MPHANTTE 8
Uwa wa Mesiya
UHOOLO waya myaakha coovikanaka 500 inapankiyeene inatiri ya Daniyele, nlayikha Gabriyeli nahonkhumelela mwaarusi eehaniya Mariya, aari ucuulu wa Mwene Davidi. Nlayikha Gabriyeli nahomwirela coo: “Uhoseleliya, ootepa utthuniya, Yehova rii ni weeva.” (Luka 1:28) Masi Mariya, wahomphwanya woova. Kontha isiyani Gabriyeli ahonseleliha ale mananna ale?
Gabriyeli ahonhimerya Mariya wiira aanahala unyara Mesiya
“Uhooveni, Mariya, kontha uhocivela wa Nluku; ni unaahala urupala irukulu ni unaahala unyara mwaana, ni uhaana unvahaka ncina na Yesu. Yehova naahala unvaha ikiitti ya Davidi, paapaawe, ni . . . umwennyaawe khunhala umala.” (Luka 1:30-33) Ila yaari ihapari yomaana! Mariya phaahala unyara Mesiya, “ucuulu” waarerihiya.
Mwaakha wowaakulela, Yesu ahoyariya uBelem. Yoole uhiyu ule, nlayikha nimoca nahaalalyeela makampuci oncoko yoole neeraka: “Kinoohimeryani ihapari comaana coovaha utteeliya . . . kontha ilelo nhoyareliya Moopoli, usitati wa Davidi, khanle phi Kristu, Apwiiya.” (Luka 2:10, 11) Uhoolo waya ukathi vakani, amuci a Yesu yahothamela uNasaree, wenwe wonuwenlyaawe.
Mwaakha wo 29 E.C.—yooyo mwaakha waahalaawe ukhumelela Mesiya—Yesu ahaancera nteko weeProfeta waarumiyaawe ni Nluku, narina “myaakha cookhalaka talaathiini.” (Luka 3:23) Atthu enci yahocuwelela mmuupuweleloni waya wiira uyova aveleelihiye ni Nluku. Yeeraca coo: “Profeta muulupale hovusiya wariyari wihu.” (Luka 7:16, 17) Masi Yesu eetthuciha isiyani?
Yesu eetthuciha atthu unfenta ni unswalela Nluku: Uyova eenre coo: “Yehova, Nlukwiihu, phi mmoca, Yehova, ni uhaana unfentaka Yehova, Nlukwaa, ni nrimaa woothene, ni iroohwaa yoothene, ni muupuwelelwaa oothene, ni ikurucaa coothene.” (Markus 12:29, 30) Aheera-tho ciicammo: “Yehova, Nlukwaa, phikhanle unlamuliyaa unswalela ni phi mmoca paahi oopheela weeva unvarela nteko wowaarya.”—Luka 4:8.
Yesu haasovenriha atthu wafenta akhunanaya: Uyova eenre coo: “Uhaana unfentaka nkhwaa toko umwaneennyaa.” (Markus 12:31) Uyo ciicammo eenre: “Citthu coothene, cimpheeleenyu wiira atthu yuupankeni, nyuuva ciicammo nhaana mwaapankaka Khweeliini, ila phi itthu impheelaaya uhimya Nlamulo ni Maprofeta.”—Matewus 7:12.
Yesu nuuminyaala waawe anawaahimerya akhunanawe Umwene wa Nluku: “Kihaana kilalyaaka ihapari comaana co Umwene wa Nluku ciicammo isitati cikina, kontha phiveleeliheriyaaka.” (Luka 4:43) Kontha isiyani Umwene wa Nluku ukhanlyaaya itthu yuulupale?
Moolumo a Nluku aneetthuciha wiira Umwene wa Nluku Ikuvernu yo wiiluku inhala ulamulela watuniyani. Yesu, khanle Mesiya, phi Mwene thanliye ni Nluku wiira akhale Mwene oomwene yooyo. Profeta Daniyele ahohoolelihera uhimya wiira, wiirimu, Nluku anaahala unvaha Mesiya ‘ulamulela, nttittimiho ni umwene’. (Daniele 7:14) Umwene yoola phinkookhaliha ituniya Ipeephoni ni waaphwanyiha arumi a Nluku ukumi woohimala. Ihavo-tho ihapari yootepa ureera uvikana ila?
