Bondie pa fer preferans ek Li anvi beni tou dimounn.

Bondie ti promet profet Abraam ki ‘atraver li tou bann fami lor later pou vremem gagn benediksion.’​—Zenez 12:3.

Ki nou aprann? Bondie bien kontan nou ek anvi beni tou bann fami, setadir bann misie, bann madam, ek bann zanfan, ki obeir Li.

Bondie ena mizerikord ek Li beni tou bann ki fer zefor pou konn Li.

Kreater Tou-Pwisan ti donn profet Moiz pouvwar pou fer bann gran mirak. Pourtan, Moiz ti fer sa lapriyer-la: “Fer mwa konn to bann fason azir. Koumsa mo kapav konn twa, ek kontign gagn to faver.” (Exod 33:13) Bondie ti kontan ki Moiz ti demann Li sa. Lerla, Li ti beni Moiz kan Li ti donn li plis konesans, ek ti ed li pou konpran So bann fason azir ek So bann kalite. Par exanp, Moiz ti aprann ki nou Kreater se “enn Bondie ki ena mizerikord ek konpasion.”​—Exod 34: 6, 7.

Ki nou aprann? Bondie anvi beni nou tou, ki nou enn misie, enn madam, ouswa enn zanfan, si nou fer zefor pou konn Li pli bien. Dan bann Lekritir Sakre, Bondie explike kouma pou ador Li ek ki kantite Li anvi donn nou so faver ek so benediksion.

Si nou aprann konn Zezi ek seki li ti fer ek ansegne, nou kapav gagn bann benediksion pou touletan.

Dan bann Lekritir Sakre, ena boukou detay konsernan Zezi ek so bann lansegnman. Bondie ti donn Zezi pouvwar pou fer bann gran mirak, kouma par exanp, geri bann aveg, bann sourd, ek bann andikape. Li ti mem redonn lavi bann ki ti mor. Dan sa fason-la, Zezi ti montre kouma Bondie pou beni bann imin dan lavenir. Li ti explike kouma sakenn parmi nou kapav gagn sa bann benediksion-la: “Samem ki vedir lavi eternel, ki zot aprann konn twa, sel vre Bondie, ek sa kikenn ki to finn avoye la, Zezi Kris.”​—Zan 17:3, NW.

Zezi ti ena konpasion, lafeksion, ek li ti zanti. Bann misie ek bann madam, bann zenn ek bann vie, ti al ver li parski li ti donn zot sa zoli linvitasion-la: “Aprann ar mwa, parski mo ena enn karakter dou ek enn leker inb, ek zot pou gagn rekonfor.” (Matie 11:29, NW) Konpare ar bann lezot dimounn dan so lepok ki pa ti ena konsiderasion pou bann madam, Zezi ti tret bann madam avek zantiyes, avek respe, ek ti donn zot, zot dignite.

Ki nou aprann? Zezi ti montre enn gran lamour pou bann dimounn, ek li’nn kit enn lexanp extraordiner lor fason ki nou bizin tret sakenn nou kamarad.

Bann Lekritir Sakre ansegn nou ki “pou nou ena enn sel Bondie” ek ki Zezi Kris ti enn mesaze Bondie ki ena limilite. (1 Korintien 8:6) Zezi ti dir dan enn fason bien kler ki Bondie pli gran ki li ek ki se Bondie ki ti avoy li lor later.​—Zan 11:41, 42; 14:28. a