Seki Labib dir

 Pou batiz enn kikenn, bizin plonz li net dan delo ek fer li re-sorti. a Labib koz lor plizir batem. (Zistwar Bann Zapot 2:41) Parmi, li koz lor batem Zezi dan larivier Zourdin. (Matie 3:13, 16) Plizir lane apre, enn etiopien ti batize dan “enn plas kot ti ena delo” pre ar sime kot li ti pe ale.​—Zistwar Bann Zapot 8:36-40.

 Zezi ti ansegne ki batem se enn kitsoz ki so bann disip bizin fer. (Matie 28:19, 20) Lapot Pier ti konfirm sa lansegnman-la.​—1 Pier 3:21.

Dan sa lartik-la

•  Ki savedir pran batem?

•  Ki Labib dir lor batem bann ti-baba?

•  Ki savedir pran batem lor nom Papa, Garson, ek lespri sin?

•  Eski li enn pese si nou repran batem?

•  Lezot batem ki Labib mansione

•  Seki sertin dimounn panse lor batem Kretien

 Ki savedir pran batem?

 Batem se enn kitsoz ki enn dimounn fer an piblik, pou montre ki li’nn repanti ar so bann pese ek li promet Bondie ki li pou servi li. Savedir ki toutlong so lavi, li pou obeir Bondie ek Zezi. Bann dimounn ki pran batem koumans viv dan fason ki Bondie demande pou zot kapav gagn lavi pou touletan.

 Kan plonz net dan delo, sa reprezant bien sanzman ki dimounn-la inn fer ar so lavi. Kouma? Labib konpar batem ar enn lanterman. (Romin 6:4; Kolosien 2:12) Avredir, kan enn dimounn pran batem dan delo, sa montre ki li pe anter lavi ki li ti ena avan, ek li pe koumans enn nouvo lavi antan ki enn Kretien ki’nn donn so lavi Bondie.

 Ki Labib dir lor batem bann ti-baba?

 Labib pa koz ek pa ansegn lor batem bann ti-baba. b

 Dapre Labib, enn ti-baba pa kapav pran batem parski Labib ansegne ki enn kikenn bizin fer sertin kitsoz pou li kapav batize. Par exanp, li bizin konpran bann lansegnman debaz lor Parol Bondie, ek viv an-akor avek sa. Li finn repanti ar so bann pese, ek li finn donn so lavi Bondie dan enn lapriyer. (Zistwar Bann Zapot 2:38, 41; 8:12) Bann ti-baba pa kapav fer sa bann kitsoz-la.

 Ki savedir pran batem lor nom Papa, Garson, ek lespri sin?

 Zezi ti dir so bann zapot pou fer “bann disip . . . , batiz zot lor nom mo Papa, lor nom so Garson ek lor nom lespri sin, ansegn zot pou obeir tou bann kitsoz ki mo’nn donn zot lord pou fer.” (Matie 28:19, 20) “Lor nom” vedir ki sa dimounn ki pe pran batem la konpran, aksepte lotorite ek pozision ki Papa ek Garson ena, ek rol ki lespri sin zwe. Par exanp, lapot Pier ti dir enn zom ki ti bwate depi so nesans: “Lor nom Zezi Kris ki sorti Nazaret, marse!” (Zistwar Bann Zapot 3:6) Li bien kler​—Pier ti konpran ek aksepte lotorite Zezi ek li ti rekonet ki li ti fer sa mirak-la gras-a li.

•   “Papa” se Bondie Zeova c. Antan ki Kreater, Lasours lavi, ek Bondie Tou-Pwisan, Zeova ena tou lotorite.​—Zenez 17:1; Revelasion 4:11.

•   “Garson” se Zezi Kris, ki’nn donn so lavi pou nou. (Romin 6:23) Nou pa kapav gagn lavi tanki nou pa konpran ek aksepte rol inportan ki Zezi ena dan proze Bondie pou limanite.​—Zan 14:6; 20:31; Zistwar Bann Zapot 4:8-12.

•   “Lespri sin” se lafors aktif Bondie, setadir so pwisans. d Bondie inn servi so lespri sin pou kree, pou donn lavi, pou transmet so mesaz ar bann profet ek lezot, ek pou donn zot lafors ki zot bizin pou fer so volonte. (Zenez 1:2; Zob 33:4; Romin 15:18, 19) Bondie inn osi servi so lespri sin pou gid bann ekrivin Labib pou transmet so bann panse.​—2 Pier 1:21.

 Eski li enn pese si nou repran batem?

 Boukou dimounn parfwa desid pou sanz zot relizion. Me ki pou arive si zot inn fini pran batem dan zot ansien relizion? Eski zot pou komet enn pese si zot batize ankor? Kitfwa ena sertin pou dir wi, kan zot pans lor Efezien 4:5, ki dir: “Enn sel Segner, enn sel lafwa, enn sel batem.” Me sa verse-la pa dir ki enn dimounn pa kapav repran batem. Kouma?

