Maraḡigu amo mauri ḡaudia na, na ura henidia badava. Nega momo emai ruma bese na a nohova taonina Jyväskylä, Central Finland ai, ena uda namodia bona gohu mai hairaidia ai a haloaloava. Lau ese animal danu na ura henidiamu. Maraḡigu ai, na urava baina itadia pusikadidia bona sisiadia iboudiai baina rosidia! Na badava neganai, taunimanima ese animal e hadikadiava karana na asina moalelaiava. Gabeai, animal edia maoro e herevalaiava oreana ta lalonai na vareai, unuseni ai lau heḡereḡeregu taudia ma haida na davaridia.

Ai ese gabu idauidau ai animal edia maoro a kempeinlaiva. Ai ese animal huidia e hoihoilaiva stoadia bona animal e testidiava rumadia edia kerere baia hahedinaraia totona, hahediba herevadia, bona protest karadia idauidau a heḡaeḡaelaiva. Ai ese danu animal igimadia oreana matamatana ta a haginia. Dala kereredia amo a urava animal baia durudia dainai, gavamani na asie moaleva. Nega haida pulisi ese e abiguva bona e ha kotaguva.

Dia animal mo na lalohekwarahilaidiava, to tanobada heḡeḡemadai ai e varava hekwakwanaidia ma haida danu na lalohekwarahilaiva. Gabeai, orea momo lalodiai na vareai, heḡereḡere, Amnesty International bona Greenpeace. Egu goada idoinai na unu orea edia ḡaukara idauidau ai na ḡaukaralaidia. Ogoḡami taudia, asi adia taudia, bona e dabuva taudia ese heduru bae abi totona dala na tahuva.

Gabeai na laloparara, lau ese tanobada na basina haidaua diba. Ena be unu orea ese hekwakwanai maraḡidia haida na e hamaoromaorodiava, to hekwakwanai badadia na dounu e bada e laova. Una na vaitani, tanobada idoinai na demoni dikadia edia siahu henunai bona ta ese una na se laloa badamu. Na mamiava egu goada na dia heḡereḡere.

Ḡau ta basina karaia diba dainai na lalohisihisiva neganai, Dirava bona Baibul na lalodia matama. Guna, Iehova ena Witnes ida Baibul a stadilaiava. Ena be Iehova ena Witnes edia hebogahisi bona lau e lalogu badava karana na na lalo badava, to una negana ai lau na do dia heḡereḡere egu mauri baina haidaua. To, hari lalogu na da na haidaua.

Egu Baibul na abia bena na duahia matama. Una na vaitani lau berogu ai muramura bema atoa na heto. Na itaia Baibul siridia momo ese e hadibadamu animal na baita karadia namonamo. Heḡereḡere: Hereva Lada-isidia 12:10 na e gwa, “taunimanima namodia ese edia animal na e naridiamu.” (Good News Translation) Bona na laloparara danu, tanobada ai e varamu hekwakwanaidia na dia Dirava ena kerere. To eda hekwakwanai na e bada herea badina taunimanima momo herea ese Dirava ena hahekau daladia na asie badinadiamu. Iehova ena lalokau bona ena haheauka na diba neganai, una ese kudougu na e hamarerea.—Salamo 103:​8-​14.

Una nega ai, Baibul Ena Hahediba Maorodia be Dahaka? bukana bavabia diba fom ta na davaria, na hahonua bena na siaia. Gabeai, Iehova ena Witnes tauna ta adavana ida na egu ruma ema, Baibul baina stadilaia dalana e herevalaia, bona na abia dae. Danu, Kingdom Hall ai Kristen heboudia da na laova. Una dainai, kudougu ai hereva momokani uhena na de tubuva.

Baibul ena hahediba dainai, egu mauri ai ḡau momo na haidau. Kuku ani karana bona inuinu kekero karana na hadokoa. Egu heḡoeva dalana bona hereva daladia na hanamodia. Bona egu kara gavamani ediai na haidau. (Roma 13:1) Bona lau ese matabodaḡa maurina, na manadalaia momokani maurina, na rakatania.

To lauegu ai e auka ḡauna na, tanobada heḡeḡemadai ai animal bona taunimanima edia maoro e gwauraiva oreadia baina lalodia maoromaoro. Egu lalohadai baina haidaua karana na dia haraḡa. Matamanai, na laloava unu orea baina rakatanidia na dia namo. To gabeai na abia dae, Dirava ena Basileia sibona ese eda tanobada ena hekwakwanai iboudiai baine haoredia. Lalogu na hadaia una Basileia iduruna ḡaukaradia bona ma haida baina durudia una Basileia bae dibaia karana ai egu goada baina haorea na namo.—Mataio 6:​33.

Guna na urava tanobada maurina baina haidaua dainai, taunimanima na orea rua ai na lalodiava—namodia eiava dikadia—bona lalogu na hadaia dikadia baina inai henidia. To na moalemu Baibul ese e durugu dainai, hari taunimanima ma haida na asi na inai henidiamu. To, na uramu taunimanima iboudiai baina lalokau henidia. (Mataio 5:​44) Una lalokau na dala idauidau ai na hahedinaraiamu, bona una dala ta na Dirava ena Basileia sivaraina na harorolaiamu. Na moalemu badina ina ḡaukara namona ese maino, moale, bona helaro korikorina na taunimanima e henidiamu.

Ḡau iboudiai na Iehova imana ai na ato kaumu dainai, lalogu na e mainomu. Iehova na ḡau iboudiai Ihavaradia Tauna dainai, na abia dae momokanimu ia ese taunimanima na basine rakatanidia animal bona taunimanima eiava eda tanobada hairaina bae hadikaia hanaihanai totona. Kahirakahira, Ia ese ena Basileia amo taunimanima ese e hadika ḡaudia iboudiai be hanamodia loumu. (Isaia 11:​1-9) Na moale dikadikamu badina ini hereva momokanidia na diba, bona ma haida na durudiamu ini hereva bae abidadama henidia totona. Hari na asina laloamu lau ese tanobada ena mauri baina haidaua.