Kifer Fason ki Bann Temwin Zeova Fer Repa Nou Segner Diferan Avek Fason ki Lezot Relizion Fer?

ZWE

Nou swiv dan enn fason strikt seki Labib dir lor fason ki nou fer “repa Lesegner” ki nou apel osi Memoryal lamor Zezi. (1 Korintien 11:20; NTKM) Enn lot kote, boukou bann krwayans ek bann pratik bann lezot relizion ki fer sa seremoni-la pa baze lor Labib.

Lobzektif sa fet-la

Lobzektif Repa Nou Segner se pou rapel Zezi, pou montre nou rekonesans pou sakrifis ki li’nn fer pou nou. (Matie 20:28; 1 Korintien 11:24) Sa fet-la, li pa enn pratik relizie ki ofer pardon pou nou bann pese. a Labib ansegne ki nou gagn pardon nou bann pese zis par lafwa dan Zezi me pa par enn seremoni relizie.—Romin 3:25; 1 Zan 2:1, 2.

Komie fwa bizin fer sa fet-la?

Zezi ti donn lord so bann disip pou komemor Repa Nou Segner, me li pa ti dir komie fwa bizin fer fet-la. (Lik 22:19) Ena panse ki bizin fer li toule mwa, ena lezot fer li toule semenn, toulezour, plizir fwa par zour ek otan ki enn dimounn anvi. b Me ena sertin pwin ki nou bizin pran an konsiderasion.

Zezi ti etabli Repa Nou Segner zour Pak Zwif ek li ti mor plitar sa zour-lamem. (Matie 26:1, 2) Ek li pa enn kwinsidans. Bann Lekritir konpar sakrifis Zezi kouma sakrifis agno ki ti fer pou Pak. (1 Korintien 5:7, 8) Pak ti pe fer enn fwa par an. (Exod 12:1-6; Levitik 23:5) Dan mem fason, Memoryal lamor Zezi ti fer enn fwa par an par bann premie Kretien c ek bann Temwin Zeova swiv mem model ki baze lor Labib.

Dat ek ler

Model ki ti etabli par Zezi ed nou pou determine, pa zis komie fwa bizin fer li, me osi dat ek ler Memoryal-la. Li ti introdir sa fet-la apre kouse soley 14 Nizan 33 Nou Lepok, dapre kalandriye lalinn dan Labib. (Matie 26:18-20, 26) Nou kontigne fer Memoryal sa dat-la sak lane dapre seki bann premie Kretien ti pe fer. d

Mem si 14 Nizan 33 Nou Lepok ti enn Vandredi, laniverser sa dat-la kapav tom enn lot zour lasemenn sak lane. Nou kalkil dat ki 14 Nizan tonbe sak lane mem fason ki ti fer dan lepok Zezi. Nou pa kalkil dapre kalandriye Zwif modern. e

Dipin ek divin

Pou sa komemorasion-la, Zezi ti servi dipin san levin ek divin ki ti reste pou repa Pak. (Matie 26:26-28) Dan mem fason, nou servi dipin san levin ek san azout lezot ingredian, ek divin rouz. Nou pa servi zi rezin ouswa divin ki finn melanze avek lezot kitsoz.

Sertin relizion servi dipin avek levin, me levin dan Labib li souvan enn sinbol pese ouswa koripsion. (Lik 12:1; 1 Korintien 5:6-8; Galat 5:7-9) Alor, zis enn dipin san levin ek san azout lezot kitsoz, ki kapav reprezant lekor Zezi Kris ki san pese. (1 Pier 2:22) Enn lot pratik ki pa an-akor avek Labib se ranplas divin par zi rezin ki pa fermante. Sertin legliz fer sa parski zot pa gagn drwa bwar lalkol, enn linterdiksion ki pa dapre bann Lekritir.—1 Timote 5:23.

Laser ek disan: bann lanblem

Dipin san levin ek divin rouz ki servi pandan Memoryal, zot bann lanblem ouswa sinbol laser ek disan Zezi Kris. Zot pa sanze par mirak an laser ek disan kouma sertin panse. Anou get bann rezon ki baze lor Labib.

