Uhopaca wuurikelani wuupuwela mwaha umalihileenyu usoma? Iyo itthwiiyo inaniirannyeelaka atthu otheene cihu. Isiyani inhala wuukaviherani? Nturuwele usoma ipontu cuulupale.

Ukati unsomeenyu, mweemesere vakaani wiira mwantikhe ipontu cuulupale. Apostolu Paulu ahaakavihera anamasoma upanka iyo, eeraka: “Ila ikhanle ipontu yuulupale.” (Mabere. 8:1) Naayo moolumwaayo, uyo ahaakavihera ucuwela itthu yaapheelaawe uhimya ni wiiweeha itthu yaataphulelaaya khula ipontu yuulupale.

Nyuuva pooti wankawaniheenyu ukati, mwamalihaka upanka usoma wo veekha, pooti wankhalaaya iminutu 10 wiira nsuupuwele ipontu cuulupale ciphwanyaleenyu ukati waasomeenyu. Wakhala wiira nholiyala, nturuwele uweha-tho moolumo ari ipontu cuulupale (venci-venci moolumo oopacera khula iparaagarafu). Mwapankaka commo, nnaahala ukhitiri wuupuwela itthu isomileenyu. Wakhala wiira nheetthuca itthu yonaanaano, mmananihe utaphulela nimananna cinoopuweleenyu. Mwaturuwelaka usoma ipontu cuulupale, nyuuva nnaahala ukhitiri wuupuwela ni wiiweeha itthu yaasomeenyu ni myaha cinhaleenyu wiitthucannyo cinaahala wuukaviherani muukumini.