1. Mataio 28:18-20 heḡereḡerena, Iesu be dahaka haheḡani e heni?

IESU na mase amo e toreisi lou murinai, ena hahediba taudia ida Galilea ai e hedavari. Ia na idia ediai mai anina bada herevana ta baine gwauraia. Una be dahaka? Mataio 28:18-20 (duahia) ai una hereva baita davariamu.

2. Ededia henanadai baita herevalaimu?

² Iesu ena haheḡani, taunimanima na hahediba taudia ai baita halaodia herevana, na hari Dirava ena hesiai taudia ese bae badinaia danu. Iesu ese e heni asainmen dainai, henanadai toi baita herevalaimu. (1) Hahediba tauna matamatana enai Dirava ena ura ta hahedibalaiamu neganai, dahaka baita kara na namo? (2) Edena dala ai kongrigeisin ena pablisa iboudiai ese Baibul stiuden bae durua baine goada totona? (3) Edena dala ai haroro ḡaukara e hadokoa tadikaka taihu baita durudia hahediba ḡaukarana bae karaia lou?

3. Iesu ena haheḡani lalonai dahaka mai anina bada herevana e gwauraia?

³ Iesu ena haheḡani na hedinarai ḡoevaḡoeva. Namona na ia ese ita e haḡanida ḡaudia na taunimanima baita hadibalaidia. To, ina baita laloa na mai anina bada. Iesu na se gwa: ‘Lau ese na henimui haheḡanidia iboudiai ba hadibalaidia.’ To, e gwa: Ba hadibadia “na henimui haheḡanidia iboudiai bae badina.” Iesu ena haheḡani baita badinaia totona, namona na Baibul stiuden baine kara ḡaudia, bona ikaradia dalana danu baita hadibaia. (Apos. 8:31) Dahaka dainai unu baita kara toma na namo?

4. Haheitalai ta amo ba hahedinaraia, edena dala ai Baibul stiuden ese Keriso ena haheḡani baine badinaia?

 ⁴ Edena dala ai ta baita hadibaia Keriso ena haheḡani baine badinaia? Ina haheitalai ese be durudamu bena baita lalopararamu, dahaka baita kara na namo. Edena dala ai driving instructor ese ena stiuden baine durua trafik taravatudia baine badina? Ginigunana, instructor ese stiuden enai motuka dalai e heaumu neganai bae badina taravatudia baine hadibaia. To, stiuden ese unu taravatu baine badina totona, instructor ese ḡau ma ta baine karaia na namo. Ia na stiuden e taritarimu lalonai sisiba baine heni, bona stiuden ese e dibadiamu ḡaudia na baine badina. Ina haheitalai amo dahaka ta dibamu?

5. (a) Ioane 14:15 bona 1 Ioane 2:3 heḡereḡerena, eda Baibul stiuden baita hadibadia dahaka bae kara be namo? (b) Eda stiuden baita durudia daladia haida mani a herevalai.

⁵ Haida ida Baibul ta stadilaiamu neganai, ita ese Dirava ena ura ta hadibalaidiamu. To, ḡau ma haida baita kara na namo. Namona na eda Baibul stiuden baita hadibadia e dibadiamu ḡaudia na edia mauri lalonai bae badina. (Ioane 14:15; 1 Ioane 2:3 ba duahidia.) Eda kara amo baita hahedinaraia eda stiuden ese Baibul ena hahekau herevadia na sikuli ai, ḡaukara gabudiai, eiava moale negadiai bae badina diba. Eda mauri ai e vara ḡauna ta baita herevalaia, bona baita hahedinaraia edena dala ai Baibul ena hahekau herevadia ese dika amo ita e gimada, eiava e duruda abi hidi maorodia ta kara. Eda stiuden ida ta ḡuriḡurimu neganai, Iehova baita noia ena lauma helaḡa amo baine hakaudia.​—Ioa. 16:13.

6. Ma haida ta hadibadiamu Iesu ena haheḡani bae badina totona, dahaka ma baita kara na namo?

⁶ Ma haida ta hadibadiamu Keriso ena haheḡani bae badina totona, dahaka ma baita kara na namo? Eda Baibul stiuden baita durudia hahediba taudia ihalaodia ḡaukarana bae ura henia. Stiuden haida na e garimu bae haroro totona. Una dainai Baibul ena hereva momokani ta hadibadiamu lalonai, baita haheauka na namo. Unu amo edia abidadama be goadamu, kudoudia be hamarereamu, bena be haroro dibamu. Dahaka baita kara diba unu amo stiuden baita durudia sivarai namona iharorolaina urana bae abia?

