LISA dir: “Se bonte bann frer ek ser dan lasanble ki ti plis tous mwa.” a Bonte bann frer ek ser ti premie kitsoz ki ti atir Lisa ar laverite. Li parey osi pou Anne, ki dir: “O-koumansman, se pa lansegnman bann Temwin ki ti atir mwa dan laverite, se plis zot bonte ki ti atir mwa.” Asterla, sa de ser-la bien kontan lir Labib ek zot medit lor seki zot lir, me bonte bann frer ek ser finn ena enn gran lefe lor zot.

Kouma nou kapav montre nou bon anver lezot, pou ki sa ankouraz zot? Anou get de fason: par nou bann parol ek nou bann aksion. Apre sa, nou pou gete anver kisannla nou bizin montre nou bon.

Proverb sapit 31 koz lor enn fam kapab ki touletan “koz avek bonte.” (Prov. 31:26) Li koz avek bonte parski li vey bien lor seki li dir ek lor fason ki li koze. Bann papa osi bizin koz avek bonte. Laplipar paran kone ki, si zot koz dan enn move fason ar zot zanfan, sa kapav bles zanfan-la, ek lerla li pou mal reazir. Alor, kan bann paran koz dan enn bon fason ar zot zanfan, li pou pli fasil pou zanfan-la ekout so paran ek obeir li.

Mem si to pena zanfan, kouma to kapav aprann pou koz avek bonte? Nou trouv enn premie lide dan Proverb 31:26: “Kan li ouver so labous, bann parol ranpli ar sazes ki sorti.” Savedir ki nou bizin swazir bien nou bann parol ek vey bien lor ton nou lavwa. Dan sertin sitiasion, li bon ki nou demann noumem, ‘Seki mo pou dir-la, eski sa pou fer dimounn-la ankoler, ouswa eski sa pou kalme li?’ (Prov. 15:1) Nou montre ki nou ena sazes kan nou reflesi bien avan nou koze.

Enn lot proverb dir: “Bann koze san reflesi zot koumadir bann kout lepe.” (Prov. 12:18) Nou bann parol, ek fason ki nou koze, kapav ena enn lefe lor lezot. Alor, kan nou reflesi lor lefe ki sa kapav ena lor lezot, sa pou ed nou pou fer bien atansion kan nou koze. Kan nou koz avek bonte, nou pa pou servi bann mo ki pou bles lezot ek nou pa pou koz dan enn move fason. (Efe. 4:31, 32) Nou pou ranplas bann panse ki negatif par bann parol ki pozitif ek zanti, ek nou pou koz dan enn bon fason. Zeova enn bon lexanp dan sa domenn-la, parski kan so serviter Eli ti per, Zeova ti rasir li. Anz ki Zeova ti avoye pou rasir Eli, ti ena ‘enn lavwa kalm ek trankil.’ (1 Ler. 19:12) Selman, nou bizin pa zis montre bonte par nou bann parol, nou bizin montre sa par nou bann aksion osi. Kouma nou kapav fer sa?

Nou imit Zeova kan nou koz dan enn bon fason ek kan nou azir dan enn bon fason. (Efe. 4:32; 5:1, 2) Lisa, ki nou ti mansione avan, explike kouma bann Temwin ti montre bonte anver li. Li dir: “Kan nou fami ti bizin demenaze vit-vit, de koup dan lasanble ti pran konze dan zot travay pou ed nou pou demenaze. Sa lepok-la, mo pa ti pe mem etidie Labib!” Parski sa bann Temwin-la ti montre bonte anver li, sa ti motiv Lisa pou aprann plis lor laverite.

Anne, ki nou ti mansione dan koumansman sa lartik-la, li osi li ti bien rekonesan  anver bann Temwin pou bonte ki zot ti montre anver li. Li dir: “Akoz bann lexperyans ki mo ti fer dan lepase, mo ti vinn bien mefian. Mo ti gagn difikilte pou fer lezot konfians.” Li dir osi: “Kan mo ti zwenn bann Temwin, mo pa ti ena konfians an zot. Mo ti demann momem, ‘Kifer zot interese ar mwa?’ Me sa dimounn ki ti fer mo letid-la ti telman bon anver mwa, ki sa ti pous mwa pou fer li konfians.” Ki rezilta sa finn ena? “Sa finn ed mwa pou reflesi plis lor seki mo ti pe aprann.”

