Ezaya 65:1-25
65 “Nalesile ukuti aatanguzizyepo yaamanye;Nalesile ukuti aatandonzilepo yanzane.
Naswike uluko ulutaangamilepo inti, ‘A nene pano, a nene pano!’
2 Uwanda onsi nkakonzolwela makasa yane uku yantu aakomya imyenzo,Uku yantu aakacita iviipe,Ala yakucita sile vino yakwelenganya;
3 Antu aakansosya lyonsi uku mufulo,Aakapeelela malambo ya koca pa njelwa na malambo yauze umu vyalo.
4 Yakaikala pa malindi,Nupya usiku onsi yakaya umu ncende izifisame,Ala yakulya iminyefu yakwe ya kapoli,Nu musunyi wa vintu vikowele ala uli umu viya vyao.
5 Yakalanda iyati, ‘Ikala kuko kwene; utampalama,Pano nene wa muzilo ukukucila.’
Antu yaa yakalenga icunsi cafuma umu mpuno zyane nupya yakatwalilila ukunsosya wa moto uukwaka uwanda onsi.
6 Vii vyalembwa pa nkoleelo yane;Ntalalekapo sile,Lelo ndayafulula,Nupya ndayafulula icipisye
7 Pa mulandu ni membu zyao ni membu zya vikolwe vyao,” avino Yeova walanda.
Nupya wati: “Pa mulandu wakuti yakapeelela malambo ya koca pa myambaNu kunzewanya pa tumyamba,Nkoleelo ndayafulula icipisye.”
8 Yeova walanda wati:
“Wakwe viivi kwene vino waini umupya akaya umu myangaziNupya umwi ala amalanda ati, ‘Mutayonona pano muli visuma vimwi,’
Avino nani ndacita pa mulandu na antu yane;Ntalayonona yonsi.
9 Ndafumya ana muli YakoboNupya muli Yuda ndafumyamo aakupyana incende yane iya myamba;Antu yane asoololwe yalikalamo,Kumwi na aomvi yane.
10 Incende ya Syaloni ilaya umwa kucemela imfweleNupya umukonko wa AkoliUlaya umwa kupuuzila ing’ombe zya yantu aakandonda.
11 Lelo mwemo mwaya pali yano yasya ne Yeova,Ailila umwamba wane uwa muzilo,Aakapekanyizizya leza wi Syuko ivyakulya,Nu kupeela waini umukalipe kuli leza aakamanya ivilacitikila umwi.
12 Fwandi ndaleka ukuti mukomwe nu lupanga,Nupya mwensi kwene mulinama pakuti mukomwe,Pano namwamile, lelo mutaaswike,Nalanzile, lelo mutaakutike;Mwatwalilile ukucita iviipe pa nkoleelo yane,Nupya mwasoolwilepo ukucita ivya kunsosya.”
13 Acino Yeova Umwene wa Papelapela walanda wati:
“Lolini! Aomvi yane yalalya, lelo mwemo mulaya ni nzala.
Aomvi yane yalamwa, lelo mwemo mulaya nu lusala.
Aomvi yane yalasansamuka, lelo mwemo muluvwa insonyi.
14 Aomvi yane yalaya sana ni nsansa pa mulandu nu umi usuma,Lelo mwemo mulaalila pa mulandu nu kuwaikaNupya mulaaloosya pa mulandu nu ulanda.
15 Cino mulasya sile i zina lino aasoololwe yane yalaaomvya pa kutiipa,Nupya Yeova Umwene wa Papelapela alamukoma mwensi,Lelo aomvi yakwe alayapeela izina lyuze;
16 Pakuti wensi uwalonda ukupaalwa umu nsiLeza wa cumi ace amupaale,Na wensi uwalapa umulapo umu nsiAce alapile umwi zina lyakwe Leza wa cumi.
Pano macuzi ya mpiti yalililika;Nupya yatalalolekelapo uku manso yane.
17 Nkupanga mayulu apya ni nsi ipya;Nupya ivintu vya mpiti vilililika,Kusi aalaviusyapo nupya.
18 Fwandi mwazanga nu kusansamuka lyonsi pali vino nkupanga.
Pano nkulenga Yelusalemu kuya ica kumulenga ukuya ni nsansaNupya vino nimacita uku yantu yakwe vimamulenga ukusansamuka.
19 Nupya ndasansamukila muli Yelusalemu nu kuzangila umu yantu yane;Nupya muli aliwe mutaluvwikapo ukulila nanti ukuloosya pa mulandu na malanda.”
20 “Kutalaya umwana aalikala sile pa nsita inono,Nanti umukote aatalakumanizya imyaka yakwe.
Pano uwafwa ali ni myaka 100 alaapendwa ukuti acili umwance.Nupya umuyembu alatiipwa nanti cakuti wafisya imyaka 100.*
21 Yalakuula mang’anda nu kwikalamo,Nupya yalalima ivyalo vya myangazi nu kulyako ivizao.
22 Yatalakuula mang’anda pakuti umuntu muze aliwe aaikalamo,Nanti ukulima ivyalo pakuti antu yauze aliyo yalya.
Pano manda ya yantu yane yalaya wa manda ya muti,Nupya aasoololwe yane yalaaipakizya sana vino yaiombela.
23 Yatalaaombesya sile apa sile sile,Nanti ukuvyala ana aalaponelwa ni ntazi,Pa mulandu wakuti yene pamwi na ya lupwa yaoYalaya ana ya yantu yano Yeova wapaala.
24 Lino yatatala yangama, ndaasuka;Lino yacili yakuvwanga, nduvwa.
25 Mumbulu na kana ka mfwele vilaalila pamwi,Cisama alaalya isote wa ng’ombe,Nupya inzoka ilaalya ulukungu.
Vitalacisa ali wensi nanti ukonona icili consi umu mwamba wane uwa muzilo,” avino Yeova walanda.
Mafutunoti
^ Nanti limwi, “nupya uwafilwa ukufisya imwaka 100 alaalolwa ukuti umutiipwe.”
