MPANTTA 15
Yesu Tipani?
Yesu naapanka mphantte waatthu oocuwelaciya ikhumelo yokhalayi. Hataa ukhala commo, atthu enci ancuwela ncinanawe paasi. Ni akiinaayo arina moopuwelelo oovirikana nhina Yesu Kristu. Masi isiyani Ibiiblya inoolumaaya imwaacaka Yesu?
1. Yesu tipani?
Yesu nlayikha nokuru ninkhala wiirimu. Yehova hinaaya wumpa itthu ikhwaawe, uyo aapacenre umumpa Yesu. Phimaana, Ibiiblya ineera wiira uyo ‘phipaceriye wumpiya cihinaaya wumpiya citthu cotheene.’ (Akolosu 1:15) Ni Ibiiblya ineera wiira Yesu ‘Mwaana mmoca’ a Nluku. Iyo maanaaya wiira Yehova mumpile Yesu naari veekha. (Joau 3:16) Yesu hovara nteko wamoca naathumwaane, Yehova. Uyo honkavihera Yehova wumpa citthu cikhwaawe. (Nsome Miruku 8:30.) Yehova ni Yesu anaafentana cinene. Yesu khanle nanrumiya ookhuluvelya a Nluku, awula, uyo naahimyaca moolumo ni malakihero a Yehova. Phimaana Ibiiblya immwiihanaaya “Nuulumu.”—Joau 1:14.
2. Kontha isiyani Yesu waawilyaawe watuninyani?
Myaakha 2000 uttuli, Yehova ahopanka mwiiriirya. Uyo ahovarela nteko nnepaawe wowaarya anveleelihaka mwanawe Yesu va watuninyani va wiira ayariye ni mwaarusi eehaniya Maria. Ala manannaala, Yesu ahoyaryaa niirutthu yeepinaatamu. (Nsome Luka 1:34, 35.) Yehova anveleelihile Yesu watuninyani wiira akhale Mesiya awula Kristu, aakhuluvelihiye wiira anhala uwa, ni wiira aawoopole apinaatamu. a (Moone niwehero.) Yesu heerannyeeha inatiri cotheene caamuuluma Mesiya. Iyo itthwiiyo yahaakavihera atthu ucuwela wiira Yesu, phaari “Mwaana a Nluku eekhweeli.”—Matewus 16:16.
3. Nna co Yesu ri vayi?
Yesu ukhwa wawe uyo ahonwelelihiya niirutthu yonlayikha ni ahoturuwela wiirimu. Nwo, “Nluku honttitthimiha venci.” (Afilipo 2:9) Nna co Yesu Kristu nlayikha nokuru venci cinene. Yehova paasi phirina ikuru unvikana Yesu.
MUNCERERE WIITTHUCA WINYU
Moonelele Yesu Kristu khweeliini tipani ni kontha isiyani unaareera wiitthuca myaha cawe.
4. Yesu khanakhala Nluku Nakuru-Cotheene
Ibiiblya ineera wiira Yesu nlayikha nokuru cinene. Hataa ukhala commo, uyo naamwiiwelela Nlukwaawe ni Athumwaane, Yehova. Nincuwela cani iyo itthwiiyo? Moone IVIDIYU wiira ncuwele itthu inhimyaaya Ibiiblya nhina mananna Yesu cinvirikanaawe ni Nluku Nakuru-Cotheene.
Iveerusu ciri vathinnya va cinaanikavihera ucuwela wiira Yehova ni Yesu atthu oovirikana. Nsome khula iveerusu ni mwaakhule makoho ari vathi waya.
Nsome Luka 1:30-32.
-
Moolumo onlayikhaayo anoonihera cani wiira Yesu ni Yehova, khanle “Nkhulupale,” khaanakhala ntthu mmocaaru?
Nsome Matewus 3:16, 17.
-
Nihuku naapattisiyaawe Yesu, ncu naakhumile wiirimu naahimileni?
-
Nyuuva woonela winyu naari naapani?
Nsome Joau 14:28.
-
Watthokoni, tipani nokhala muulupale ni nokhalana ukhulupale: nyari awula mwanawe?
