Utandiko 18:1-33
18 Pa cisila Yeova walolike kuli Abulahamu pa ncende iya Mamule apaya ivimiti ivikalamba, ala Abulahamu wataikala pa mulyango wi tenti mu nsita ya kasanya nupya ale ikukaya sana.
2 Abulahamu wakatwisye manso nu kulola aonsi yatatu iimilila katalamukila. Lino wayaweni, wasimwile ukufuma pa mulyango wi tenti aya umu kuyakomenkanya, nupya waile afukama.
3 Lyene walanzile ati: “Yeova,* ndi cakuti natemwikwa kuli wewe, napaapata utapuzya umuomvi wako.
4 Lekini tulete manzi akuti mufulale ingazo; alino pa cisila mupuuze umwisika lya muti.
5 Vino imwiza ku muomvi winu, lekini mupeele ivyakulya pakuti mukwate maka. Lyene pa cisila mungatwalilila nu ulendo winu.” Lino yuvwile vivyo yalanzile iyati: “I cisuma. Ungacita vivyo kwene vino walanda.”
6 Lyene Abulahamu waile zuwa zuwa kuli Sala umwi tenti nu kumunena ati: “Cincila! Tola ivipimo vitatu* vyakwe fulaulo umusuma, ukase umunya nu kupangamo imikate.”
7 Nupya Abulahamu waile uku luwa lwa ng’ombe nu kuyasoolola cipambasi umusuma. Watwazile cipambasi uku muomvi, kuti amukome nu kweleka.
8 Lyene Abulahamu watozile bata, mukaka na cipambasi vino wapekinye nu kupeela aonsi yaaya yatatu. Lyene wimilile umupiipi nayo umwisika lya cimuti ala yakulya.
9 Yuzizye Abulahamu iyati: “Nga Sala mamako ali kwi?” Nawe waswike ati: “Ali umwi tenti.”
10 Malaika wenga watwalilile ukulanda ati: “Ndawela kuli wewe umwaka ukwiza pa nsita wakwe ikwene, nupya lola! Sala mamako alakwata umwana umonsi.” Sala nawe wakutikanga ala ali pa mulyango wi tenti uwali ukwi tundu lyakwe malaika.
11 Abulahamu na Sala yaali akote sana. Sala alanga wapuzya imyaka iya kuvyalilapo ana.
12 Lyene Sala watandike ukuseka nu kulanda ati: “Nemo maka iyasila nupya umusambazi wane umukote, uzye i ca cumi ningakwata umwana?”
13 Lyene Yeova uzizye Abulahamu ati: “U mulandu ci uno Sala wasekela nu kulanda ati, ‘Uzye umu cumi ne mukote nene ndakwata umwana?’
14 Uzye kuli Yeova kwaya icitale? Ndawela kuli wewe umwaka ukwiza pa nsita wakwe ikwene, nupya Sala alakwata umwana umonsi.”
15 Lyene Sala wakanyile ati: “Awe ntasesile!” pano uvwile intete. Lyene malaika walanzile ati: “Ee! Watuseka.”
16 Lino aonsi yakatwike nu kutandika ukulungama uku Sodoma, Abulahamu watandike ukuyasukilila.
17 Yeova walanzile ati: “Uzye inene Abulahamu vino nkuya umu kucita?
18 Abulahamu alaya uluko ulukalamba nupya ulwa maka, nupya inko zyonsi izya pano nsi zilapaalwa ukupitila muli aliwe.
19 Pano Abulahamu namumanya ningo nupya insininkizya ukuti alasambilizya ana yakwe aonsi kumwi na amu ng’anda yakwe aalalondelelapo ukulondela masunde yakwe Yeova ukupitila umu kucita ivisuma nu kuya nu mulinganya, pakuti Yeova ace afikilizye vino walavile Abulahamu.”
20 Lyene Yeova walanzile ati: “Inuvwa ukuilizyanya ukukalamba pali Sodoma na Gomola, nupya uluyembu lwao ulwipisya sana.
21 Nimaya nkalole ndi cakuti vino antu yakuilizyanya ivya cumi nanti foo. Pano nkulonda ukumanya.”
22 Lyene aonsi yaya yafumileko nu kulungama ku Sodoma, lelo Yeova wasile na Abulahamu.
23 Lyene Abulahamu wapalime kuli Leza nu kumuzya ati: “Uzye ulonona alungami pamwi na aipe?
24 Nga ndi cakuti umu musumba mwazanwa alungami 50? Uzye ulonona yonsi ukwaula ukwelela antu yayo alungami 50?
25 Utanga ucite ica musango uwo, kuli kuti ukonona umulungami pamwi nu mwipe, nupya utalaleka icacitikila umwipe cicitikile nu mulungami! Utanga ucite ica musango uwo. Uzye kapingula uwa nsi yonsi atalacita icilungame?”
26 Lyene Yeova walanzile ati: “Ndi cakuti nazana antu alungame 50 umu Sodoma, ndelela antu yonsi amu musumba uwo.”
27 Lelo Abulahamu nupya kwene walanzile ati: “Si leka nuzye nupya kwene, we Yeova, nanti icakuti nene wa sile sile nupya nene lukungu.
28 Nga ndi cakuti pa yantu alungame 50 pulila ali 5? Uzye ulonona antu yonsi amu musumba pa mulandu na antu yayo 5 atiyulila?” Leza nawe wamwaswike ati: “Ntalonona umusumba uwo pa mulandu na antu 45.”
29 Lelo nupya kwene Abulahamu uzizye Leza ati: “Nga ndi cakuti mwazanwa ali 40?” Leza wamwaswike ati: “Ntalonona umusumba pa mulandu wa yantu yayo 40.”
30 Watwalilile ukulanda ati: “Yeova, napaapata utasoka, lelo leka nuzye nupya kwene: Nga ndi cakuti mwazanwa sile aali 30?” Leza waswike ati: “Ntalonona umusumba nga nazanamo aali 30.”
31 Lelo watwalilile ukulanda ati: “Yeova napaapata nzumilizye ukuzya nupya kwene: Nga ndi cakuti mwazanwa sile antu 20?” Leza waswike ati: “Ntalonona umusumba pa mulandu wa yantu yayo 20.”
32 Pa kusyalikizya walanzile ati: “Yeova, napaapata utasoka, lelo leka nuzye sile umuku onga: Nga ndi cakuti mwazanwa sile antu 10?” Leza walanzile ati: “Ntalonona umusumba pa mulandu wa yantu yayo 10.”
33 Lino Yeova wamazile ukulanda na Abulahamu, wapisile, Abulahamu nawe waswilile ukwakwe.
Mafutunoti
^ Abulahamu wamile wenga pali ya malaika ukuti “Yeova,” pano malaika wimililangako Leza.
^ Kuli kuti “Ivipimo vitatu ivingalingana umupiipi na makilogalamu 10.”
