LANWIT ti pe koumans tonbe ek Zozef ti pe debout dan so zardin. Li posib ki li ti pe get bann pie dat ek lezot pie frwi, bann basin delo kot ti ena bann plant, ek zis lot kote miray, li ti pe trouv enn parti pale Faraon. Mazine ki depi kot li ete, Zozef pe tann seki pe pase dan so lakaz; so garson Manase pe fer so frer Efraim, ki ankor tibaba, riye. Zozef ti kapav devine seki ti pe pase andan, so madam pe riye kan li trouv so bann zanfan pe zwe. Zozef fer enn sourir. Li ti kone ki Bondie inn bien beni li.

Zozef ti apel so premie garson Manase parski sa nom-la sinifi “Sa Kikenn Ki Fer Bliye La.” (Zenez 41:51) Pena dout ki bann benediksion ki Bondie inn fer Zozef gagne sa bann dernie lane la, inn soulaz inpe soufrans ki li ti pe resanti kan li pans so fami, so bann frer, ek so papa. Laenn ki so bann gran frer ti ena pou li finn sanz so lavi. Zot finn atak li, zot finn pans pou touy li, ek apre zot ti vann li kouma esklav avek bann marsan. Depi sa, finn ena bann gran sanzman enn apre lot dan so lavi. Pandan anviron douz an, li’nn soufer kouma esklav ek apre ti’nn met li dan prizon​—pandan enn sertin tan ti atas li avek lasenn. Me asterla, get ki li’nn vini​—deziem dirizan apre Faraon dan Lezip, enn nasion pwisan! a

Pandan plizir lane, Zozef inn trouv bann levennman realize parey kouma Zeova ti anonse. Lezip ti dan so setiem lane labondans parey kouma ti profetize ek se Zozef ki ti kontrol travay pou stok bann sereal ki Lezip inn prodir anplis. Pandan sa letan-la, li’nn okip so de garson avek so madam, Asnat. Malgre sa, souvan li ti pans so fami ki ti res plizir santenn kilomet pli lwin​—sirtou so ti frer, Binzamin, ek zot papa Zakob, ki li bien kontan. Kitfwa Zozef ti pe demann limem si zot bien ek an sekirite. Kitfwa li ti osi demann li si so bann gran frer ti ankor violan ek si enn zour li pou kapav fer lape avek zot ek revinn enn sel kouma avan.

Si zalouzi, trayizon ouswa laenn inn deza trouble lape dan ou fami, alor ou ena enn kitsoz an komin avek Zozef. Ki nou kapav aprann ar lafwa Zozef par fason ki li’nn tret so fami?

Zozef ti bien okipe pandan sa bann zour-la, ek bann lane ti pas bien vit. Parey kouma Zeova ti anonse dan rev ki Li ti fer Faraon gagne, ti ena enn gran sanzman apre setiem lane kot ti ena sereal an abondans. Rekolt pa ti bon! Bien vit finn koumans ena lafaminn dan tou bann pei alantour. Me kouma Labib dir: “Partou dan Lezip ti ena dipin.” (Zenez 41:54) Pena dout ki prediksion Zozef, ki ti inspire par Bondie, ek bon fason ki li ti siperviz stokaz ek lavant bann sereal ti fer bann Ezipsien gagn bann bienfe.

Kitfwa bann Ezipsien ti panse ki zot ena enn det anver Zozef ek ti felisit li pou so bon organizasion. Malgre sa, Zozef pa ti anvi ki sa laglwar-la al pou enn lot kikenn apart so Bondie, Zeova.  Si nou servi bann kapasite ki nou ena dan ninport ki servis pou Bondie, Li kapav permet nou servi sa bann kapasite-la dan fason ki zame nou’nn panse avan.

