MPANTTA 06
Ukumi uphattuwacile cani?
Ibiiblya ineera wiira Nluku ‘phumpile citthu cotheene.’ (Apokalipise 4:11) Nyuuva nnaakupali iyo itthwiiyo? Ahaavo atthu ahinkupali wiira Nluku phumpile ukumi. Wakhala wiira iyo ikhweeli, paasi hiivano niphattuwacile veekha. Masi wakhala wiira Yehova phumpile ukumi, paasi ihaavo itthu imwiirihile wumpa ukumyuuyo. Nnoonela cani? a (Nwehe niwehero.) Nttwee noone mbiiblyani mananna ciphattuwacilyaaya ukumi. Ciicammo, ninaahala woona nlattuni ninlamuliyeehu ukupaleela iyo itthwiiyo.
1. Tipani ompile irimu ni ituninya?
Masiyentista enci anaakupali wiira khalayi khayaarivo irimu ni itthaya. Masi wahophiya ukati wancenryaaya ukhala. Ni iyo phi itthu inhimyaaya Ibiiblya: “Wuupaceroni, Nluku ahompa irimu ni ituninya.” (Uphattuwaca 1:1) Masi manannani Nluku cumpilyaawe irimu ni ituninya? Wiira Nluku ompe irimu ni ituninya, uhela nhina itthonttwa ni iplaneta cikhwaawe, uyo aavarenle nteko ikuru cawe awula nnepaawe wowaarya.—Uphattuwaca 1:2.
2. Kontha isiyani Nluku ompilyaawe ituninya?
Yehova “khumpile ituninya wiira ikhale ciicammo, masi ompile wiira ikhaliye.” (Isaiya 45:18) Ihaavo itthu imwiirihile Nluku wumpa ituninya. Uyo aapheela wiira ituninya ikhale itthoko yomaana yaapinaatamu ni wiira ayo akhale mpaka. (Nsome Isaiya 40:28; 42:5.) Masiyentista anaakupaleela wiira ituninya ikhanle iplaneta yootepa ureera, uvikana iplaneta cikhwaawennyo. Ayo khaaphwanyile iplaneta ikhwaawe irina citthu cotheene cimpheeleehu wiira nikhale nuukumi.
3. Isiyani inwiiriha apinaatamu uvirikana niinama?
Yehova wumpa wawe ituninya, uyo ahompa miri niinama. Vano, “ahomumpa ntthu eelattaaniheraka.” (Nsome Uphattuwaca 1:27.) Isiyani inaavirikaniha apinaatamu ni citthu cikiina cumpilyaawe Nluku? Kontha uyo wumpile eelattaaniheraka. Nimoolumacero makhwaawe, ayo pooti wantakihaaya makhalelo uyova arinaawe, toko nifento ni isariya. Ciicammo, Nluku wumpile apinaatamu nimananna wankhitiryaaya wiitthuca iluuka, ukhala ootikhinihiya ni citthu cooreera cinoonaaya ni waacivela macipo. Ni woovirikana niinama cotheene, hiiva pooti wanonswaleleehu Mumpiihu.
MUNCERERE WIITTHUCA WINYU
Moone citthu tthaaru: (1) citthu cinoonihera wiira ukumi uhowumpiya, (2) citthu cinoonihera wiira itthu inhimyaaya Ibiiblya nhina mananna cumpiyaaya ituninya ikhanle ikhweeli ni (3) itthu inniitthucihaaya makhalelo arinaaya apinaatamu.
4. Ukumi uhowumpiya
Apinaatamu anaattottopeliya nlattu wo citthu cimpankaaya yoonelaka citthu cimphwanyannya watuninyani. Woonela winyu, ule ompile citthu cimphwanyannya watuninyani, khawaareera uyova utepa uttottopeliya? Moone IVIDIYU, ni mwamalihaka woona, moopele mwaha nna nikohonna:
-
Citthuni apinaatamu cipankilyaaya yoonelaka citthu cimphwanyannya watuninyani?
Khula inupa intekiya ni ntthu. Vano tipani ompile citthu cotheene cimphwanyannya watuninyani? Nsome Maberewu 3:4, ni mwamalihaka usoma, moopele mwaha ala makohwaala:
-
Watuninyani cihoocara citthu cinci cowumpiya. Citthuni cimphwanyannya watuninyani cintepa wuutikhinihani?
-
Woonela winyu, pooti wankupaleeleehu wiira irimu ni citthu cotheene cimphwanyannya watuninyani haavo ompile? Kontha isiyani nneereenyu commo?
Mwaanaacuwela?
Nsayitini wihu jw.org nyuuva pooti uphwanya myaha ni ividiyu cikhwaawe cinooluma ula mwahoola, nhina nipuro nantikhiye “Iphattuwacile Veekha Awula Ihowumpiya?” ni “Citthu Cinoopuwelaaya Atthu Nhina Mananna Ciphattuwacilyaaya Ukumi.”