7. Edena dala ai stiuden baita durua unu amo ma haida ediai sivarai namona baine harorolaia?

⁷ Reana eda Baibul stiuden ediai ini henanadai baita heni diba: “Baibel ena hahediba herevadia o badinamu dainai, edena dala ai una ese emu mauri e haidaua? O laloamu ma haida ese danu ina sivarai bae kamonaia be namo, a? Dahaka ba kara diba idia ba durudia?” (Her. 3:27; Mat. 9:37, 38) Stiuden ba durua Hahediba Toolbox amo pepapepa haida baine abi hidi, unu amo varavarana, turana, eiava ḡaukara taudia baine henidia diba. Pepapepa haida emu stiuden ba henia. Ia ida ba praktis edena dala ai pepapepa baine hariharilaia. Oibe, stiuden na unbaptize publisher ai e laomu murinai, ia ida baita haroro unu amo baita durua.​—Koh. 4:9, 10; Luka 6:40.

8. Dahaka dainai eda stiuden ese Dirava bona dekena tauna baine lalokau henidia na mai anina bada? (Danu maua ladana “ Eda Baibul Stiuden Edia Lalokau Dirava Enai Bae Habadaia Daladia” ba itaia.)

⁸ Iesu na e gwa ma haida baita hadibadia ena haheḡani “iboudiai bae badina” totona. Una haheḡani lalonai haheḡani badadia rua na, Dirava ba lalokau henia bona dekemu tauna ba lalokau henia. (Mat. 22:37-39) Eda Baibul stiuden baita duruamu unu haheḡani be badinamu neganai, ta  duruamu baine haroro totona. Dahaka dainai? Bema ia ese Dirava bona ma haida e lalokau henidia badamu, una ese be hagoadaiamu baine haroro totona. Vaia, Baibul stiuden haida na reana be garimu bae haroro totona. To namona na baita hagoadadia, Iehova ena heduru amo taunimanima igari henidia karana bae hahanaia diba. (Sal. 18:1-3; Her. 29:25) Ina atikol ena maua ai dala haida e herevalai, ededia dala ai eda stiuden baita durua ena lalokau Dirava enai baine habadaia totona. To danu, edena dala ai kongrigeisin ese Baibul stiuden baine durua ena lalokau baine habadaia totona?

9. Taritari e diba matamamu stiuden ena haheitalai amo, edena dala ai stiuden na mai anina bada ḡaudia e dibamu?

⁹ Taritari e diba matamamu stiuden ena haheitalai ba laloa. Bema stiuden ese motuka e tariamu bona ena instructor na ia badinai helai, edena dala ai stiuden na diba e abimu? Iena instructor ena hereva e kamonaimu, bona ma draiva haida edia taritari dalana e itaiamu. Heḡereḡere, instructor ese stiuden e hadibaiamu draiva ta baine itaia, una draiva na e stopu unu amo motuka ma ta ia vairana amo baine hanai. Eiava instructor ese draiva ta e poiniamu badina ia na ena indicator e ḡaukaralaimu, bona stiuden e hadibaiamu ia danu unu baine kara toma. Unu haheitalai amo stiuden na mai anina bada ḡaudia e dibamu, bona e taritarimu neganai unu taravatu be badinamu.

10. Dahaka ese Baibul stiuden baine durua baine goada totona?

¹⁰ Una heḡereḡerena, Baibul stiuden ese Iehova e hesiai henia matamamu neganai, ia na dia ena teacher amo diba mo e abiamu, to Iehova ena hesiai taudia ma haida edia haheitalai amo diba e abimu danu. Una dainai, dahaka ese Baibul stiuden bae durudia bae goada totona? Kristen heboudia ilao henidia karana. Dahaka dainai? Hebou ai e kamonaimu herevadia ese idia be durudiamu ḡau momo bae diba, edia abiadadama bae hagoadaia, bona edia lalokau Dirava enai bae habadaia totona. (Apos. 15:30-32) Danu hebou gabunai, teacher ese ena stiuden na baine laohaia tadikaka bona taihu haida baine hedavari henidia. Idia danu guna stiuden ese e davarimu hekwakwanai haida e hahanaidia. Stiuden na tadikaka bona taihu edia haheitalai namona, bona kongrigeisin lalonai lalokau e hahedinaraiamu karana be itaiamu neganai, una ese be duruamu.

