Li posib ki sink milyar dimounn pou get Koup-Dimond FIFA ki pou ena ant le 20 Novam ek le 18 Desam 2022. Boukou dimounn panse ki bann levennman koumsa kapav fer plis ki zis ini bann spektater.

•   “Spor ena pouvwar pou sanz lemond. Li ena pouvwar pou motiv bann dimounn. Li ena pouvwar pou ini bann dimounn dan enn fason extraordiner.”​—Nelson Mandela, ansien prezidan Sid-Afrik.

•   Football ini bann dimounn parski li donn zot “enn lespwar, li donn zot lazwa, li motiv zot, li fer zot ena lamour anver lezot, ek li fer zot santi ki zot parey kouma lezot.”​—Gianni Infantino, prezidan FIFA. a

 Eski Koup-Dimond ouswa enn lot levennman sportif kapav vremem fer bann bon kitsoz koumsa? Eski ena enn lespwar ki enn zour pou ena lape ek linite?

 Koup-Dimond sa lane-la inn fer bann dimounn reflesi lor boukou lezot kitsoz, pa zis lor football. Bann dimounn finn koz lor bann problem politik ek sosial kouma par exanp, lor drwa ki sak dimounn ena, lor rasism, ek lor gap ki ena ant bann pov ek bann ris.

 Malgre sa, boukou dimounn kontan pou get bann levennman sportif kouma Koup-Dimond. Me selman, sa bann levennman-la pa kapav fer bann dimounn res ini. Kifer? Parski souvan nou trouv bann dimounn azir dan enn fason ki kree divizion. Se koumsa mem ki Labib ti dir bann dimounn ti pou ete dan “bann dernie tan.”​—2 Timote 3:1-5, Nouvo Testaman Dan Kreol Morisien, NTKM.

 Labib donn nou enn lespwar ki enn zour pou ena lape partou dan lemond. Li promet ki tou dimounn lor later pou viv dan linite gras-a enn gouvernman dan lesiel ki apel “Rwayom Bondie.”​—Lik 4:43, NTKM; Matie 6:10.

 Zezi Kris ki Lerwa dan sa Rwayom-la, pou fer sir ki ena lape partou lor later. Labib dir:

•   ‘Drwatir pou fleri pandan so regn e pou ena prosperite.’​—Psom 72:7, Psom an Kreol Morisien, PKM.

•   “Lerwa donn sekour bann pov ki vinn get li . . . Li anpes dominer fer bann feb ek pov pas mizer.”​—Psom 72:12, 14, PKM

 Azordi, bann lansegnman Zezi pe deza ini bann milyon dimounn dan 239 pei. Zot finn aprann pou nepli ena laenn pou lezot. Pou konn plis, lir bann lartik ki ena anba tit “Nou Kapav Gagn Laviktwar lor Laenn.”