Sertin dimounn demann zotmem si finn fer bann sanzman dan mesaz ki Bondie finn fer ekrir. Profet Izai ti dir ki mesaz Bondie “dire pou touletan.” (Izai 40:8) Kouma nou kapav sir ki bann promes Bondie ankor parey azordi?

Bondie ena pouvwar pou protez so Mesaz ek pou anpes ninport kisannla falsifie li. Dan lepase, kan bann zom ti rekopie bann Lekritir Sakre, zot ti kont sak let pou fer sir ki pa’nn azout nanye, pa’nn sanz nanye, ouswa pa’nn tir nanye. Me malerezman bann imin inparfe, alor sertin parmi sa bann zom-la ti fer bann ti erer.

Ena bann milye kopi bann vie maniskri bann Lekritir Sakre. Alor, kan nou konpar sa bann diferan kopi la, li fasil pou trouve si kitfwa ena enn erer.​—Pou aprann plis, get lartik « La Bible a-t-elle été modifiée ou falsifiée ? » lor jw.org.

Par exanp, anou get bann vie dokiman ki apel bann Roulo Lamer Mor. Se bann Arab ki viv dan dezer ki finn dekouver sa bann dokiman-la dan bann lagrot pre ar Lamer Mor an 1947. Parmi sa bann vie dokiman la, ena enn parti bann Lekritir Sakre ki ena plis ki 2,000 an. Bann exper ti konpar sa bann vie maniskri la ar bann Lekritir Sakre ki nou ena azordi. Ki zot finn trouve?

Bann exper finn trouve ki bann Lekritir Sakre ki nou ena azordi parey kouma seki Bondie ti fer ekrir. a Alor, kan nou examinn bien sa bann vie maniskri la, sa rasir nou ki kan nou lir bann Lekritir Sakre zordi nou pe vremem lir mesaz Bondie. Nou kapav sir ki Bondie finn fer tou pou ki azordi nou gagn bann Lekritir Sakre ki exakt.

Alor, nou kapav ena full konfians ki kan nou pe lir mesaz Bondie, li exakt. Asterla ki nou finn konpran sa lide-la, anou gete ki nou kapav aprann lor Bondie gras-a so bann profet.