11. Kongrigeisin ai stiuden be ededia haheitalai be itamu, bona edena dala ai una ese ia baine durua diba?

¹¹ Mani ini haheitalai aita lalodia. Baibul stiuden hahinena ta na sibona natuna ida e nohomu, ia ese Kristen taihu ta e itaia, iena noho dalana danu ia heḡereḡerena. Una taihu na e ḡaukara goadamu natuna maraḡidia e laohaidiamu Kingdom Hall, bona una ese stiuden kudouna e hamarerea. Stiuden merona ta na e hekwarahimu siga ani karana baine hadokoa, bena kongrigeisin ai una hekwakwanai e hahanaia tadikakana ta e hedavari henia. Tadikaka ese stiuden e hamaoroa, ia na Iehova e lalokau henia badamu dainai una ese e durua Dirava ena haheḡani baine badina totona. (2 Kor. 7:1; Fili. 4:13) Tadikaka ena ekspiriens e kamonai murinai, stiuden e hamaoroa, “Oi danu siga ani karana ba hadokoa diba.” Una ese stiuden e hagoadaia bona e abia dae una kara baine hadokoa diba. Baibul e stadilaiamu kekenina ta na e itaiamu ia ida uru tamona taihu ta na Witnes ai ela bona ena mauri e moalelaiamu. Una dainai Baibul stiuden na e uramu baine diba dahaka dainai taihu na nega iboudiai e moalemu.

12. Dahaka dainai kongrigeisin ai ita ta ta ese Baibul stiuden baita durudia na namo?

 ¹² Bema Baibul stiuden na abidadama pablisa idauidau be dibadiamu, stiuden na edia haheitalai amo Keriso ena haheḡani, Dirava bona dekemu tauna ilalokau henina karana be dibaiamu. (Ioa. 13:35; 1 Tim. 4:12) Matamanai tame itaia bamona, Baibul stiuden na pablisa amo diba be abimu, idia na stiuden e davarimu hekwakwanai heḡereḡeredia e davari bona e hahanaidia. Stiuden ese unu haheitalai amo senisi haida e karamu unu amo Keriso ena hahediba ai bainela totona. (Deu. 30:11) Kongrigeisin ai ita ta ta ese dala idauidau ai Baibul stiuden bae durua baine goada totona. (Mat. 5:16) Baibul stiuden e maimu hebou neganai, ita be dahaka baita kara unu amo idia baita hagoadadia?

13-14. Aposetolo taudia e lalomanoka neganai Iesu be dahaka e kara?

¹³ Ita na ta uramu eda manoka tadikaka bona taihu baita durudia, haroro ḡaukara bona hahediba ḡaukarana bae karaia lou totona. Iesu ese lalomanoka aposetolo taudia e kara henidia dalana amo ta dibamu, ita danu unu baita kara toma.

¹⁴ Tanobada ai Iesu ena haroro ḡaukara dokonai, ia do se hamasea lalonai, aposetolo taudia “iboudiai ese ia e heautania.” (Mar. 14:50; Ioa. 16:32) Una negai, Iesu ena aposetolo taudia e lalomanoka neganai, ia be dahaka e kara? Iesu e toreisi lou murinai, ia murinai e rakava taudia e hamaorodia, eto: “Asio gari; vada aola, varavaragu ba hamaorodia, [lau na vada na toreisi lou].” (Mat. 28:10a) Iesu ese ena aposetolo taudia na se dadaraidia. Ena be idia ese ia e rakatania, to e gwauraidia “varavaragu.” Iehova heḡereḡerena, Iesu na e hebogahisi bona ma haida edia dika e gwautao.​—2 Han. 13:23.

15. Haroro ḡaukara e hadokoa taudia be ede ta lalodia tomamu?

¹⁵ Una heḡereḡerena, haroro ḡaukara e hadokoa taudia na ta lalodia badamu. Idia na eda tadikaka bona taihu, bona ta lalokau henidiamu! Ini tadikaka bona taihu ese Iehova dainai e kara ḡaudia na doini ta lalodiataomu. Hari, e manoka taudia haida na guna laḡani momo lalodiai Iehova e hesiai henia. (Heb. 6:10) Idia iboudiai na ta readiamu! (Luka 15:4-7) Iesu heḡereḡerena, ededia dala idauidau ai baita hahedinaraia idia na ta lalodia badamu?

