Eski ou pa pou dakor ki si enn sosiete koronpi, ninport ki gouvernman ki trouv dan sa sosiete-la li’si li pou koronpi? Dan sa ka-la, pou gagn enn gouvernman ki pa koronpi, fode pa li sorti dan sa sosiete-la. Labib montre ki ena enn gouvernman koumsa​—Rwayom Bondie, ek Zezi ti ansegn so bann disip pou priye pou sa gouvernman-la.​—Matie 6:9, 10.

Rwayom Bondie se enn vre gouvernman ki trouv dan lesiel. Li pou ranplas tou bann gouvernman imin. (Psom 2:8, 9; Revelasion 16:14; 19:19-21) Enn parmi bann benediksion ki sa Rwayom-la pou amene se, li pou eliminn koripsion ki ena dan bann gouvernman. Anou get sis karakteristik sa Rwayom-la ki donn nou sa garanti-la.

PROBLEM-LA: Se bann sitwayen ki finans bann gouvernman. Laplipar di-tan zot fer sa kan zot pey tax. Avek tou sa bann kas ki rantre la, sa pous sertin reprezantan politik pou kokin, ek lezot aksepte gous ar bann dimounn ki rod pey mwins tax ouswa lezot peyman ki zot dwa gouvernman. Ki konsekans sa ena? Gouvernman ogmant tax pou kouver sa bann lapert-la, ek an retour sa ankouraz plis koripsion. Dan enn sitiasion koumsa, se bann dimounn onet ki pli soufer.

SOLISION-LA: Rwayom Bondie inn gagn pouvwar ar Bondie tou-pwisan, Zeova. a (Revelasion 11:15) Li  pa bizin ramas tax pou pey so bann depans. Okontrer, Bondie ena enn “lafors ki inpresionan” ek enn gran zenerozite, ek sa donn lasirans ki Rwayom Bondie pou donn tou so bann sitwayen seki zot bizin an-abondans.​—Izai 40:26; Psom 145:16.

PROBLEM-LA: Susan Rose-Ackerman, ki nou ti mansione dan lartik avan, dir ki zefor pou eliminn koripsion “bizin koumans depi lao.” Kan bann gouvernman esey eliminn koripsion parmi bann lapolis ouswa bann ofisie ladwann me zot toler sa parmi bann politisien, sa fer zot perdi valer devan lizie bann sitwayen. Ek mem si enn dirizan ena boukou prinsip, li touzour inparfe. Kouma Labib dir, “lor sa later-la, pena enn zom ki zis, ki fer touletan seki bien ek pa fer pese.”​—Ekleziast 7:20.

SOLISION-LA: Zezi Kris, ki Bondie inn swazire kouma Dirizan sa Rwayom-la, pa inparfe kouma bann dimounn, alor pa kapav tant li pou fer seki move. Zezi ti montre sa kan li pa’nn aksepte pli gro gous ki’nn ofer li​—“tou bann rwayom lor later [ek zot laglwar, NW].” Satan Lediab, sef sa lemond-la, ti promet pou donn Zezi tousala si li ti ador li zis enn fwa. (Matie 4:8-10; Zan 14:30) Mem kan ti pe tortir Zezi pou li mor, li ti bien deside pou gard so lintegrite. Li’nn refiz pran enn ladrog ki ti pou anpes li santi douler ek kitfwa nepli konsian seki ti pe ariv li. (Matie 27:34) Asterla ki li’nn mont dan lesiel akote Bondie, Zezi inn montre ki li bien kalifie pou dirize dan Rwayom Bondie.​—Filipien 2:8-11.

PROBLEM-LA: Boukou pei souvan fer bann eleksion ki an prinsip permet bann dimounn vot kont bann politisien koronpi. Me an realite, sa bann kanpagn-la ek sa bann eleksion-la favoriz koripsion, mem dan bann pei swadizan devlope. Gras-a bann kontribision ek bann lezot aksion ki bann dimounn ris fer pandan sa bann kanpagn-la, zot kapav ena enn gran linflians lor bann reprezantan gouvernman ki pe dirize ouswa ki pou dirize.

John Paul Stevens, enn ziz dan Lakour Siprem l’États-Unis, ti ekrir ki sa bann linflians-la pa zis afekte “drwa ki sa gouvernman-la ena pou dirize ek so pozision, me li osi afekte konfians ki bann dimounn ena dan sa gouvernman-la.” Alor, sa pa vremem sok nou kan bann dimounn partou lor later panse ki parmi tou bann institision, se politik ki pli koronpi.

SOLISION-LA: Kan Rwayom Bondie pou dirize, pa pou ena okenn posibilite fer frod pandan bann kanpagn elektoral ouswa bann eleksion parski sa Rwayom-la li stab, setadir li pou regne pou touletan. (Daniel 7:13, 14) Se Bondie ki’nn swazir Dirizan sa Rwayom-la, alor sa Rwayom-la pa depann lor vot bann dimounn ek bann dimounn pa pou kapav ranplas li par enn lot. Parski li pou enn  gouvernman ki stab, sa rasir bann dimounn ki so bann desizion pou touletan dan zot lintere ek ki sa pou dir lontan.

