Izai 60:1 dir: “Leve A! fam, avoy lalimier partou, parski to lalimier inn arive. Laglwar Zeova pe briye lor twa.” Dan sa verse-la, “fam” reprezant Sion, ouswa Zerizalem, kapital Zida sa lepok-la. (Iza. 60:14; 62:1, 2) Zerizalem ti reprezant nasion Izrael an-antie. Nou pou reponn de kestion konsernan sa verse-la: Premierman, kan ek kouma Zerizalem ti “leve” ek ti avoy enn lalimier sinbolik? Deziemman, eski bann parol Izai ena enn pli gran lakonplisman dan nou lepok?

Kan ek kouma Zerizalem ti “leve” ek ti avoy enn lalimier sinbolik? Pandan 70 an ki bann Zwif ti an exil dan Babilonn, Zerizalem ek so tanp ti dan enn move leta. Me apre ki bann Med ek bann Pers ti gagn laviktwar lor Babilonn, bann Izraelit ki ti res partou dan bann teritwar Babilonn ti kapav retourn Zerizalem ek retabli vre ladorasion. (Esdr. 1:1-4) Selman, dan koumansman lane 537 Avan Nou Lepok, zis enn ti group Zwif fidel ki sorti dan toule 12 tribi, ti retourn Zerizalem. (Iza. 60:4) Zot ti ofer bann sakrifis, zot ti fer bann fet, ek zot ti rekonstrir tanp. (Esdr. 3:1-4, 7-11; 6:16-22) Zeova so laglwar ti rekoumans briye lor Zerizalem ek lor so pep. Gras-a sa, bann Izraelit ti vinn enn lalimier pou bann lezot nasion ki pa ti konn Zeova.

Selman, bann profesi ki Izai ti anonse pa ti realize net sa lepok-la, parski laplipar bann Izraelit pa ti kontign obeir Bondie. (Ne. 13:27; Mal. 1:6-8; 2:13, 14; Mat. 15:7-9) Plitar, zot ti mem rezet Lemesi, Zezi Kris. (Mat. 27:1, 2) Ek an 70 Nou Lepok, Zerizalem ek so tanp ti re-detrir ankor enn fwa.

Zeova ti fini predir ki sa ti pou arive. (Dan. 9:24-27) Sa montre ki sa pa ti dan proze Zeova ki lavil Zerizalem realiz net bann profesi konsernan retablisman vre ladorasion ki trouv dan Izai sapit 60.

Eski bann parol Izai ena enn pli gran lakonplisman dan nou lepok? Wi, me sa pe akonpli avek enn lot fam sinbolik, setadir “Zerizalem ki lao.” Konsernan sa fam-la, lapot Pol ti ekrir: “Li nou mama.” (Gal. 4:26) Zerizalem ki lao reprezant parti lorganizasion Bondie ki dan lesiel, kot ena bann anz ki fidel. Ek parmi so bann zanfan, ena Zezi ek 144,000 Kretien ki’nn swazire par lespri sin, ki ena lesperans pou viv dan lesiel parey kouma Pol. Sa bann 144,000 Kretien la form “enn nasion ki sin,” setadir “Izrael Bondie.”—1 Pier 2:9; Gal. 6:16.

Kouma Zerizalem ki lao ti “leve” ek ti “avoy lalimier”? Li’nn fer sa gras-a so bann zanfan, leres bann 144,000 ki ankor lor later. Anou gete kouma seki zot inn viv, li parey kouma seki ti predir dan Izai sapit 60.

Bann Kretien ki Bondie inn swazire ti bizin “leve,” parski zot ti dan nwarte lor plan spiritiel depi ki lapostazi ti fane partou apre lamor bann zapot. (Mat. 13:37-43) Sa lepok-la, sa bann Kretien-la ti bann prizonie Gran Babilonn, setadir lanpir mondial fos relizion. Zot ti res prizonie Gran Babilonn ziska “peryod lafin sa lemond-la,” ki ti koumanse an 1914. (Mat. 13:39, 40) Apre sa, an 1919, zot ti libere ek deswit zot ti koumans fann zot lalimier sinbolik kan zot ti fer zot maximum pou pres bon nouvel lor Rwayom Bondie. a  Avek letan, bann dimounn ki sorti dan tou nasion ti vinn dan sa lalimier-la. Parmi zot, ti ena osi leres bann 144,000 ki ankor lor later, setadir “bann lerwa” ki mansione dan Izai 60:3.​—Rev. 5:9, 10.

Dan lavenir, bann Kretien ki Bondie inn swazire pou fann lalimier ki sorti kot Bondie dan enn pli gran fason. Kouma zot pou fer sa? Kan zot pou mor, zot pou form parti dan “Nouvo Zerizalem,” setadir bann 144,000 lerwa ek pret ki reprezant Kris so lamarye.”—Rev. 14:1; 21:1, 2, 24; 22:3-5.

Nouvo Zerizalem pou zwe enn rol inportan dan realizasion Izai 60:1. (Konpar Izai 60:1, 3, 5, 11, 19, 20 ar Revelasion 21:2, 9-11, 22-26.) Dan Izrael, Zerizalem ti plas kot gouvernman ti ete. Dan mem fason, Nouvo Zerizalem ek Kris pou vinn gouvernman nouvo lemond dan lavenir. Kouma Nouvo Zerizalem pou “desann depi lesiel kot Bondie”? Se kan li pou fer bann kitsoz pou later. Bann dimounn ki ena enn gran respe pou Bondie ek ki sorti dan tou nasion “pou mars dapre so lalimier.” Zot pou mem libere ar pese ek lamor. (Rev. 21:3, 4, 24) Lerla, parey kouma Izai ek bann lezot profet ti predir, ‘tou bann kitsoz pou retabli.’ (Zist. 3:21) Bann kitsoz inn koumans retabli depi ki Kris inn vinn Lerwa ek sa retablisman-la pou fini alafin Regn Mil An Zezi Kris.