“Khweeliini, khula inupa intekiya ni ntthu, masi Nluku phipankile citthu cotheene”
5. Itthu inhimyaaya Ibiiblya nhina mananna ciphattuwacilyaaya citthu ikhanle ikhweeli
Nhina Uphattuwaca ikapiitulu 1, Ibiiblya inaattonkaca mananna cumpiyaaya ituninya ni ukumi. Woonela winyu, niireke pooti ukupaleela itthu inhimyaaya Ibiiblya nhina uyo mwahooyo? Awula nnyo citthunnyo cikhanle cowoothiya? Moone IVIDIYU, ni mwamalihaka woona, moopele mwaha ala makohwaala:
-
Niireke Ibiiblya ineetthuciha wiira ituninya yumpiye nhina wo mahuku 6 ooviriha iwoora 24 paasi?
-
Woonela winyu, itthu inhimyaaya Ibiiblya nhina mananna ciphattuwacilyaaya citthu ikhanle ikhweeli? Kontha isiyani nneereenyu commo?
Nsome Uphattuwaca 1:1, ni mwamalihaka usoma, moopele mwaha nna nikohonna:
-
Masiyentista aneera wiira khalayi khayaarivo irimu ni ituninya, masi wahophiya ukati wancenryaaya ukhala. Iyo itthwiiyo invaranaca cani niitthu isomileehu mbiiblyaniila va?
Atthu akhwaawe aneera wiira Nluku aavarenle nteko citthu coophattuwaca veekha wiira ompe ukumi. Nsome Uphattuwaca 1:21, 25, 27, ni mwamalihaka usoma, moopele mwaha ala makohwaala:
-
Niireke Ibiiblya ineera wiira Nluku aavarenle nteko citthu coophattuwaca veekha wiira ompe ihopa, inama ni apinaatamu? Awula uyo phumpile citthu cotheene cirina ukumi “co khula inanna”? b (Nwehe niwehero.)
6. Mwaneene Nluku anancivela venci cinene apinaatamu
Hiiva ninaavirikana niinama cumpilyaawe Yehova. Nsome Uphattuwaca 1:26, ni mwamalihaka usoma, moopele mwaha nna nikohonna:
-
Apinaatamu anaakhitiri uthoonyera nifento ni uthunku kontha Nluku wumpile eelattaaniheraka. Iyo itthwiiyo inniitthuciha wiira Yehova haana makhaleloni?
ATTHU AKIINA ANEERA: “Itthu inhimyaaya Ibiiblya nhina mananna ciphattuwacilyaaya citthu, khinakhala ikhweeli. Iyo ikhanle ihantisi yowoothiya.”
-
Nyuuva nnaakupali? Kontha isiyani?
UTHIKILELA
Yehova phumpile irimu, ituninya ni citthu cotheene cirina ukumi.
Wuupuwela
-
Ibiiblya ineera wiira irimu ni ituninya cipacapacile cani?
-
Ukati wo wumpa citthu, niireke Nluku aavarenle nteko citthu coophattuwaca veekha? Awula uyo phumpile citthu cotheene?
-
Isiyani inwiiriha apinaatamu utepa ukhalana ifayita uhoolo wa Yehova?
MWAPHEELAKA UCUWELA CITTHU CIKIINA
Moone citthu cimphwanyannya watuninyani cinthoonyera wiira haavo mumpi.
“Citthu cimphwanyannya watuninyani cinniitthuciha isiyani?” (Despertai!, yo Setembro yo 2006)
Moone mananna ayari cinlamuliyaaya waahimyacera asaanaaya ooyevaca itthu inhimyaaya Ibiiblya nhina uphattuwaca wo citthu.
Moone wakhala wiira wanaakhitiryaa ukupali wiira citthu cimphwanyannya watuninyani ciphattuwacile veekha ni ukati yooyo ukupali wiira cihowumpiya.
Ahaavo aneera citthu cimphwanyaaya ale anthipathipa mapuro yaakhaliya khalayi ni citthu coonelenlyaaya masiyentista, cinaathoonyihera wiira citthu cimphwanyannya watuninyani ciphattuwacile veekha.
A origem da vida — Cinco perguntas que merecem resposta (ibroxura)
a Niwehero: Nhina mpantta 25, ninaahala wiitthuca isiyani Nluku ilakenlyaawe waapankela apinaatamu.
b Niwehero: Mbiiblyani, weeriyaka “co khula inanna,” cinaaciya citthu cinci cookhalana ukumi cumpilyaawe Yehova, toko: inama ni miri. Unaavirikana niitthu inaacaaya masiyentista yoolumaka nna nuulumonna.