PROBLEM-LA: O-koumansman, ou kapav panse ki si enn gouvernman tir bann nouvo lalwa sa kapav amelior bann sitiasion. Selman, bann exper inn trouve ki dan boukou ka, kan ogmant bann lalwa, sa ankouraz plis koripsion. Anplis, souvan sa kout ser pou fer bann dimounn aplik bann lalwa ki’nn etabli spesialman pou diminie koripsion, me pourtan sa pa amenn bann gran sanzman.

SOLISION-LA: Bann lalwa Rwayom Bondie zot boukou pli siperyer ki lalwa bann gouvernman imin. Par exanp, olie ki Zezi ti fer enn long lalis bann kitsoz ki bizin fer ouswa ki bizin pa fer, li ti donn enn prinsip. Li ti dir: “Alor tou seki zot anvi ki lezot fer pou zot, fer parey pou lezot osi.” (Matie 7:12) Seki pli inportan, bann lalwa Rwayom Bondie met laksan lor bann mobil ek bann aksion toule-de. Zezi ti dir: ‘To bizin kontan to prosin kouma tomem.’ (Matie 22:39) Pena dout, Bondie, ki kapav lir dan leker, kapav fer bann dimounn aplik sa bann lalwa-la.​—1 Samiel 16:7.

PROBLEM-LA: Seki pous bann dimounn pou vinn koronpi, se dezir pou gagn plis ek pou rod zot prop lintere. Souvan bann reprezantan gouvernman ek bann sitwayen ena sa bann defo-la. Par exanp, konsernan sa magazin ki ti kraze dan Séoul la, ki nou ti mansione dan lartik avan, sertin reprezantan gouvernman ti aksepte gous ar bann kontrakter. Sa bann kontrakter-la ti kone ki si zot donn gous, sa ti pou kout zot mwin ser ki servi bann bon materyo ek respekte bann teknik konstriksion.

Alor, pou eliminn koripsion, bizin ansegn bann dimounn kouma pou eliminn zot bann move dezir, kouma par exanp lanvi pou gagn plis ek zot bann tandans egois. Parkont, bann gouvernman pa vremem anvi ek zot pena kapasite pou fer bann dimounn aplik sa kalite lansegnman-la.

 SOLISION-LA: Rwayom Bondie eliminn koripsion depi so rasinn mem kan li ansegn bann dimounn kouma pou sirmont bann move tandans ki pous zot pou fer sa. b Sa lansegnman-la ed zot pou “renouvle zotmem dan lafors ki motiv zot lespri.” (Efezien 4:23, NW) Zot aprann pou ranplas zot bann dezir pou gagn plis ek tandans egois par kontantman ek pou interes zot ar lezot.​—Filipien 2:4; 1 Timote 6:6.

PROBLEM-LA: Mem si zot pe viv dan pli bon lanvironnman ki ena ek si zot pe gagn meyer ledikasion lor plan moral, sertin dimounn pou swazir pou res malonet ek koronpi. Plizir exper rekonet ki se akoz sa ki bann gouvernman pa kapav eliminn koripsion. Bann gouvernman zis espere ki zot kapav diminie koripsion ek bann move konsekans ki li amene.

SOLISION-LA: Convention des Nations Unies contre la corruption dir ki pou lit kont koripsion, bann gouvernman bizin ankouraz bann dimounn pou vinn “integ, onet ek responsab.” Mem si sa li enn bon lobzektif, Rwayom Bondie li, li pa zis ankouraz so bann sitwayen pou ena sa bann kalite-la, me li atann ki zot manifeste sa bann kalite-la. Labib dir ki bann “ki touzour anvi gagn plis [NW]” ek “bann manter” pa ranpli kondision pou erit Rwayom Bondie.​—1 Korintien 6:9-11; Revelasion 21:8.

Bann dimounn kapav aprann pou viv an-akor avek sa bann prinsip-la, parey kouma bann premie Kretien ti fer. Par exanp, kan enn disip ki apel Simon ti rod aste lespri sin ar bann zapot, zot ti refiz so kas ek zot ti dir li: “Sanz to move lintansion.” Kan Simon ti trouv konsekans ki so move dezir ti kapav ena, li ti demann bann zapot pou priye pou ki li kapav sanze.​—Zistwar Bann Apot 8:18-24.

Ninport ki ou nasionalite, ou ena posibilite pou vinn enn sitwayen Rwayom Bondie. (Zistwar Bann Apot 10:34, 35) Program lansegnman ki Rwayom Bondie pe ofer partou lor later pou montre ou ki ou bizin fer. Bann Temwin Zeova pou kontan pou montre ou kouma zot kour Biblik gratis deroule. Sa kour-la kapav pran minimum dis minit par semenn. Par exanp, ou pou aprann plis lor “bonn nouvel Rwayom Bondie,” parmi ou pou trouve kouma sa Rwayom-la pou eliminn koripsion dan gouvernman. (Lik 4:43) Nou invit ou pou kontakte bann Temwin Zeova dan ou landrwa, ouswa pou al lor sit jw.org/mfe.