 Kontex. Kan lapot Pol ti ekrir Efezien 4:5 li ti pe montre ki bann vre Kretien bizin ini dan seki zot krwar. (Efezien 4:1-3, 16) Sa linite-la ti pou posib selman si zot swiv mem Segner, Zezi Kris, ena mem lafwa, konpran seki Labib ansegne ek swiv seki Labib dir lor batem.

 Lapot Pol ti ankouraz bann ki ti deza batize pou repran batem. Parski zot ti batize san ki zot bien konpran bann lansegnman Kretien.​—Zistwar Bann Zapot 19:1-5.

 Bon fason fer pou pran batem. Bondie aksepte enn batem ki baze lor enn konesans exakt lor laverite ki ena dan Labib. (1 Timote 2:3, 4) Si enn kikenn inn batize lor bann lansegnman relizie ki pa an-akor avek Labib, Bondie pa pou aksepte sa batem-la. (Zan 4:23, 24) Dimounn-la ti kapav ena bann bon lintansion, me li pann azir “dapre konesans exakt.” (Romin 10:2) Pou Bondie aksepte so batem, li bizin aprann seki Labib dir vremem, met li an pratik, donn so lavi Bondie, ek repran batem. Dan enn ka koumsa, kan li repran batem li pa enn pese. Okontrer, se samem ki bizin fer.

 Lezot batem ki Labib mansione

 Labib koz lor lezot batem ki diferan ar batem delo ki bann disip Zezi inn pran. Anou get de-trwa lexanp.

 Batem ki Zan Batis ti fer. e Bann Zwif ek bann ki ti konverti dan relizion Zwif ti batize par Zan pou montre ki zot ti regret bann pese ki zot ti fer kont Lalwa Moiz​—Lalwa ki Bondie ti donn bann Izraelit par Moiz. Batem ki Zan ti fer, ti prepar zot pou rekonet ek aksepte Lemesi, Zezi ki sorti Nazaret.​—Lik 1:13-17; 3:2, 3; Zistwar Bann Zapot 19:4.

 Batem Zezi. Zezi so batem par Zan Batis ti diferan ar lezot batem. Zezi ti enn zom parfe ek pa ti komet okenn pese. (1 Pier 2:21, 22) So batem pa ti montre ki li bizin repanti ouswa fer “enn demann ar Bondie pou gagn enn bon konsians.” (1 Pier 3:21) Sa ti montre ki li ti donn so lavi Bondie pou fer So volonte antan ki Lemesi, ouswa Lekris. Sa ti inplik donn so lavi pou nou.​—Ebre 10:7-10.

 Batem avek lespri sin. Zan Batis ek Zezi Kris toule-de ti koz lor batem avek lespri sin. (Matie 3:11; Lik 3:16; Zistwar Bann Zapot 1:1-5) Sa batem-la pa parey kouma batem lor nom lespri sin. (Matie 28:19) Kifer?

 Zis enn tigit disip Zezi ki batize avek lespri sin. Zot form parti bann ki’nn swazir par lespri sin parski zot pou al servi avek Zezi dan lesiel kouma bann lerwa ek pret pou diriz later. f (1 Pier 1:3, 4; Revelasion 5:9, 10) Zot pou diriz lor bann milyon disip Zezi ki ena lesperans pou viv dan Paradi lor later pou touletan.​—Matie 5:5; Lik 23:43.

 Batem dan Kris Zezi ek dan so lamor. Bann ki batize avek lespri sin zot osi “batize dan Kris Zezi.” (Romin 6:3) Sa batem-la aplik ar bann disip Zezi ki’nn swazir pou diriz later ansam ar li dan lesiel. Kan zot batize dan Zezi, zot vinn bann manb so lasanble ki Bondie inn swazir. Zot form enn sel lekor kot Zezi li Latet, ek zot manb sa lekor-la.​—1 Korintien 12:12, 13, 27; Kolosien 1:18.

 Bann Kretien ki’nn swazir zot osi “batize dan so lamor.” (Romin 6:3, 4) Zot imit Zezi kan zot amenn enn lavi sakrifis ek obeir Bondie olie ki zot fer zotmem plezir. Alor, parey kouma Zezi zot renons pou viv pou touletan lor later. Zot konplet sa batem sinbolik la kan zot mor ek resisite pou gagn lavi dan lesiel kouma bann kreatir spiritiel.​—Romin 6:5; 1 Korintien 15:42-44.

 Batem avek dife. Zan Batis ti dir bann ki ti pe ekout li “Limem [Zezi] ki pou batiz zot avek lespri sin ek avek dife. Dan so lame ena so fours ki separ lagrin dible ar lapay ek li pou netway net plas kot li bat dible. Li pou ramas so dible dan stor. Me lapay-la, li pou bril li dan enn dife ki pa kapav tengn.” (Matie 3:11, 12) Remarke ki ena bann diferans ant batem avek dife ek batem avek lespri sin. Ki Zan ti pe rod dir par sa lexanp-la?

 Dible reprezant bann ki pou ekout Zezi ek obeir li. Sa bann dimounn-la kapav gagn batem avek lespri sin. Lapay reprezant bann ki pa pou ekout Zezi. Zot pou gagn batem avek dife, ki reprezant destriksion pou touletan.​—Matie 3:7-12; Lik 3:16, 17.