Enn Izraelit ki ti apel Elkana ti ena de madam, Ann ek Penina. Me Elkana ti plis kontan Ann. Penina ti ena boukou zanfan ek sak fwa li ti boufonn Ann, parski Ann pa ti ena zanfan. Sak lane, Elkana ek so fami ti al Silo pou ador Zeova dan tabernak. Enn zour, kan zot ti laba, Elkana ti remarke ki Ann ti bien tris. Li ti dir li: ‘Ann, silteple, pa plore. Mo la pou twa. Mo kontan twa.’

Plitar, Ann ti al enn kote pou priye. Li ti plore ek li ti sipliy Zeova pou ed li. Li ti fer sa promes-la: ‘Zeova, si to donn mwa enn garson, mo pou donn twa li ek li pou servi twa toutlong so lavi.’

Gran Pret Eli ti trouv Ann pe plore, ek li ti panse ki Ann ti sou. Ann ti dir li: ‘Non, mo segner, mo pa sou mwa. Mo ena enn gro problem ek mo pe koz sa avek Zeova.’ Lerla, Eli ti konpran ki li ti fer enn erer ek li ti dir Ann: ‘Ki Bondie donn twa seki to anvi.’ Apre sa, Ann ti refer net ek li ti ale. Mwins ki enn an apre, Ann ti gagn enn garson ek li ti apel li Samiel. Mazine ki kantite Ann ti kontan!

Ann pa ti bliye promes ki li ti fer Zeova. Deswit kouma li ti aret donn  Samiel bwar, li ti amenn Samiel dan tabernak pou ki li servi Zeova. Ann ti dir Eli: ‘Se pou sa garson-la ki mo ti priye Zeova. Mo pret li Zeova pou touletan.’ Sak lane, Elkana ek Ann ti al get Samiel ek zot ti amenn enn manto san mans nef pou li. Zeova ti donn Ann trwa lezot garson ek de tifi.