LARTIK KOUVERTIR
Kisannla Bann Temwin Zeova?
“Mo’nn konn Mike pandan plizir lane. Li enn Temwin Zeova. Me touletan ti ena kitsoz ki mo pa ti konpran ar so relizion. Mo ti demann momem: Kisannla Zeova? Kifer bann Temwin pa fer bann fet? Eski Mike ti dan enn sekt?”—Becky, Californie, États-Unis.
“Kan mo bann vwazin ti koumans etidie Labib avek bann Temwin Zeova, mo ti demann momem: ‘Ki sa nom-la sa, Temwin Zeova? Enn nom bien bizar pou enn relizion!”—Zenon, Ontario, Canada.
“Nou pa ti pe frekant okenn legliz. Alor mwa ek mo madam ti panse ki bann Temwin Zeova ti vizit nou pou explwat nou bann santiman kilpabilite. Nou ti pe dir noumem si nou pa’nn gagn seki nou pe rode dan bann pli gran relizion, kouma eski enn ti sekt etranz koumsa pou kapav reponn nou bann kestion.”—Kent, Washington, États-Unis.
“Ofet mo pa ti konn zot ek seki zot krwar.”—Cecilie, Esbjerg, Danemark.
Kitfwa ou’nn deza trouv bann Temwin Zeova pe prese lakaz-lakaz ouswa dan bann plas piblik, pe distribie bann piblikasion baze lor Labib ek pe propoz bann letid Labib gratis. Sirman ou’nn gagn sa magazinn-la avek enn parmi zot. Malgre sa, kitfwa ou demann oumem: Kisannla bann Temwin Zeova ete vremem? Li posib ki ou pans parey kouma enn bann dimounn ki’nn mansione dan koumansman lartik.
Si ou pe poz oumem sa bann kestion-la, kot sa ou kapav gagn bann repons? Kouma ou kapav kone seki bann Temwin Zeova krwar vremem, kot sa zot gagn kas pou finans zot bann aktivite ek bann plas kot zot fer renion, ek kifer zot pas kot ou ek pres avek ou dan bann plas piblik?
“Cecilie ki nou ti mansione dan koumansman lartik dir: “Mo ti lir boukou kitsoz lor bann Temwin Zeova lor Internet. Mo ti tann bann rimer ek mo ti ekout boukou foste lor zot. Akoz sa mo ti ena enn lopinion bien negatif lor zot.” Me apre, li ti koz direkteman avek bann Temwin Zeova ek li ti gagn repons so bann kestion.
Eski ou ti pou kontan gagn bann repons exakt pou bann kestion ki ou ena lor bann Temwin Zeova. Nou ankouraz ou al get bann ki’nn pibliye sa magazinn-la, setadir bann Temwin Zeova zotmem. Zot pou pli kapav ransegn ou lor la. (Proverb 14:15) Nou espere bann prosin lartik pou ed ou kone kisannla nou ete, ki nou bann krwayans ek osi ki travay nou fer.