Si Zezi ti donn lord so bann disip pou bwar so disan, li ti pou dir zot al kont lalwa Bondie ki dir pa konsom disan. (Zenez 9:4; Zistwar Bann Apot 15:28, 29) Me li pa posib parski Zezi pa ti pou zame donn lord lezot pou kas lalwa Bondie konsernan valer sakre disan.—Zan 8:28, 29.
Si bann zapot ti pe vremem bwar disan Zezi, li pa ti pou dir ki so disan “pou verse,” seki montre ki so sakrifis pa ti ankor fer.—Matie 26:28.
Sakrifis Zezi ti fer enn fwa pou tou. (Ebre 9:25, 26) Me, si dipin ek divin ti vinn laser ek disan pandan Repa Nou Segner, alor bann seki pran par dan sa seremoni-la ti pou repet sa sakrifis-la.
Zezi ti dir: “Kontign fer sa an mo memwar,” pa “an mo sakrifis.”—1 Korintien 11:24.

Bann seki krwar ki dipin ek divin pou vinn lekor ek disan Zezi dan enn fason literal, zot baz zot lor bann mo sertin verse. Par exanp, dan boukou tradiksion Labib finn ekrir ki Zezi pe dir konsernan divin: “Sa li mo disan.” (Matie 26:28) Me, kapav osi tradir Zezi so bann parol kouma: “Sa li reprezant mo disan.” f Parey kouma li ti abitie fer, Zezi ti pe ansegne par bann konparezon.—Matie13:34, 35.

Kisannla partisipe?

Kan bann Temwin Zeova selebre Repa Nou Segner, zis enn ti group parmi nou ki pran dipin ek divin. Pou ki rezon?

Disan ki Zezi finn verse finn etabli “enn nouvo lalians” ki finn ranplas lalians ant Zeova ek ansien nasion Izrael. (Ebre 8:10-13) Bann seki dan sa nouvo lalians la pran bann lanblem pandan Memoryal. Li inplik zis “bann ki Bondie inn apele” dan enn fason spesial. (Ebre 9:15; Lik 22:20) Zot bann ki pou regne dan lesiel avek Zezi Kris ek Labib dir ki zis 144,000 dimounn ki gagn sa privilez-la.—Lik 22:28-30; Revelasion 5:9, 10; 14:1, 3.

Konpare ar “ti troupo” ki finn gagn lapel pou regne avek Zezi Kris, laplipar parmi nou ena lespwar pou form parti “enn gran lafoul” ki pou gagn lavi pou touletan lor later. (Lik 12:32; Revelasion 7:9, 10) Bann ki parmi nou ena lesperans pou viv lor later pa pran bann lanblem, me nou asiste memoryal pou montre nou rekonesans pou sakrifis ki Zezi inn fer pou nou.—1 Zan 2:2.

a McClintock and Strong’s Cyclopedia, Volim IX, paz 212, dir: “Mo ‘sakreman’ pena dan Nouvo Testaman, ni mo Grek μυστήριον [my·steʹri·on] dan okenn sirkonstans ki ena lien ar batem ouswa Repa Nou Segner ek okenn lezot fet.”

b Sertin tradiksion Labib servi expresion “otan ki” kan zot koz lor Repa Nou Segner ek sa fraz-la finn interprete pou indike komie fwa bizin komemor sa repa-la. Me selman, dan sa kontex-la, sa lexpresion-la an lang orizinal vedir “sak fwa ki” ouswa “touletan.”—1 Korintien 11:25, 26, NTKM.

c Get The New Schaff-Herzog Encyclopedia of Religious Knowledge, Volim IV, paz 43-44, ek McClintock and Strong’s Cyclopedia, Volim VIII, paz 836.

d Get The New Cambridge History of the Bible, Volim 1, paz 841.

e Kalandriye Zwif modern kalkil koumansman mwa Nizan par nouvel-linn astronomik me sa teknik-la pa ti servi dan premie siek. Olie sa, mwa Nizan ti koumanse kan lalinn ti premie fwa vizib dan Zerizalem, ki kapav aparet enn zour ouswa plis apre nouvel-linn astronomik. Se enn rezon kifer dat ki bann Temwin Zeova fer Memoryal pa touletan parey avek dat ki bann Zwif selebre Pak.

f Get A New Translation of the Bible, par James Moffatt; The New Testament—A Translation in the Language of the People, par Charles B. Williams; ek The Original New Testament, par Hugh J. Schonfield.