La Bible donne nou sa l’avertissement-la: “C’est dan leker ki bann mauvais raisonnement, crime, adultere, fornication, vol, fausse temoignage, blaspheme, sorti.” (Mat. 15:19) Nou leker symbolik kapav faire traitre ar nou, ek amenn nou pou faire enn kitsoz ki contraire ar volonté Bondié. Kitfois c’est selman apré ki nou’nn fini faire enn mauvais kitsoz, ki nou realisé seki’nn arrivé. Ki kapav aide nou pou koné ki bann l’intention ena dan nou leker avant-mem ki nou prend enn mauvais chemin?

Lire la Bible toulé-jour ek medite lor seki li dire.

L’apotre Paul ti ecrire: “Parole Bondié, li vivant ek li puissant, li pli fité ki enn l’epée ki coupe deux coté, ek li percé ziska li separe nâme ek l’esprit.” Message Bondié ki trouve dan la Bible “kapav decouvert bann pensée ek bann l’intention ki ena dan leker.” (Héb. 4:12) Kan nou examine nou-mem avek seki la Bible dire, sa kapav aide nou pou konn bann l’intention ki ena dan nou leker. Alors, li vrai-mem bien important ki nou lire Parole Bondié toulé-jour ek medite lor seki li dire! Lerla, sa pou aide nou pou pense pareil couma Jéhovah.

Kan nou accepté bann conseil ki sorti dan la Bible ek nou mette en pratik so bann principe, sa pou ena enn l’effet lor nou conscience​—sa la voix ki “temoigne avek” nou-mem-la. (Rom. 9:1) Nou conscience kapav empeche nou pou rod bann pretexte  pou faire seki mauvais. En plus, dan la Bible ena bann l’exemple ki kapav “averti nou.” (1 Cor. 10:11) Sa bann l’exemple-la kapav empeche nou prend bann mauvais decision. Ki sakenn parmi nou kapav faire?

Prié Bondié pou Li aide ou konn bann l’intention ki ena dan ou leker.

Jéhovah Li “enn Bondié ki examine leker.” (1 Chron. 29:17) Li “pli grand ki nou leker ek Li konn tou kitsoz.” (1 Jean 3:20) Bondié konn tou kitsoz lor nou. Si, dan nou la priere nou dire Li nou bann tracas, nou bann sentiment ek nou bann desir, Jéhovah kapav aide nou pou konn bann l’intention ki ena dan nou leker. Nou kapav mem demann Li pou ‘crée enn leker pur dan nou.’ (Ps. 51:10) Alors, pou nou kapav konn bann l’intention ki ena dan nou leker, li bien important ki nou faire la priere.

Ecoute bien pendant bann reunion.

Kan nou ecoute bien seki dire dan reunion, sa kapav aide nou pou examine seki nou été au fond nou-mem​—nou leker. Mem si dan chaque reunion nou pa aprann bann nouveau kitsoz, kan nou la, nou comprend pli bien bann principe la Bible. Nou gagne aussi bann rappel bien important ki kapav aide nou pou koné ki ena dan nou leker ek lerla faire bann changement. Commentaire bann frere ek soeur aussi kapav aide nou beaucoup. (Prov. 27:17) Mais si nou pa assisté reunion regulierement, sa kapav faire nou di-tort. Sa kapav amenn nou ‘pou rod nou prop desir egoïste.’ (Prov. 18:1) Alors, li bon ki nou demann-nou-mem: ‘Eski mo habitué assisté tou reunion ek ecoute bien tou seki dire la-bas?’​—Héb. 10:24, 25.

Nou leker traitre, alors, dan beaucoup domaine, li kapav amenn nou pou prend bann mauvais decision. Anou examine quatre domaine: bann kitsoz materiel, la boisson alkolik, nou bann frequentation, ek nou bann divertissement.

Bann kitsoz materiel.

Li naturel ki nou rod bann kitsoz ki nou bizin pou vive. Selman, Jésus ti donne enn l’exemple ki pou aide nou pou nou pa attache trop l’importance ar bann kitsoz materiel. Dan sa l’exemple-la, Jésus ti raconte zistoire enn missié ki ti riche ek ki ti ena bann store ki ti bien rempli. Alors, li pa ti ena place pou garde bann la grain ki li ti gagné dan enn lot bon recolte. Li ti ena l’intention pou detruire so bann store ek pou range bann ki pli grand. Li ti dire ar li-mem: “Mo pou ramasse tou mo bann la grain ek tou mo bann bon kitsoz; ek mo pou dire mo nâme: ‘Mo nâme, to ena enn quantité bon kitsoz en reserve pou beaucoup l’année; to kapav repose-toi trankil, mangé, boire ek amuse-toi.’” Selman, sa zom riche-la pa ti prend compte enn kitsoz important: Li ti pou kapav mort sa soir-la-mem.​—Luc 12:16-20.

A mesure ki nou pé vieilli, kitfois nou peur pangar nou pena assez kass kan nou vinn vié. Tellement nou tracassé, nou commence trouve bann pretexte pou travail overtime jour reunion ou-soit nou neglige nou bann responsabilité spirituel dan certain fason. Eski nou pa bizin faire attention ar sa qualité tendance-la? Ou-soit, li possible ki nou encore jeune, ek nou realisé ki pena pli bon carriere ki service a plein temps. Selman, eski nou pensé ki d’abord nou bizin ramasse inpé kass avant nou commence faire  pionnier? Eski nou pa bizin faire tou seki nou kapav asterla pou vinn riche envers Bondié? Ki koné si nou pou encore vivant demain?