16. E manoka tadikaka bona taihu be ede baita lalodia toma?

¹⁶ Ba boiridia hebou baema. Iesu ese e lalomanoka aposetolo taudia e hagoadadia dalana ta na, e boiridia hebou baela. (Mat. 28:10b; 1 Kor. 15:6) Una heḡereḡerena, bema e manoka taudia na asie heboumu, baita hagoadaia kongrigeisin heboudia baema diba. Ita na mai dibada nega momo baita boiridiamu murinai, hebou be maimu. Iesu na e moale badina ena hahediba taudia ese ena boiboi herevana na e abia dae.​—Mat. 28:16; Luka 15:6 ba itaia.

17. Manoka tauna ta na hebou e maimu neganai, ita be dahaka baita kara?

¹⁷ Mai moalemu ida ba welkam henidia. Iesu na ena hahediba taudia ida e hedavari neganai, mai moalena ida e welkam henidia, ia na se nari hahediba taudia na ia dekena baela, to ia ese idia e guna henidia bona e hereva henidia. (Mat. 28:18) Manoka tauna ta na Kingdom Hall e maimu neganai, ita be dahaka baita kara? Namona na dala baita tahu ia baita welkam henia. Matamanai, reana ia ihereva henina na baita daradaramu. To, ena hemami basita hadikaia totona, baita gwa diba: “Ai na a moalemu badina hebou ai ame itamu.”

18. Edena dala ai e manoka pablisa baita hagoadadia diba?

 ¹⁸ Ba hagoadadia. Iesu ena hahediba taudia na reana e laloava tanobada heḡeḡemadai ai haroro ḡaukara na basie karaia diba. To Iesu ese e hagoadadia eto: “Lau na daba daba iboudiai umui ida ta nohomu.” (Mat. 28:20) Una ese iena hahediba taudia e durudia, a? Oibe. Una murinai, idia ese ‘taunimanima e hadibadia, bona sivarai namona iharorolaina’ ḡaukarana ai e bisi bada. (Apos. 5:42) Manoka pablisa danu hahegoada bae abi na namo. Haroro ḡaukara bae hamatamaia lou totona, reana gari mamina be abiamu. Baita hagoadadia idia na sibodia basie haroromu. Idia e haḡaeḡaemu neganai, haroro ḡaukara ai baita bamodia diba. Eda heduru be abia daemu, bona sivarai namona iharorolaina ḡaukarana be karaia loumu. Bema manoka tadikaka bona taihu baita lalodia badamu, idia na be goada loumu, bona una ese kongrigeisin taudia iboudiai be hamoalediamu.

19. Iseda ura ḡauna badana be dahaka, bona dahaka dainai?

¹⁹ Haroro bona hahediba ḡaukarana be baita karaia ela bona edena nega? Ela bona ina tanobada dokona. (Mat. 28:20) Ita ese una haheḡani baita haḡuḡuruamu ela bona una nega be kaumu, a? Oibe, ita na ta uramu unu baita kara toma! Mai moaleda ida eda nega, goada, bona moni ta ḡaukaralaimu “mauri hanaihanai bae abia taudia” ta tahudiamu. (Apos. 13:48) Unu ta kara tomamu neganai, ita ese Iesu ena haheitalai ta tohotohoamu. Ia na eto: “Agu aniani binai: e siaigu Diravana ena ura baina karaia, iena ḡaukara baina haḡuḡurua.” (Ioa. 4:34; 17:4) Una na iseda ura ḡauna badana. Ita na ta uramu e henida ḡaukarana baita haḡuḡurua. (Ioa. 20:21) Bona ta uramu ma haida, manoka taudia danu, mai haheauka ida ina ḡaukara baita karaia hebou.​—Mat. 24:13.

20. Filipi 4:13 heḡereḡerena, edena dala ai Iesu ese e heni ḡaukarana baita haḡuḡurua diba?

²⁰ Vaia, Iesu ese e haḡanida ḡaukarana ikarana na auka. To, ina ḡaukara na dia ita siboda ese ta karaiamu. Iesu na e gwauhamata ia na ita ida. Ita ese hahediba ḡaukarana ta karaiamu badina ‘Dirava ida ta ḡaukara heboumu’ bona Keriso ese e bamodamu. (1 Kor. 3:9; 2 Kor. 2:17) Una dainai, ina ḡaukara na baita haḡuḡurua diba. Ina asaimen na hahenamo badana, bona ma haida baita durudia idia danu unu bae kara toma!​—Filipi 4:13 ba duahia.