JULIAN rapel: “Kan ti anonse ki mo garson inn exkli, mo lavi ti devir anba-lao. Se mo pli gran garson, nou ti bien pros, ek nou ti fer boukou kitsoz ansam. Li ti touletan exanpler, me enn sel kout li’nn koumans ena enn move konportman. Toulezour mo madam ti pe plore, ek mo pa ti kone kouma pou konsol li. Nou pa ti aret demann noumem, antan ki paran, eski ena kitsoz ki nou pa’nn fer kouma bizin.”

Kouma nou kapav dir ki exkli enn dimounn se enn dispozision ranpli ar lamour, alor ki sa fer boukou lapenn? Dapre Labib kifer bizin pran enn mezir sever koumsa? Ek kifer enn dimounn exkli?

Enn Kretien exkli, premierman parski li’nn fer enn pese grav, ek deziemman parski li pa’nn repanti.

Li vre ki Zeova pa atann ki nou fer tou kitsoz dan enn fason parfe. Selman, Li atann ki so bann serviter swiv bann prinsip ki Li’nn etabli an rapor avek pirte. Par exanp Zeova exize ki nou pa fer bann pese grav kouma limoralite, lidolatri, kokin, fer eskro, fer krim ek gagn kontak avek bann demon.—1 Kor. 6:9, 10; Rev. 21:8.

Eski to pa dakor ki bann prinsip Zeova an rapor avek pirte, zot rezonab ek zot protez nou? Kisannla pa ti pou kontan viv parmi bann dimounn ki kontan lape, ek ki nou kapav fer konfians? Kan nou’nn vwe nou lavi ar Bondie, nou’nn promet Li pou viv an armoni avek bann prinsip ki ena dan so Parol. Gras-a sa, nou pe kapav frekant bann dimounn koumsa parmi pep Bondie.

Me ki arive si enn Kretien fer enn pese grav? Dan lepase, boukou serviter Zeova ti fer bann pese bien grav, selman Bondie pa ti rezet zot. Nou konn bien lexanp lerwa David. Li ti komet ladilter ek ti fer enn krim. Pourtan, profet Natann ti dir li: “Zeova . . . pardonn to pese.”—2 Sam. 12:13.

Bondie ti pardonn pese David parski li ti repanti sinserman. (Ps. 32:1-5) Azordi osi parey, enn serviter Zeova exkli si li pa repanti ouswa si li kontign fer seki pa bon. (Zist. 3:19; 26:20) Si bann ansien dan enn komite zidisier trouve ki enn Kretien pa’nn montre ki li’nn vremem repanti, zot bizin exkli li.

Koumansman, nou kapav panse ki desizion pou exkli enn dimounn li sever ouswa li inzis, sirtou si nou pros ar sa dimounn-la. Selman dan Labib, Zeova donn nou bann bon rezon pou krwar ki se enn dispozision ranpli ar lamour.

Zezi ti dir ki se bann rezilta ki pou prouve ki enn desizion li saz ouswa non. (Mat. 11:19) Desizion pou exkli enn dimounn ki pale repanti, li saz ek li kapav prodir bann bon rezilta. Anou examinn trwa:

Exkli enn dimounn ki’nn fer pese donn loner nom Zeova. Nou port nom Zeova, alor li normal ki nou kondwit ena enn lefe lor so nom. (Iza. 43:10) Kondwit enn garson kapav swa donn loner swa zet dezoner lor so bann paran. Li parey pou bann serviter Zeova. Nou kondwit kapav swa atir bann dimounn ver Zeova ouswa elwagn zot ar Li. Nom Bondie pou gagn loner si bann dimounn ki port sa nom-la zotmem zot aplik so bann prinsip. Ti ena enn sitiasion inpe parey dan lepok Ezekiel, kan bann dimounn lezot nasion ti asosie nom Zeova ar bann Zwif.—Eze. 36:19-23.

Nou pou sali nom Bondie ki sin si nou pratik limoralite. Lapot Pier ti donn sa konsey-la bann Kretien: “Parey kouma bann zanfan, zot bizin obeir Bondie ek pa swiv zot bann move dezir ki zot ti ena lontan kan zot ti dan liniorans. Okontrer, parey kouma Bondie ki finn apel zot, Li sin, zot osi zot bizin vinn sin dan zot konportman. Lekritir dir: ‘Zot bizin sin parski mo sin.’” (1 Pier 1:14-16) Kan nou ena enn kondwit sin, sa donn loner nom Bondie.

Si enn Temwin Zeova pratik bann move kitsoz, pena dout ki so bann kamarad ek bann konesans pou konn sa. Kan li exkli, sa montre ki Zeova ena enn pep ki sin, ki swiv so bann prinsip pou zot kapav kontign res sin. Enn zour enn misie ti vinn asiste renion dan enn Lasal an Suisse. So ser ti exkli parski li ti komet limoralite. Misie-la ti dir ki li anvi form parti dan enn lorganizasion ki “pa toler bann move kondwit.”

Kan exkli enn dimounn ki’nn fer pese, sa protez kongregasion ki sin. Lapot Pol ti dir bann Korintien ki sa pou enn danze si zot les bann ki fer pese volonterman, kontign res dan kongregasion. Li ti konpar move linflians sa bann dimounn-la ar levin ki fer enn lapat antie monte. Li ti dir: “Enn tigit levin fer lapat antie gonfle.” Apre li ti donn zot sa konsey-la: “Met deor seki move parmi zot.”—1 Kor. 5:6, 11-13.

