi pavapava ai ela, to ia ese pavapava burukana mai ena kavakava, aonega taudia edia hahealo iabi-daena vada e rakatania tauna, na e hereaiamu.”​—Koh. 4:13.

12. Galatia 2:11-14 heḡereḡerena, aposetolo Petro ena haheitalai amo dahaka ta dibamu?

¹² Aposetolo Petro a laloa, ia na Paulo ese taunimanima vairadiai e sisiba henia neganai, ia e karaia karana mani a laloa. (Galatia 2:11-14 ba duahi.) Petro na Paulo ena hereva dalana bona haida vairadiai e gwau henia dainai, reana bema badu. To Petro na aonega karana e hahedinaraia. Ia ese una sisiba e abia dae bona Paulo na se badu henia. Gabeai, Petro ese Paulo na e gwauraia tadikaka lalokauna.​—2 Pet. 3:15.

13. Ta do asita sisiba henia lalonai, dahaka baita lalo na namo?

¹³ Bema oi na o uramu turamu ta ba sisiba henia, dahaka point ba lalodiatao na namo? Turamu do so hereva henia lalonai, sibomu ba henanadai: ‘Lau be na “kara maoromaoro” hereamu, a?’ (Koh. 7:16) E kara maoromaoro hereamu tauna na dia Iehova ena taravatu heḡereḡerena ai ma haida e hahemaoro henidiamu, to sibona ena diba ai  e karaiamu bona se hebogahisimu. Bema turamu o uramu ba sisiba henia badidia na o lalohadailaidia namonamo bona doini o uramu una ba karaia, ia enai una hekwakwanai ba herevalaia, bona henanadai ba ḡaukaralai unu amo baine laloparara ia be dahaka kerere e kara. Namona na ba gwaurai herevadia na Baibul amo, bona ba helalotao turamu na basio hahemaoro henia, to ba durua baine laloparara Iehova ese iena kara be ede e laloa tomamu. (Roma 14:10) Dirava ena Hereva ba ḡaukaralaia, bona ta o sisiba heniamu neganai, Iesu ena hebogahisi karana ba tohotohoa. (Her. 3:5; Mat. 12:20) Dahaka dainai? Badina ma haida ta kara henidiamu heḡereḡerena, Iehova ese danu ita na unu be kara henida tomamu.​—Iak. 2:13.

14. Iehova ena orea ese ita be dahaka e henidamu?

¹⁴ Iehova ese ita e hakaudamu mauri dalanai baita raka dalana ta na, ena tanobada oreana e ḡaukaralaiamu vidio idauidau, pablikeisin idauidau, bona hebou idauidau amo ita e durudamu Baibul ena sisiba baita badinaia totona. Unu ḡau iboudiai na Baibul amo e abi. Gavanin Bodi na haroro ḡaukara baita karaia namonamo abi hididia e karamu neganai, Dirava ena lauma helaḡa ena heduru e noiamu. To, Gavanin Bodi na e karamu abi hididia e haerodia loumu unu amo bae itaia ḡau haida ma bae haidau eiava lasi. Dahaka dainai? Badina “tanobada oromana” na e idaumu, bona Dirava ena orea danu dala matamata bae badina.​—1 Kor. 7:31.

15. Pablisa haida be dahaka hekwakwanai haida e davari?

¹⁵ Dirava ena orea ese Baibul ena hahediba hereva matamatana ta e herevalaiamu, eiava kara maoromaoro taravatudia e henidamu neganai, namona na baita abi dae bona baita badinadia. To, bema Dirava ena orea ese senisi ta e karaia bona una ese eda mauri e haidaua, ita be dahaka baita kara? Heḡereḡere vanega laḡanidia ai, tomadiho rumadia ihaginidia bona ihanamodia ḡaukarana na e bada herea. Una dainai Gavanin Bodi ese kongrigeisin momo e hadibadia Kingdom Hall tamona bae ḡaukaralaia diba. Una dainai, kongrigeisin haida na e hatamonadia, bona Kingdom Hall haida na e hoihoilaidia. Bona una moni amo gabu ma haida ai Kingdom Hall bae hagini diba. Bema oi o nohomu gabunai Kingdom Hall na e hoihoilaidia bona kongrigeisin e hatamonadia, reana emu ai na be aukamu una dala matamatana ba badinaia totona. Pablisa  haida na hebou baela totona gabu daudau amo e maimu. Haida na e hekwarahi Kingdom Hall ihaginina eiava ihanamona ḡaukarana e durua, to hari e laloamu dahaka dainai una Kingdom Hall na e hoihoilaia. Reana be laloamu edia nega bona goada na e haore kava. To una dala matamatana e badinaia dainai baita hanamodia na namo.

16. Kolose 3:23, 24 ena hereva heḡereḡerena, dahaka ese baine duruda eda moale baita habadaia?

¹⁶ Eda moale baita habadaia totona, namona na baita helalotao ita na Iehova dainai ta ḡaukaramu, bona ia ese ena orea e haheauamu. (Kolose 3:23, 24 ba duahi.) King David na haheitalai namona badina kontribiusen e heni dubu helaḡa bae haginia totona. Ia na eto: “Lau be daika, bona egu orea taudia be daidia, bena mai emai dala emai lalo-rua ai herahia baia heni? Badina be ḡau iboudiai na oiemu amo e maimu, bena oi sibomu emu ḡau ma vada a henimu lou.” (1 Sis. 29:14) Kontribiusen ta henimu neganai, una na Iehova ese ita e henida ḡaudia ta henia loumu. To eda nega, goada, bona moni ta ḡaukaralaimu iena ḡaukara ta karaiamu neganai, Iehova na e moale badamu.​—2 Kor. 9:7.

17. Ena be ḡau haida baita haidaudia, to dahaka dainai basita lalomanoka?

¹⁷ Mauri e lao heniamu dalanai baita raka totona, ita iboudai ese Iesu ena haheitalai baita badinaia na namo. (1 Pet. 2:21) Ena be ḡau haida baita haidaudia to basita lalomanoka. Unu sensi baita karamu neganai ta hahedinaraiamu, ita na Iehova ena hahekau dalana ta badinaiamu. Namona na baita helalotao, Iehova na dibana ita na dia ḡoevadae. Una dainai ita ese Iesu ena haheitalai na basita tohotohotoa ḡoevaḡoeva dibamu.

18. Ita iboudai be dahaka baita kara na namo?

¹⁸ Namona na ita iboudai ese vaira negana baita laloa, bona mai eda ura ida eda lalohadai bona kara baita haidaudia. (Her. 4:25; Luka 9:62) Namona na baita manau, baita moale hanaihanai bona laloda baita hamaoromaoro. (2 Kor. 13:11) Bema unu baita kara tomamu, “ura heni bona maino Diravana ese be [bamodamu].” Bona be durudamu baita moalemu hari, bona tanobada matamatana ai baita mauri hanaihanaimu.