Bann spesialis lasante mantal dir ki bann dimounn bizin bann kitsoz spiritiel pou ki zot vremem ere. Nou trouv sa par bann kitsoz ki bann dimounn anvi fer pou donn zot lavi enn sans, kouma par exanp servi enn kikenn ki pli siperyer ki zot ouswa form parti dan enn mouvman. Pou satisfer sa bezwin-la, sertin konsakre zot letan lib ar lanatir, art, lamizik, ek lezot kitsoz ankor. Pourtan, laplipar parmi zot pa reisi gagn enn satisfaksion ki dire.

Pou bann ki lir Labib, sa pa etonn zot ki bann dimounn inn ne avek dezir pou rod bann kitsoz spiritiel. Bann premie sapit dan Genèse montre ki, apre ki Bondie ti kree premie koup imin, souvan Li ti koz avek zot pou ki zot etabli enn relasion spiritiel avek Li. (Genèse 3:8-10) Bondie pa finn kree bann imin dan enn fason pou viv san Li; zot ena enn bezwin pou kominik avek zot Kreater. Souvan Labib koz lor la.

Par exanp, Jésus ti dir: “Ere bann ki rekonet ki zot pov lor plan spiritiel.” (Matthieu 5:3) Par sa bann parol-la, nou kapav dir ki, pou nou ena enn lavi ere ek konble, nou bizin satisfer dezir ki nou ena pou konn Bondie. Kouma nou kapav fer sa? Jésus ti donn nou repons-la kan li ti dir: “Enn dimounn bizin viv, pa zis avek dipin, me avek tou parol ki sorti dan labous Jéhovah.” (Matthieu 4:4) Dan ki fason bann parol Bondie, setadir bann panse ek bann linstriksion Bondie ki ena dan Labib, ed nou pou ena enn lavi ki ere ek ki ena sans? Anou examinn trwa fason prinsipal.

Zordi, ena boukou exper ek spesialis ki pre pou donn bann konsey lor bann relasion, lamour, lavi fami, kouma pou reazir kan ena bann dezakor, boner, ek mem lor vre sans lavi. Selman, kisannla ki pli kalifie pou donn nou bann bon konsey dan tou sa bann domenn-la apart Jéhovah, sa Kikenn ki’nn fer nou la?

Anou pran enn lexanp: Kan ou aste enn nouvo laparey, kouma enn camera ouswa enn computer,  ou atann pou gagn enn liv ansam avek li, kot explike kouma pou bien servi sa laparey-la pou ki ou satisfe ar li. Nou kapav konpar Labib ar sa liv-la. Bondie, sa Kikenn ki’nn fer nou la, inn donn nou Labib kouma enn gid dan nou lavi. Parey kouma enn liv explike ki fonksion enn laparey ena ek kouma pou servi sa laparey-la pou gagn bann pli bon rezilta, Labib osi ena mem lobzektif.

Bann linstriksion ki ena dan sa liv-la ed bann dimounn kone kouma pou servi zot laparey pou ki li pa kase. Li parey, bann linstriksion ki ena dan Labib met bann dimounn ki lir li angard kont bann pratik ki kapav detrir zot lavi. Bann konsey ouswa bann sime-koupe ki lezot done kapav paret atiran, ouswa mem pli fasil pou swiv. Me eski li pa lozik pou panse ki nou pou gagn bann pli bon rezilta ek evit bann problem si nou swiv bann direksion ki sa Kikenn ki’nn fer nou la done?

Mem si Jéhovah donn nou bann direksion ek bann linstriksion, Li pa fors nou pou aksepte zot. Okontrer, parski Li anvi fer nou dibien, avek lamour Li ankouraz nou: “Mwa, Jéhovah, momem to Bondie, momem ki ansegn twa pou to profi, momem ki fer twa mars lor sime kot to bizin marse. A! Si selman to ti pran kont mo bann komannman! Lerla to lape ti pou vinn parey kouma enn larivier, ek to lazistis parey kouma bann vag lamer.” (Isaïe 48:17, 18) An de-trwa mo, si nou swiv direksion Bondie, nou pou viv bien. Savedir, pou viv bien ek ere, nou bizin Bondie.

Sertin panse ki zot pa bizin Bondie parski zot pa konpran kouma enn Bondie ki ena lamour kapav permet sertin kitsoz. Par exanp, kitfwa zot demande: ‘Kifer bann bon dimounn bizin soufer?’ ‘Kifer sertin tibaba inosan ne andikape?’ ‘Kifer lavi inzis koumsa?’ Ofet, se bann kestion bien inportan, ek kan nou gagn bann bon repons pou sa bann kestion-la, sa kapav ena enn gran lefe lor nou lavi. Me olie ki vit-vit nou blam Bondie pou bann problem, anou gete kouma Parol Bondie, Labib, kapav ekler nou lor sa size-la.

Dan Genèse sapit trwa, nou trouve kouma Satan ti fer premie koup imin dezobeir komannman Jéhovah. Li ti servi enn serpan pou tant zot pou manz frwi lor pie konesans bon ek move. Satan ti dir Ève: “Zot pa pou mor zot. Bondie kone ki zour ki zot manz sa frwi-la, zot lizie vremem pou ouver, ek vremem zot pou vinn kouma Bondie, zot pou konn seki bon ek seki pa bon.”​—Genèse 2:16, 17; 3:4, 5.

Par sa bann parol-la, Satan pa finn zis dir ki Bondie enn manter, me li finn osi pretann ki fason ki Bondie dirize li inzis. Lediab finn osi afirme ki si bann dimounn ekout li, bann kitsoz pou mars pli bien pou zot. Kouma ti pou reponn sa bann lakizasion-la? Jéhovah ti swazir pou les letan pase pou ki zot tou kapav trouve si sa bann lakizasion Satan la ti vre ouswa fos. An realite, Bondie ti pe donn Satan ek bann ki’nn al dan so kote lokazion pou  montre si vremem bann dimounn kapav viv bien san Bondie.