Me avek letan, bann Ezipsien osi ti resanti lafaminn. Kan zot ti rod led ar Faraon, li ti zis dir zot: “Al get Zozef, ek fer tou seki li dir zot.” Lerla Zozef ti koumans ouver bann grenie kot ti gard bann sereal ki anplis, ek bann dimounn ti kapav aste seki zot bizin.​—Zenez 41:55, 56.

Me dan bann pei alantour, bann dimounn pa ti ena sa sans-la. Plizir santenn kilomet pli lwin dan Kanaan, fami Zozef ti pe soufer. Zakob ki ti vie ti’nn tann dir ki ena sereal dan Lezip, alor li ti demann so bann garson pou al laba pou al aste manze.​—Zenez 42:1, 2.

Zakob ti avoy dis so bann garson me pa seki pli zenn la, Binzamin. Zakob ti rapel bien lepok kot li ti avoy Zozef, so garson ki li ti bien kontan, tousel pou al vizit so bann gran frer. Samem dernie fwa ki Zakob ti trouv so garson. So bann gran garson ti amenn zoli manto Zozef lakaz, desire ek ranpli ar disan. Sa manto-la ti montre lamour ek konsiderasion ki Zakob ti ena pou Zozef. Zot ti fer Zakob, ki ti extra tris, krwar ki bann zanimo sovaz ti manz Zozef.​—Zenez 37:31-35.

Apre enn long vwayaz, bann garson Zakob ti ariv Lezip. Kan zot ti demande kot zot kapav aste sereal, ti amenn zot kot enn gran fonksioner ki apel Safnat-panea. (Zenez 41:45) Kan zot ti trouv sa fonksioner-la, eski zot ti kone Zozef sa? Non. Zot ti zis trouv enn dirizan Ezipsien ki ena enn gran pozision ek zot ti bizin so led. Pou montre respe, zot ti fer seki ti bizin: Zot “ti prostern devan li ek ti bes zot latet anba.”​—Zenez 42:5, 6.

Ki nou kapav dir lor Zozef? Li, deswit li ti rekonet so bann frer! Anplis, kan li ti trouv zot prostern devan li, li ti repans so lanfans. Labib dir nou ki “Zozef deswit ti rapel bann rev” ki Zeova ti fer li gagne kan li ti ankor zanfan. Sa bann rev-la ti anons enn lepok kot so bann frer ti pou prostern devan li​—exakteman kouma zot ti pe fer! (Zenez 37:2, 5-9; 42:7, 9) Ki Zozef ti pou fer? May zot? Tir vanzans?

Zozef ti kone ki fode pa li azir lor enn koudtet, malgre seki zot ete. Li kler ki Zeova ti pe diriz sa bann levennman-la dan enn fason extraordiner. Sa ti konsern So proze. Li ti’nn promet ki Li pou fer desandans Zakob vinn enn gran nasion. (Zenez 35:11, 12) Me si so bann frer ti ankor violan, egois, ek san pitie, plitar sa ti pou kapav ena bann move konsekans! Anplis, si Zozef ti azir lor enn koudtet, kitfwa sa ti kapav afekte stabilite so fami, kitfwa mem met lavi so papa ek Binzamin an danze. Zisteman, eski zot ti ankor vivan? Zozef ti desid pou kasiet so lidantite pou li kapav teste so bann frer ek gete ki kalite dimounn zot inn vini. Lerla kitfwa li ti pou kone seki Zeova anvi li fer.

 Kitfwa zame ou pou trouv ou dan enn sitiasion koumsa. Selman, azordi, souvan ena bann tirayman ek divizion dan lafami. Kan nou pe pas dan sa bann sitiasion-la, nou kapav ena tandans pou ekout nou leker ek azir dapre nou bann santiman ki inparfe. Me li pli saz ki nou imit Zozef ek esey kone kouma Bondie anvi nou regle sa bann sitiasion-la. (Proverb 14:12) Rapel ki parey kouma li inportan nou fer lape avek bann manb nou fami, li ankor pli inportan ki nou anpe avek Zeova ek so Garson.​—Matie 10:37.

