YOMARA ni asinyenyaawe eeli—Marcelo ni Hiver—ankhalaca ncoko wo Guatemala. Yomara ahopacera usomihiya Ibiiblya ni Masahiti a Yehova. Uhoolo waya, asinyeenyaawe yahopacera usomihiya Ibiiblya. Masi yahaana nrikariko nimoca: ayoca khayoonaca ni khayacuwelaca usoma ilivuru caatthu oohoona. Phimaana, munna aasomihaca aanawaasomela iparagaraafu ni iveerusu co khula mpantta.

Urwaa umikutthaanoni yaari itafawuti ikiina. Ayo khayaakhitiri weetta iminutu 40 wiira arwee umikutthaanoni veekha. Masi mayamunna yaanaaveleela khula nkutthaano. Ukati waapacenryaaya upanka miphantte caya umikutthaanoni, mayamunna yaanawaakavihera weesa mmuru itthu yaahalaya wuuluma.

Mweeri wo Maio wo 2019, mikutthaano cahopaceriya upankiya ncoko waakhalaaya. Uyo ukatyuuyo, yahaavo anamathelana yaavara nteko weepiyoneeru yaathamenle yooyo ncokooyo. Ayo yaheevaherera wiira yanhala waakavihera usoma ni wantikha ilivuru caatthu oohoona. Masi ayo anamathelanaayo khayaacuwela usoma ilivuru caatthu oohoona. Vano, ayo yahorwaa nipuro caaphwanyannyaaya ilivuru caatthu oohoona ni yahosoma mananna oopheela uwiitthucihaca.

Myeeri vakaani pahi, Yomara, Marcelo ni Hiver yahopacera usoma wohaarikarika. Iyo yahaakavihera ulipihaca upatthannyaaya ni Yehova. a Nna co, ayo anvaraca nteko weepiyoneeru ni Marcelo hokhala nrumiya o wanlokoni, ni uyo nawiikurumica uvara cinene miteko co mminepani isumana cotheene. Wiikurumica wawe unaavara nrima.

Yomara, Marcelo ni Hiver anaasukhurweela cinene nlattu wookaviheriya ni mayamunna o wanlokoni. Yomara heera: “Ikhumelo ikwaha yoopacera naacuwenleehu Masaahiti a Yehova, ayo anaanoonihera nifento neekhweeli no makristau.” Marcelo honcerera: “Hi nihaana asipatthaniihu omaana o wanlokoni ni pooti waneereehu wiira ninaapanka mphantte waamuci o ntuninyani motheene ankhala owaataana ni nifento.” Yomara ni asinyeenyaawe anoona uphiya uphiya nihuku ilapo inhalaaya ukhala ipeephoni.—Isaa. 37:10, 11; Isai. 35:5.