Parey kouma Alex, boukou dimounn pa kontan travay dir zordi. Aaron, enn mekanisien loto, explike: “Boukou dimounn panse ki zot pa merite fer enn travay ki pou ‘rabes’ zot. Zot ena sa mantalite-la: ‘Mo pe fer sa travay-la ziska ki mo gagn enn lot ki pli bon.’”

Kifer boukou dimounn panse ki travay dir se pa pou zot? Kitfwa bann media finn inflians zot fason panse. Bann media fer dimounn krwar ki lavi “parfe” vedir viv dan lix ek gagn boukou fasilite. Matthew, ki travay dan mintenans, explike: “Bann dimounn krwar ki plis ou travay dir pou gagn seki ou bizin, mwins ou reisi dan ou lavi.” Shane, enn caretaker, inn trouv sa tandans-la bien. Li dir: “Bann dimounn nepli travay kantite ki pey zot.”

Me enn lot kote, boukou dimounn ki’nn reisi dan zot lavi, kontan travay dir. Daniel ena 25 an ek li travay dan konstriksion. Li dir: “Li vo lapenn pou travay dir sirtou kan travay-la ena enn rapor direk avek bann lobzektif ki ena sans.” Andre, ki ena 23 an, bien dakor avek sa lide-la. Li dir: “Mo panse ki travay ena enn rapor avek lazwa ek satisfaksion. Travay mwins pa pou rann lavi enn dimounn pli ere. Okontrer sa pou rann so lavi pli monotonn!”

Kouma bann dimounn kouma Daniel ek Andre finn devlop enn latitid pozitif konsernan travay dir? Li bien sinp. Zot finn aplik bann prinsip Labib dan zot lavi. Labib pa dekouraz nou pou travay dir. Okontrer, li ankouraz nou pou fer sa ek pou persevere. Me Labib pa zis dir nou travay. Li montre nou osi kouma nou kapav kontan nou travay.

Ki bann prinsip Labib kapav fer ou gagn satisfaksion dan ou travay? Nou invit ou pou konsider sertin prinsip Labib dan prosin lartik.