Zozef ti desid pou teste so bann frer dan plizir fason ek sa ti pou revel seki bannla ete dan pli profon zotmem. Pou koumanse, li ti koz avek zot dan enn fason brit, atraver enn interpret. Li ti akiz zot ki zot ti bann espion etranze. Pou defann zot, so bann frer ti koz ar li lor zot fami. Ek zot ti osi dir Zozef ki zot ena enn ti frer ki’nn res lakaz ek samem ti linformasion pli inportan pou Zozef. Li ti esey kasiet so kontantman. Eski so ti frer ti vremem vivan? Lerla, Zozef ti kone ki li pou fer apre. Li ti dir: “Ala kouma pou teste zot,” ek apre sa li ti dir zot ki li bizin trouv zot dernie frer. Alafin, li ti dakor pou les zot retourn kot zot pou al sers zot dernie frer, akondision ki enn parmi zot aksepte res an otaz.​—Zenez 42:9-20.

Letan so bann frer ti pe diskit lor sa sitiasion-la ant zot, zot pa ti kone ki Zozef ti pe konpran seki zot ti pe dir ek zot ti pe blam zotmem pou sa pese bien grav ki zot ti fer 20 an avan la. Zot ti dir: “Pena dout ki pe pini nou akoz seki nou’nn fer nou frer, parski nou’nn trouv so soufrans kan li ti pe sipliy nou pou montre konpasion, me nou pa’nn ekoute. Akoz sa nou pe konn sa soufrans-la.” Zozef ti kone lor ki kitsoz zot ti pe koze, ek li ti bizin vir enn kote pou zot pa trouv so bann larm. (Zenez 42:21-24) Selman, li ti kone ki vre repantans pa inplik zis regret konsekans bann move aksion. Alor li ti kontign teste zot.

Li ti dir zot retourn kot zot ek li ti gard Simeon kouma prizonie. Li ti osi fer kasiet kas dan zot bann sak manze ki zot ti pe amenn kot zot. So bann frer ti retourn lakaz ek avek boukou difikilte ti reisi konvink Zakob pou les Binzamin, garson ki li ti bien kontan, al avek zot Lezip. Kan zot ti ariv Lezip, onetman zot ti dir administrater Zozef ki zot inn trouv kas dan zot sak, ek zot ti propoz pou ranbours som-la net. Zot aksion ti merit felisitasion, me Zozef ti anvi konn plis ankor ki kalite dimounn zot ti ete vremem. Li ti fer enn gran repa pou zot, ek li pa ti pe kapav vremem kasiet ki kantite li ti kontan kan li’nn trouv Binzamin. Apre sa, li ti dir zot retourn kot zot ek ankor enn fwa li ti donn zot enn kantite manze, me sann fwa-la, li ti’nn fer kasiet enn koup an arzan dan sak Binzamin.​—Zenez 42:26–44:2.

Lerla Zozef ti al delavan avek so plan. Li ti fer enn Ezipsien pourswiv so bann frer, aret zot, ek akiz zot ki zot inn kokin sa koup-la. Kan ti gagn sa koup-la dan sak Binzamin, ti reamenn zot tou kot Zozef. Asterla Zozef ti pou gagn lokazion kone vremem ki kalite dimounn so bann frer ti ete. Se Zida ki ti koz pou zot tou. Li ti sipliy Zozef pou ena mizerikord anver zot. Li ti mem propoz ki toule 11 vinn esklav dan Lezip. Selman Zozef li, li ti deside ki zis Binzamin tousel res dan Lezip kouma esklav me ki lezot ale.​—Zenez 44:2-17.