Li paret ki sa kikenn ki move la ti pe pratik limoralite san okenn laont. Ek sertin manb kongregasion ti mem koumans aprouv so kondwit. (1 Kor. 5:1, 2) Si kongregasion ti ferm lizie lor enn pese grav koumsa, pena dout ki lezot Kretien ti kapav santi zot pouse pou fer parey kouma bann dimounn ki ti viv dan sa lavil bien imoral-la. Kan bann ansien inior bann pese volonter, sa kapav pous bann manb kongregasion pou konsider bann prinsip Bondie kouma enn kitsoz banal. (Ekle. 8:11) Anplis, bann ki fer pese volonterman zot kapav vinn kouma “bann ros ki kasiet anba delo,” ki kapav amenn lezot pou fer nofraz lor plan spiritiel.—Zid 4, 12, NW.

Kan exkli enn dimounn sa kapav fer li realize ki kantite so pese grav. Enn fwa Zezi ti rakont zistwar enn zenes ki ti kit lakaz so papa ek ti al dan enn lot pei. Laba li ti amenn enn lavi dezord ek ti gaspiy tou so dibien. Lerla li’nn koumans santi lamizer ek li’nn konpran ki lavi andeor lakaz so papa, bien dir. Finalman li’nn realize ki li’nn mal azir. Li’nn repanti ek li’nn retourn lakaz. (Lik 15:11-24) Lazwa ki papa la ti resanti kan li’nn trouve kouma so garson inn sanze, dekrir bien seki Zeova resanti. An realite, Zeova Limem donn nou sa lasirans la: “Seki fer mwa plezir, se pa ki enn move dimounn mor, me plito ki sa move dimounn la sanze ek res vivan.”—Eze. 33:11.

Li parey pou enn kikenn ki’nn exkli. Kitfwa parski li nepli form parti dan kongregasion, setadir so fami spiritiel, sa kapav fer li realize seki li’nn perdi. Sirman li rapel lepok kot li ti ena bann bon relasion avek Zeova ek so bann frer ek ser. Sa bann bon souvenir-la ek bann move konsekans,  kapav fer li realize ki seki li’nn fer bien grav.

Pou ki disiplinn-la prodir bann bon rezilta, li bien inportan ki nou ena lamour ek nou ferm anver sa dimounn-la. Lerwa David ti dir: “Si enn dimounn drwat bat mwa, sa montre so lamour fidel,” ek “si li koriz mwa, sa pou koumadir delwil lor mo latet.” (Ps. 141:5) Anou pran enn lexanp: Mazinn enn kikenn ki pe manze, ek enn sel kout enn gro bout laviann tas dan so lagorz. Li koumans toufe, li pa kapav fer nanye. Anplis, li pa kapav mem koze. Si personn pa ed li deswit, li kapav mor. Erezman, enn kamarad trouv sa sitiasion-la. Li koumans tap li for lor so ledo pou fer sa bout laviann-la sorti. Mem si sa bann kout-pwin-la fer li gagn dimal, sa kapav sap so lavi. Li parey pou David. Li ti rekonet ki mem si enn zour enn dimounn drwat bizin donn li enn bon koreksion, sa pou enn dibien pou li.

Dan boukou ka, kan enn Kretien exkli, se sa disiplinn lamem ki li bizin pou li repanti. Rapel garson Julian ki ti site dan koumansman. Anviron di-z-an apre, li’nn pirifie so lavi, li’nn retourn dan kongregasion ek asterla li enn ansien. Li rekonet: “Kan mo’nn exkli, mo’nn bizin fer fas ar bann konsekans mo move lavi. Se sa kalite disiplinn lamem ki mo ti bizin.”—Ebre 12:7-11.

Kan exkli enn dimounn se enn sitiasion bien tris. Me fode pa nou fer sa sitiasion-la vinn pli pir ankor. Sakenn parmi nou bizin fer so par pou ki sa disiplinn-la fer so travay.

Bann ansien fer zefor pou imit lamour Zeova kan zot bizin inform enn dimounn ki li’nn exkli. Avek lamour, zot explik li dan enn fason kler ki bann pa li bizin fer pou reintegre. Regilierman zot vizit bann exkli ki montre vremem zot pe sanze ek rapel zot ki bann pa zot bizin fer pou retourn ver Zeova. *

Fami sa dimounn ki’nn exkli la montre lamour pou li ek pou kongregasion kan zot respekte desizion ki’nn pran. Julian dir: “Li ti touzour mo garson, selman fason ki li ti pe amenn so lavi ti met enn baryer ant nou.”

Tou bann manb kongregasion montre zot lamour kan zot koup tou kontak avek dimounn ki’nn exkli la. (1 Kor. 5:11; 2 Zan 10, 11) Koumsa, zot montre ki zot soutenir disiplinn ki Zeova inn donn li par mwayin bann ansien. Anplis, fode pa ki fami sa dimounn-la santi ki koumadir zot’si zot inn exkli. Bann manb kongregasion pou montre plis lamour anver sa fami-la ek pou soutenir zot parski zot soufer boukou akoz sa sitiasion-la.—Rom. 12:13, 15.

Julian dir: “Dispozision pou exkli enn dimounn, se enn dispozision ki nou bien bizin, enn dispozision ki permet nou viv an-akor avek bann prinsip Zeova. Li fer lapenn. Me avek letan li amenn bann bon rezilta. Si mo ti toler move kondwit mo garson, kitfwa zame li ti pou retourne.”