Lamour ek bonte bann frer ek ser finn ena enn gran lefe lor Lisa ek Anne, ek sa finn motiv zot pou aprann plis lor laverite. Bonte bann frer ek ser finn ed zot pou ena konfians an Zeova ek so pep.

Pou sertin dimounn, akoz fason ki zot inn grandi ouswa landrwa kot zot inn reste, li normal pou fer enn sourir ek pou dir bann parol ki zanti. Se enn bon kitsoz si nou zanti avek lezot akoz nou kiltir  ouswa nou personalite. Me si se zis akoz nou kiltir ouswa nou personalite ki nou zanti avek lezot, kitfwa nou pa pe montre bonte ki Zeova anvi nou montre.​—Konpar ar Zistwar Bann Apot 28:2.

Vre bonte, li form parti frwi lespri sin Bondie. (Gal. 5:22, 23) Alor, pou nou reisi montre vre bonte, nou bizin les lespri sin inflians nou bann panse ek nou bann aksion. Kan nou fer sa, nou imit Zeova ek Zezi. Anplis, antan ki Kretien, nou vremem kontan nou prosin. Alor, se nou lamour pou Zeova ek nou lamour pou nou prosin ki motiv nou pou montre nou bon anver lezot. Sa kalite bonte-la se enn santiman bien for ki sorti dan leker ek ki fer Zeova plezir.

Nou kapav trouv sa fasil pou montre bonte anver bann dimounn ki zanti avek nou ouswa anver bann dimounn ki nou kone. (2 Sam. 2:6) Enn fason ki nou kapav fer sa se kan nou remersie zot. (Kol. 3:15) Me ki nou bizin fer si nou panse ki enn kikenn pa merite ki nou tret li avek bonte?

Reflesi lor la: Zeova inn donn nou enn lexanp parfe konsernan bonte, ek so Parol, Labib, ansegn nou enn leson inportan lor fason ki nou bizin montre sa kalite-la. Dan bann Lekritir Grek Kretien, nou trouv plizir fwa lexpresion “faver ki personn pa merite.” Kouma Bondie montre bonte anver nou?

Zeova montre bonte anver tou bann imin kan Li donn zot seki zot bizin pou viv. (Mat. 5:45) An realite, avan mem ki nou’nn konn Zeova, Li’nn montre bonte anver nou. (Efe. 2:4, 5, 8) Par exanp, Li’nn donn nou seki ena plis valer pou Li, setadir lavi so sel Garson. Lapot Pol ti ekrir ki Zeova inn donn laranson “dapre labondans so faver ki personn pa merite.” (Efe. 1:7, NW) Anplis, mem si nou fer pese ek ki nou desevwar Zeova, Li kontign gid nou ek ansegn nou. So bann instriksion ek so parol koumadir “bann ti lapli.” (Det. 32:2) Li inposib ki nou retourn Zeova tou sa bonte ki Li’nn montre anver nou la. An realite, nou lavenir depann lor bonte Zeova.​—Konpar ar 1 Pier 1:13, NW.

Li kler ki bonte Zeova li enn kalite ki atir nou ek ki motiv nou. Alor, olie ki nou montre nou bon zis anver sertin dimounn, nou bizin fer zefor pou imit Zeova ek montre nou bon anver lezot toulezour. (1 Tes. 5:15) Kan nou montre bonte regilierman, nou pou koumadir enn ver delo glase enn zour kot fer bien so. Nou pou enn rekonfor pou nou lafami, nou bann koleg travay, nou bann kamarad lekol, nou bann vwazin, ek nou bann frer ek ser.

Reflesi lor bann bienfe ki to fami ek bann frer ek ser dan lasanble pou gagne, parski to’nn montre twa bon anver zot par to bann parol ek to bann aksion! Kitfwa ena enn kikenn dan to lasanble ki bizin led pou okip so lakaz ek so zardin, ouswa pou al fer so shoping. Anplis, kan to dan predikasion ek ki to zwenn enn dimounn ki bizin enn koudme, eski to kapav ed li?

Anou imit Zeova, ek anou touletan fer zefor pou montre bonte par nou bann parol ek nou bann aksion.