Konsernan lakizasion Satan, ki ou ti pou reponn? Eski bann dimounn kapav viv bien ek reisi diriz zotmem san led Bondie? Kan nou get soufrans, linzistis, maladi, lamor, laviolans, degradasion lor plan moral, lager, zenosid, ek lezot move kitsoz ki bann dimounn pe kone depi plizir siek, pena dout se bann prev ki zefor ki bann dimounn inn fer pou diriz zot par zotmem pa’nn reisi. Olie li blam Bondie pou tou bann maler ki bann dimounn pe kone, Labib donn enn rezon prinsipal kifer dimounn soufer: “Dimounn finn dominn dimounn pou zot prop maler.”​—Ecclésiaste 8:9.

Dapre seki nou’nn gete, eski li pa kler ki nou bizin tourn nou ver Bondie pou gagn repons ek solision pou bann kestion ki pe trouble bann dimounn? Ki Bondie pou fer?

Depi lontan bann dimounn pe atann kan zot pou libere ar maladi, vieyes, ek lamor. Zot finn pas boukou letan, finn fer boukou zefor, ek finn depans boukou resours pou ki zot libere ar sa bann kitsoz-la, me zot pa’nn gagn bann gran rezilta. Sertin ti panse ki zot ti pou libere ar sa bann kitsoz-la gras-a bann posion mazik ki ti pou fer zot viv pli lontan, enn lafontenn ki so delo ti pou fer zot revinn zenn, enn pei kot ena labondans, ek lezot mwayin ankor. Me tou zot lespwar inn tom dan delo.

Bondie anvi ki bann dimounn viv bien ek ere. Se seki Li ti anvi o-komansman kan Li ti kree bann dimounn, ek Li pa’nn bliye so proze. (Genèse 1:27, 28; Isaïe 45:18) Jéhovah donn nou garanti ki tou seki Li dir pou vremem realize. (Isaïe 55:10, 11) Premie koup imin inn perdi Paradi ki Bondie ti donn zot, me Labib dir nou ki Bondie pou refer later vinn kouma li ti ete o-komansman. Dan dernie liv Labib, nou trouv sa bann parol-la: “Li [Jéhovah] pou souy tou larm dan zot lizie, ek lamor nepli pou existe. Dimounn nepli pou an-dey, zot nepli pou plore ek nepli pou ena douler. Bann kitsoz ki ti ena avan finn disparet.” (Révélation 21:4) Kouma Bondie pou amenn sa bann kondision extraordiner la, ek kouma nou kapav gagn bann bienfe gras-a sa promes-la?

Jésus Christ, Garson Bondie, ti ansegn so bann disip pou priye pou ki volonte Bondie fer. Boukou dimounn konn bien ouswa mem souvan repet lapriyer ki sertin apel Notre Père. Dan sa lapriyer-la, nou lir: “Nou Papa ki dan lesiel, ki to nom sanktifie. Ki to rwayom vini. Ki to volonte fer lor later parey kouma dan lesiel.” (Matthieu 6:9, 10) Wi, Jéhovah pou servi So Rwayom pou eliminn tou bann move konsekans ki bann gouvernman imin inn amene ek pou etabli lemond nouvo kot pou ena lazistis ki Li’nn promet. a (Daniel 2:44; 2 Pierre 3:13)  Ki nou bizin fer pou gagn bann bienfe ar promes Bondie?

Jésus Christ montre ki letap bien sinp nou bizin fer. Li dir: “Samem ki vedir lavi eternel: zot bizin aprann konn twa, sel vre Bondie, ek osi Jésus Christ ki to finn avoye.” (Jean 17:3) Pena dout, avek led Bondie li pou posib ki nou viv pou touletan dan lemond nouvo. Eski sa lesperans-la pa donn ou enn lot rezon pou reponn wi pou kestion: Eski nou bizin Bondie?

Inn gagn de mil an, dan l’Aréopage ouswa Colline Mars, dan Athènes, kan lapot Paul ti pe koz avek bann dimounn ki ti res laba ek ki ti ena enn lespri ouver, li ti dir konsernan Bondie: “Se Li ki donn tou dimounn lavi ek souf ek tou kitsoz. Parski se par Li ki nou ena lavi, nou bouze ek nou existe. Li parey inpe seki sertin zot bann poet finn dir: ‘Nou so bann zanfan.’”​—Actes 17:25, 28.

Seki Paul ti dir bann dimounn dan Athènes aplike ar nou osi. Nou Kreater donn nou ler ki nou respire, manze ki nou manze, ek delo ki nou bwar. Jéhovah donn nou sa bann bon kitsoz-la pou nou kapav kontign viv. Me kifer Bondie finn kontign donn tou dimounn sa bann kitsoz-la, mem si zot pans Li ouswa non? Paul ti dir se “pou ki bannla rod Bondie, ek si zot tat-tate pou rod Li ek vremem zot trouv Li, parski an realite, Li pa lwin ar sakenn parmi nou.”​—Actes 17:27.

Eski ou ti pou kontan konn Bondie pli bien, setadir aprann plis lor so proze ek bann konsey ki Li donn nou pou viv pli bien depi asterla mem ek pou touletan? Si wi, nou ankouraz ou pou koz avek sa dimounn ki’nn kit sa magazinn-la avek ou ouswa pou kontakte bann ki’nn pibliye sa magazinn-la. Zot pou kontan pou ed ou.