Enn lobzektif, se plis ki enn rev. Enn rev se enn kitsoz ki to anvi li arive. Parkont, enn lobzektif inplik ki to fer bann proze, ki to adapte twa, ek biensir, ki to travay bien dir pou realiz li.

Sertin lobzektif kapav pran enn tigit letan mem pou realize (de-trwa zour ouswa de-trwa semenn). Ena ki pran inpe plis letan (de-trwa mwa). Ek lezot pran pli boukou letan (enn-an ouswa plis), ek pou realiz zot, kitfwa pou bizin realiz bann tipti lobzektif antretan.

Kan to realiz to bann lobzektif, sa kapav fer twa ena plis konfians an tomem, fer to lamitie avek lezot vinn pli for, ek fer twa pli ere.

Konfians an tomem: Kan to fixe bann ti lobzektif ek to realiz zot, to pou ena plis konfians an tomem pou fixe bann pli gran lobzektif. To pou ena osi plis konfians an tomem kan to pou fer fas ar bann difikilte lavi toulezour, kouma par exanp presion bann kamarad.

Lamitie: Bann dimounn kontan frekant bann ki ena bann lobzektif, setadir bann dimounn ki kone ki kitsoz zot anvi ek ki fer zefor pou gagn sa. Anplis, kan to travay avek enn kikenn ki ena mem lobzektif ki twa, se enn parmi bann meyer fason pou fer to lamitie avek li vinn pli for.

Ere: Kan to fixe bann lobzektif ek to realiz zot, to gagn enn santiman satisfaksion.

“Mo kontan fixe mwa bann lobzektif. Koumsa, mo res touletan okipe ek mo kontign ena bann kitsoz pou realize. Ek kan to realiz to lobzektif, to kontan kan to reflesi lor seki to’nn fer ek to dir, ‘Wow, mo’nn reisi fer sa! Mo’nn reisi realiz mo lobzektif.’”​—Christopher.

PRINSIP LABIB: “Si to atann ki divan ek letan bon, to pa pou plant nanye ek to pa pou rekolte nanye.”​—Ekleziast 11:4, Today’s English Version.

Pou to fixe twa bann lobzektif ek pou to realiz zot, swiv sa bann pwin-la:

Klas to bann lobzektif. Fer enn lalis to bann lobzektif. Klas zot dapre zot priorite, setadir seki to anvi realize an premie, deziem, trwaziem, ale mem.

Organiz twa. Pou sak lobzektif, fer sa bann kitsoz-la:

• Fixe enn dat limit rezonab.

• Ekrir bann letap ki to pou bizin swiv pou realiz sa lobzektif-la.

• Prevwar bann difikilte ki to kapav gagne, ek reflesi kouma to pou sirmont zot.

Azir. Pa atann ki to gagn tou bann detay pou to koumans realiz to lobzektif. Demann tomem, ‘Ki premie kitsoz mo kapav fer pou realiz mo lobzektif?’ Apre sa, fer li. Swiv to bann progre sak fwa ki to reisi pas enn letap.

PRINSIP LABIB: “Bann plan enn kikenn ki travay dir vremem pou reisi.”​—Proverb 21:5.