‘[Dirava ese] tanobada ihadikana taudia be hadikadiamu.’​—Apokalupo 11:18.

● Nigeria ai, Mr Pirri na Kpor ena palm-wine e karamu kampani ai e ḡaukaramu. To, iena bisnes na e dika, badina be Niger Delta ai oela e hebubu karana ese gabu na e hadikaia. Ia na e gwa: “Una ese emai gwarume e hamasedia, kopimai e hadika, emai sinavai e hadika, bona emai mauri ai e durumu ḡaudia iboudiai danu e hadika.”

E VARAMU MOMOKANI ḠAUDIA ESE DAHAKA E HAHEDINARAIAMU? Mai edia diba bada taudia haida na e gwa, laḡani ta ta ai, taunimanima ese momoru iboudiai 6.5 milion ton na davara ai e negemu. Unu momoru 3.25 milion ton na plastic​—unu plastic na do asie ore neganai laḡani hanred momo lalodiai bae hure. Taunimanima ese tanobada na se hamiroamu mo, to golo, silva, bona tano ai e miamu ḡaudia na e haoredia haraḡamu. Hetahu ḡaukaradia haida ese e hahedinarai, laḡani ta ta ai, taunimanima ese tanobada amo e ḡaukaralaimu ḡaudia na, laḡani ta bona hua ima lalodiai bae vara lou diba. Australia ena niuspepa ta ladana Sydney Morning Herald na e gwa: “Bema taunimanima iboudiai ese tanobada ai e miamu ḡaudia bae haore hanaihanai, anina na laḡani 2035 ai Tanobada rua baita abi na namo.”

TAUNIMANIMA MOMO BE DAHAKA E GWAUMU? Taunimanima na mai aonegadia bona mai dibadia hekwakwanai be ede bae hahanaidia toma. Una dainai, tanobada ihadikana hekwakwanaidia na baita hahanaidia bona tanobada na baita naria diba.

EDIA HEREVA BE MAORO, A? Taunimanima ta ta bona orea idauidau bae ḡaukara hebou tanobada inarina herevadia bona daladia bae halasi totona. To, taunimanima ese e karamu ḡaudia idauidau ese hodahoda e hadikaiamu bona gorere e havaramu.

OI BE DAHAKA O LALOAMU? O laloamu Dirava be ena gwauhamata heḡereḡerena, ḡau ta baine karaia, ta noholaiamu tanobadana na taunimanima ese basie hadikaia totona, a?

Baibul na dia tame herevalai peroveta herevadia ima mo e gwaurai, to dina gabediai bae vara ḡau namodia danu e perovetalai. Mani peroveta herevana ihatauratoina ai e herevalaia haheitalaina ta aita itaia.

 [Blurb on page 8]

“Guna na hemamiva lau na paradaiso gabuna ta na biaguava, to hari ia na da poisin amo e honu momorudia inegedia gabuna.”​—ERIN TAMBER, UNITED STATES ENA GULF COAST AI E NOHOMU, LAḠANI 2010 AI, GULF OF MEXICO AI OELA BADA HEREA E HEBUBU MURINAI, UNA HEREVA E GWAURAIA.

[Box on page 8]

Dirava Ena Kerere, A?

Baibul ese hari ina negai ta itamu e varamu ḡau dikadia na da e gwaurai guna dainai, baita gwa una be Dirava ena kerere, a? Dirava ese ita e hahisidamu, a? Baibul Ena Hahediba Maorodia be Dahaka? bukana ena karoa 11 ai bo moalelaimu haeredia ba davari diba, una na Iehova ena Witnes ese e halasia.

[Picture Credit Line on page 8]

U.S. Coast Guard photo