Janet rakonte: “Enn tipe letan apre lamor mo papa, mo misie ti dir mwa ki li pe sorti avek enn lot madam. Inpe letan apre sa, san dir mwa nanye ek san enn orevwar, li ti devid so larmwar ek li ti kit mwa ek nou de zanfan.” Janet ti gagn enn travay, me kas ki li ti gagne pa ti ase pou li kapav gard zot lakaz. Ek apart problem finans, li’nn bizin fer fas ar lezot problem. Janet dir: “Tou sa bann nouvo responsabilite ki mo ti bizin asime tousel la ti pe extra stres mwa. Mo ti santi mwa koupab parski mo pa ti pe kapav donn mo bann zanfan tou bann kitsoz ki lezot paran ti pe donn zot zanfan. Ek mem asterla, mo trakase parski mo pa kone kouma lezot trouv mwa ek mo bann zanfan. Eski bannla demann zotmem si mo’nn fer tou pou prezerv mo maryaz?”

Lapriyer ed Janet pou kontrol so bann santiman ek pou prezerv so lamitie avek Bondie. Li dir: “Se aswar ki sa pli difisil pou mwa, kan partou trankil ek mo pa kapav anpes mwa trakase. Kan mo priye ek kan mo lir Labib sa ed mwa pou dormi. Enn mo bann pasaz prefere se Filipien 4:6, 7 (NW.), ki dir: ‘Pa trakase pou okenn kitsoz, me dan tou kitsoz, par lapriyer ek siplikasion avek bann remersiman, demann Bondie seki zot bizin; ek lape Bondie ki depas tou konesans, pou protez zot leker ek zot lespri.’ Mo’nn pas plizir lanwit pou priye ek mo’nn santi lape Zeova rekonfort mwa.”

Zezi ti dir bann parol ankourazan lor lapriyer dan so Sermon lor Montagn ek nou kapav aplik sa ar tou sort kalite traka. Li ti dir: “Zot Papa, kone ki zot bizin avan mem ki zot demann Li.” (Matie 6:8, NW.) Me nou bizin demann Li. Lapriyer se mwayin prinsipal pou “apros . . . ar Bondie.” Ek ki arive kan nou fer sa? “Li pou vinn pros ar [nou].”​—Zak 4:8.

Wi, lapriyer pa zis ed nou pou santi nou bien apre ki nou’nn exprim nou traka. Zeova, sa Bondie “ki ekout lapriyer [la],” Li osi azir dan faver tou  bann ki krwar Li existe ek priye Li dan enn fason sinser. (Psom 65:2, NW.) Se akoz sa ki Zezi ti ansegn so bann disip pou “toultan priye san dekouraze.” (Lik 18:1) Nou bizin kontign demann Bondie so direksion ek so led, ek ena konfians ki Li pou rekonpans nou pou nou lafwa. Fode zame nou panse ki Bondie pa anvi ouswa pena kapasite pou ed nou. Si nou “priye toultan” dan sa fason-la, nou pou montre ki nou vremem ena lafwa.​—1 Tesalonisien 5:17.

Me ki ete lafwa vremem? Lafwa inplik “arive konn” Bondie kouma enn kikenn ki reel. (Zan 17:3, NW.) Premierman, nou fer sa kan nou nouri nou lespri avek panse Bondie ki ena dan Labib. Nou aprann ki Li trouv sakenn parmi nou ek ki Li anvi ed nou. Pourtan, vre lafwa inplik plis ki zis konn kitsoz lor Bondie. Sa vedir osi ena enn lamitie ki baze lor enn gran respe pou Li. Par exanp, pou vinn kamarad avek enn dimounn, sa lamitie-la pa devlope enn kout koumsa. Avek Bondie osi li parey. Nou lafwa “pou ogmante” avek letan, amezir ki nou aprann plis lor Li, amezir ki nou “azir dapre tou seki fer li plezir,” ek amezir ki nou trouve kouma Li ed nou. (2 Korintien 10:15; Zan 8:29) Se enn lafwa koumsa ki ed Janet lit kont so bann traka.

Janet dir: “Seki finn vremem ed mwa devlop enn lafwa for, se kan mo’nn trouv Zeova soutenir mwa dan sak letap mo lavi. Souvan nou’nn fer fas ar bann linzistis ki ti paret inposib pou siporte. Me nou’nn priye Zeova boukou, ek Li’nn touletan ed nou pou trouv enn solision ki mo pa ti pou trouve par momem. Kan mo remersie Li, sa fer mwa rapel tou seki Li’nn fer pou mwa. Li’nn touletan ed nou dan bon moman, souvan zis atan. Ek Li’nn donn mwa bann bon kamarad ki vremem bann Kretien sinser. Zot touletan la pou mwa ek zot bann bon lexanp pou mo bann zanfan.” a

“Mo kone kifer dan Malaki 2:16 Zeova dir: ‘Mo ayir divors.’ Pou enn konzwin inosan se pli gran trayizon ki kapav ena. Plizir lane inn pase depi ki mo mari inn kit mwa, me parfwa mo ankor santi mwa tousel. Kan mo ena sa santiman-la, mo esey fer kitsoz pou ed enn kikenn ek sa touletan ed mo’si.” Lefe ki li pe aplik bann prinsip Labib pou pa res dan so kwin li tousel, Janet diminie so bann traka. b​—Proverb 18:1.

Janet dir: “Seki plis rekonfort mwa, se lefe ki mo kone ki Bondie ‘okip [bann] orfelin kouma enn papa, ek li protez bann vev.’ Zame Li pa pou abandonn nou kouma mo mari inn fer.” (Psom 68:5) Janet kone ki Bondie pa tant personn “par lemal.” Okontrer, Bondie “zenere e li donn tou dimoun” sazes ek Li donn nou “sa pwisans extraordiner la” pou ed nou fer fas ar nou bann traka.​—Zak 1:5, 13; 2 Korintien 4:7.

Me ki nou pou fer si nou trakase parski nou lavi an danze?