Sa ti pous Zida pou fer enn diskour bien tousan. Zida ti dir: “Se sel garson ki reste pou so mama, ek so papa kontan li.” Sa bann parol-la sirman ti bien tous Zozef. Zozef ti gran garson Rasel, Zakob so madam ki li ti bien kontan ek ki ti mor kan li ti gagn Binzamin. Parey kouma so papa, li kler ki Zozef osi ti ena bann bon souvenir lor Rasel. Ek kitfwa se akoz sa relasion-la ki Zozef ti pli atase ar Binzamin.​—Zenez 35:18-20; 44:20.

Zida ti sipliy Zozef pou pa gard Binzamin kouma esklav. Li ti mem propoz pou vinn esklav dan plas Binzamin. Alafin, li ti sipliy Zozef par sa bann parol bien tris-la: “Kouma mo kapav retourn kot mo papa san sa garson-la avek mwa? Mo pa pou kapav mem gete kan sa maler-la ariv  mo papa!” (Zenez 44:18-34) Sa ti enn prev ki Zida inn sanze. Li pa ti zis montre ki li’nn repanti, me li ti osi montre dan enn sertenn fason ki li ti kapav konpran lezot, li pa ti egois, ek ki li ti ena konpasion.

Zozef ti nepli kapav siport sa. Li ti bizin liber bann santiman ki li ti pe garde andan. Apre ki li ti fer tou so bann serviter ale, li ti plor telman for ki ti kapav tann li ziska dan pale Faraon. Finalman li ti revel so lidantite: “Momem Zozef zot frer.” Li ti may so bann frer ki ti’nn gagn sok ek avek bonte li ti pardonn zot pou tou seki zot ti’nn fer li. (Zenez 45:1-15) Koumsa li ti imit Zeova ki pre pou pardone avek tou So leker. (Psom 86:5) Eski nou’si nou fer parey?

Kan Faraon inn kone kifer ti ena tou sa azitasion-la dan lakaz Zozef, li ti propoz Zozef pou fer so papa, ki’nn rant dan laz, pou vinn res Lezip ansam avek tou so fami. Alor, sa pa’nn pran boukou letan avan ki Zozef retrouv so papa ki li ti bien kontan. Zakob ti plore ek ti dir: “Asterla mo kapav mor; mo’nn trouv to figir ek mo kone ki to ankor vivan.”​—Zenez 45:16-28; 46:29, 30.

Zakob ti viv ankor 17 an dan Lezip. Li ti viv ase lontan pou pronons bann benediksion profetik lor so 12 garson. Li ti donn Zozef, so 11^em garson, enn doub porsion ki normalman premie garson sipoze gagne. De parmi bann tribi Izrael ti pou sorti dan desandans Zozef. Ek ki nou kapav dir lor Zida, katriem garson, ki ti montre li pli bon ki so bann frer kan li ti manifeste enn gran repantans? Li ti gagn enn gran benediksion: Lemesi ti pou sorti dan so desandans!​—Zenez, sapit 48, 49.

Kan Zakob ti mor laz 147 an, bann frer Zozef ti per pangar zot frer ki ti enn zom pwisan rod pous vanzans. Me Zozef ti rasir zot avek amour. Zozef inn kontign fer sa depi ki Zeova ti ed so fami pou vinn Lezip, alor so bann frer ti bizin aret santi zot malalez pou seki’nn pase. Akoz samem, Zozef ti poz zot sa kestion ki fer reflesi la: “Eski mo dan plas Bondie?” (Zenez 15:13; 45:7, 8; 50:15-21) Zozef ti kone ki se Zeova ki sa Ziz parfe la. Alor ki Zozef ti ete li pou pini bann ki Zeova inn pardone?​—Ebre 10:30.

Eski parfwa ou gagn difikilte pou pardone? Sa kapav pli difisil sirtou kan enn kikenn inn fer nou ditor par expre. Si avek tou nou leker nou pardonn bann ki’nn vremem repanti, sa pou ed nou geri boukou blesir​—parmi ena nou bann blesir osi. Ek nou pou imit lafwa Zozef ek lexanp so Papa Zeova, ki ena mizerikord.