-
Yesu nomwiihana Yehova Paapa. Iyo itthwiiyo inniitthuciha isiyani?
Nsome Joau 12:49.
-
Niireke Yesu noopuwela wiira uyova naathumwaane anaalikanaca? Nyuuva woonela winyu ayo anaalikanaca?
5. Citthu cinoonihera wiira Yesu aari Mesiya
Mbiiblyani cinaaphwanyannya inatiri cinci cinaakavihera atthu ucuwela wiira Yesu aari Mesiya, awula, uyo aathanliye ni Nluku wiira awoopole apinaatamu. Moone IVIDIYU wiira ncuwele inatiri ciirannyeehilyaawe Yesu ukati waaryaawe va watuninyani va.
Nsome nnya inatirinnya ni mwamalihaka usoma, moopele mwaha makoho amphwanyannya vathi waya khula inatiri:
Nsome Mikeya 5:2 wiira moone nipuro naahalaawe uyariya Mesiya. b —Moone niwehero.
-
Ila inatiriila iheerannya?—Matewus 2:1.
Ibiiblya yahottonkaca khalayiiru mananna caahalaawe ukhwa Mesiya. Nsome Isaalimu 34:20 ni Zakariya 12:10 wiira moone itthu yaahimyaaya Ibiiblya nhina mananna caahalaawe ukhwa Mesiya.
-
Niireke nnya inatirinnya ciheerannya?—Joau 19:33-37.
-
Atthu akhwaawe aneera wiira Yesu phipankihile wiirannya nnya inatirinnya. Nyuuva nnaakupaleela iyo itthwiiyo?
-
Nnya inatirinnya cinwiitthucihani wiira Yesu aari tipani?
6. Wiitthuca myaha ca Yesu unaaniphwanyiha ifayita
Ibiiblya ineera wiira unaareera wiitthuca myaha ca Yesu ni itthu impheelaawe Nluku wiira uyo apanke. Nsome Joau 14:6 ni 17:3. Mwamalihaka usoma, moopele mwaha nna nikohonna:
-
Kontha isiyani unaareera wiitthuca myaha ca Yesu?
Yesu haaka iphiro wiira nimpatthanane Nluku. Uyo heetthuciha ikhweeli ca Yehova ni nlattu wa Yesu, hi pooti wamphwanyeehu ukumi woohimala.
ATTHU AKIINA ANEERA: “Masaahiti a Yehova aneera wiira Yesu mwaana a Nluku, masi Nluku kharina mwaana.”
-
Nyuuva mwaahala waakhula cani?
UTHIKILELA
Yesu nlayikha nokuru cinene. Uyo khanle mwaana a Nluku ni Mesiya.
Wuupuwela
-
Kontha isiyani Ibiiblya ineeraaya wiira Yesu ‘phipaceriye wumpiya cihinaaya wumpiya citthu cotheene’?
-
Isiyani ipankilyaawe Yesu hinaaya uwa watuninyani?
-
Nincuwela cani wiira Yesu phiri Mesiya?
MWAPHEELAKA UCUWELA CITTHU CIKIINA
Moone citthu cikhwaawe cinthoonyera wiira Yesu phaari Mesiya.
Moone mbiiblyani kontha isiyani Yesu cinwaawe eehaniyaka mwaana a Nluku.
“Kontha isiyani Yesu neehaniyaawe mwaana a Nluku?” (Mwaha umphwanyannya nsayitini jw.org)
Moone kontha isiyani itthu ineetthucihiya yaanluku araru khinvaranaca niitthu inhimyaaya Ibiiblya.
Nsome ihantisi inttonkaca mananna athiyana amoca cirukunusilyaaya makhalelwaaya, usoma waya itthu inhimyaaya Ibiiblya imwaacaka Yesu.
a Niwehero: Nhina mpantta 26 ni 27, ninaahala woona kontha isiyani apinaatamu anlamuliyaaya woopoliya ni manannani Yesu cinooponlyaawe.
b Niwehero: Wiira moone inatiri yaahimya ukati waahalaawe uwa Mesiya va watuninyani va, moone Mwiiweehe Saana n.° 2.