La boisson alkolik.

“Pa retrouve-toi parmi bann grand buveur di-vin.” (Prov. 23:20) Si enn dimoune content boire, kitfois li pou trouve bann pretexte pou boire souvent. Kitfois li dire ki sa aide li pou relax, mais ki li pa boire pou sou. Si nou bizin boire pou relax, alors, inn ler pou nou examine bann tendance ki nou ena dan nou leker.

Nou bann frequentation.

Bien sur, nou pa kapav evite tou contact avek bann dimoune ki pa servi Jéhovah​—couma par exemple dan lekol, dan travail, ek dan predication. Mais li different kan nou frequente zot, ek mem faire zot vinn nou bann bon camarade. Eski nou trouve bann pretexte pou frequente sa bann dimoune-la ek nou dire ki zot ena bann bon qualité? La Bible donne nou sa l’avertissement-la: “Pa trompe zot-mem. Bann mauvais frequentation gate bann bon l’habitude.” (1 Cor. 15:33) Zis enn tigit de l’eau sale assez pou contamine de l’eau prop. Alors, si nou faire camarade avek bann dimoune ki pena la crainte pou Bondié, sa kapav contamine nou spiritualité ek amenn nou pou ena mem fason pensé ki bann dimoune dan le monde, ek imite zot l’habillement, zot parole ek zot conduite.

Nou bann divertissement.

Avek technologie moderne li facile pou nou rente en contact avek tou sorte qualité divertissement. Mais la plupart ladan pa bon pou enn chretien. Paul ti ecrire: ‘Fodé ki l’impureté dan n’importe ki forme pa mem mentionné parmi zot.’ (Éph. 5:3) Mais ki nou pou faire si nou leker pousse nou pou guette ou-soit pou ecoute enn kitsoz impur? Kitfois nou pou dire ki tou dimoune bizin inpé detente ou-soit divertissement, ek seki enn dimoune faire dan sa domaine-la, c’est enn kitsoz personnel. Mais, anou prend compte conseil ki Paul inn donne nou, ek pa laisse nou lizié ou-soit nou zoreille rente en contact avek okenn kitsoz impur.

Si nou finn laisse nou leker ki traitre embete nou ek nou finn prend l’habitude pou excuse nou bann mauvais action, nou kapav faire bann changement. (Éph. 4:22-24) Anou guette deux l’exemple moderne.

Miguel a ti bizin change so fason pensé lor bann kitsoz materiel. Li dire: “Mo madame, mo garson ek mo-mem nou sorti dan enn pays kot bann dimoune pensé ki li bien important pou ena bann dernier ek bann pli bon technologie, ek pou ena enn confort materiel. Ti’nn arrive enn moment kot mo ti consacré mo la vie pou gagne tou seki mo ti kapav ar sa le monde-la. Mo ti pensé ki mo ti kapav faire sa sans ki mo vinn materialiste. Mo pa ti tardé pou realisé ki jamais mo pa ti pou fini rod bann kitsoz materiel. Mo ti prié Jéhovah concernant mo fason pensé ek bann l’intention ki ti ena dan mo leker. Mo ti faire Li koné ki, avek mo famille, nou ti envie servi Li plus. Nou ti prend decision pou simplifié nou la vie ek pou al servi kot ti bizin plus proclamateur. Nou pa ti tardé pou faire pionnier. Nou ti rann-nou compte ki nou pa ti bizin beaucoup kitsoz materiel pou nou heureux ek pou ena enn la vie bien rempli.”

Enn missié ki appel Lee ti examine-li-mem dan enn fason honnete, ek sa ti aide li pou abandonne bann mauvais frequentation. Lee dire: “A cause mo travail, souvent mo ti frequente bann fournisseur etranger. Mo ti koné ki dan sa bann reunion-la ti pou servi beaucoup la boisson, mais mo ti bien content pou allé kan-mem. Plusieurs fois mo ti preské sou, mais apré, mo ti regretté. Mo ti bizin examine mo leker dan enn fason honnete. Grace a bann conseil ki sorti dan Parole Bondié ek suggestion ki bann ancien ti donne moi, mo ti rann-moi compte ki, seki mo ti pé vrai-mem rodé c’est frequentation bann dimoune ki pa content Jéhovah. Asterla, tant ki mo kapav, mo faire mo business par telephone ek mo limite mo bann contact avek bann fournisseur.”

Nou bizin honnete avek nou-mem ek koné ki bann l’intention ki ena dan nou leker. A mesure ki nou faire sa, nou bizin rod l’aide Jéhovah dan la priere ek rappel ki “Li konn bann secret ki ena dan leker” bann dimoune. (Ps. 44:21) Bondié inn aussi donne nou so Parole ki couma enn la glace ki permette nou pou examine-nou-mem. (Jacq. 1:22-25) Bann rappel ek bann conseil ki nou gagné dan nou bann publication ek dan nou bann reunion aussi, bien important! Tou sa bann disposition-la kapav aide nou pou protege nou leker ek pou faire seki droite.