• Aahala ukhala oothanliya ni Nluku. “Mi mwaaneennyaaka kihomweesa mwennyaaka. . . . Mi kinaahala wuuvaha atthu o maloko otheene khampa itthu yoohiyeriya ni mpaka umalenlyaaya ituninya kinaahala wuuvaha wiira ukhale waawa.”—Isaalimu 2:6, 8

• Aahala ukhumelela wanlokoni na mwene Davidi. “Nihoyareliya mwaana, nihovahiya mwaana mwanlopwana . . . Winciva woolamulela wawe ni nnema niri wakiittini ya Davidi ni waculu waya umwennyaawe khacinhala umala, wiira atikitherye sana-saana.”—Isaiya 9:6, 7.

• Aahala uyariya Upeteleheemu. “Oo Peteleheemu . . . , iriyaryaa naahala ukikhumelela ule nohala ukhala nhooleli . . . Wuunuwa wawe, unaahala uphiya vano umalenlyaaya ituninya.”—Mikeya 5:2, 4.

• Aanaahala uthanyiya ni wiiviya. “Ahothanyiya ni khananwacenre . . . Uyo ahottenliya nlattu woottheka wihu, ahonyakatiya nlattu woovonya wihu.”—Isaiya 53:3, 5.

• Aanaahala wunwelelihiya ni uttitthimihiya. “Khunhala ukihiya Mmahiye. Ule nookhuluvela, khunhala unhiyerera acuwelaka nlikitti. . . . Mphantte wo moonwaa wonlopwana, uhaavo utteeliya uhimmala.”—Isaalimu 16:10, 11.

Ikhumelo yumpiyaaya apinaatamu, ntthu mmoca paasi phimwiirannyenle citthu cotheene caahimiye, uyo ntthuuyo khanle Yesu Kristu. Khweeliini, nlayikha nimoca nahotoko unhimyeera Mariya, anumwaane Yesu: “Nluku naahala unvaha ihice ya Davidi, paapaawe, . . . ni Umwennyaawe khunhala umala.”—Luka 1:31-33.

Masi, Yesu khaapacile ukhala nhooleli ukati waaryaawe watuninyani. Uhiya commo, uyo nohala waalamulela apinaatamu, naryeene wiirimu. Vano isiyani immwiiriha uphwanela waalamulela apinaatamu? Moone citthu cipankilyaawe ukati waaryaawe watuninyani.

•   Yesu aanaawacera atthu. Yesu aanaakavihera alopwana ni athiyana, amirawo ni owuuluvala hataa yakhumaka mapuroni ni hataa yakhalaka ahuvi awula mathaciri. (Matewus 9:36; Markus 10:16) Ukati namakuttula mmoca wanlepenlyaawe eeraka: “Pwiiya mwapheelaka, pooti ukireeriha”, Yesu ahomoonela uthunku ni ahonvoniha.—Markus 1:40-42.

• Yesu honiitthuciha mananna ontteeliha nrima Nluku. Uyo enre: “Nyuuva khannolamuliya ukhala ipottha ca Nluku ni ipottha co Mihakhu.” Ciicammo aheera wiira nihaana naatafitiki akhunanihu khampa hiiva cimpheeleehu wiira nitafitiye. Uhiya commo, Yesu ahohimya wiira Nluku khanwacera paahi citthu cimpankeehu masi ciicammo citthu cinoopuweleehu. Phimaana, napheelaka untteeliha nrima Nluku, nihaana niwehaceraka citthuni cooreera wuupuwela. (Matewus 5:28; 6:24; 7:12) Yesu ahohimyeeha wiira napheelaka ukhalana utteeliya weekhweeli, nihaana niitthucaka citthu cimpheelaawe Nluku wiira nipanke ni nihaana neettelaka.—Luka 11:28.

• Yesu hothoonyera maanaaya isiyani ufenta. Citthu caapankaawe ni ceetthucihaawe caanaavara nrima ale yanviriyana. “Mphwinko waatthu wahotikhinaca venci mananna uyo ceetthucihaawe, kontha uyo aawiitthuciha khampa ntthu ookhalana ukhulupale.” (Matewus 7:28, 29) Yesu ciicammo ahowiitthuciha wiira yaalamuliya “waafenta awanannyaaya.” Mpaka uyo ahaalompela ale yaamwiivile, eeraka: “Paapa, mwaalevelelace, ukhala wiira khancuwela invaraaya.”—Matewus 5:44; Luka 23:34.

Khweeliini, Yesu unamphwanela ulamulela ituninya yotheene. Nifento nirinaawe ni uthoonyera wawe waawacera atthu, unawoonihera iyo. Masi uyo nohala wancera ulamulela mwaani ituninya?