Utandiko 31:1-55
31 Mu kuya kwa nsita Yakobo uvwile vino ya mwana Labani aonsi yalandanga, ala yakuti: “Yakobo atatola ivintu vyonsi ivyali ivyakwe ya tata, nupya watalonka ivyuma vii vyonsi ivyali ivyakwe ya tata.”
2 Ndi cakuti Yakobo walola icinso cakwe Labani walolanga ukuti imiyele ino wamulanganga yapusine na ino wamulanganga uku cisila.
3 Lyene Yeova wanenyile Yakobo ati: “Swilila ku mpanga ya vikolwe vyako na kuli ya lupwa yako, nupya ndatwalilila ukuya naawe.”
4 Lyene Yakobo watumile mazwi kuli Lakeli na Leya kuti yamukonke kuno wacemanga iviteekwa,
5 nupya wayanenyile ati:
“Imiyele yakwe ya tata inu yatisenuka, lelo Leza wakwe tata waya nani.
6 Namwe kwene mwamanya ukuti naombela ya tata inu na maka yane yonsi.
7 Ya tata inu yaambepa nu kunsenwila malipilo imiku 10; lelo Leza ataalesile ukuti yancite iciipe.
8 Ndi cakuti yalanda ukuti, ‘Iviteekwa vya maala maala ali malipilo yane,’ ale lyene iviteekwa vyonsi vimavyalanga utwana utwa maala maala; lelo nga yalanda ukuti, ‘Iviteekwa vya mingololozi ali malipilo yane,’ ale iviteekwa vyonsi vimavyalanga utwana utwa mingololozi.
9 Fwandi Leza watolanga iviteekwa vyakwe ya tata inu nu kuvipeela kuli nene.
10 Mu nsita ino iviteekwa vikaya apiipi nu kukwata maele, nalosile ciloto muno naweni kuno ya sawe aakwelanga pa zya kaci yaali ni mingololozi, aa maala maala na amatoni matoni.
11 Lyene malaika wakwe Leza wa cumi wangamile umu ciloto ati, ‘Yakobo!’ nani naswike inti, ‘Mukwai.’
12 Watwalilile nu kunena ati, ‘Lola ya sawe yonsi aakukwela pa zya kaci yali ni mingololozi, aa maala maala na matoni matoni, pano indola vyonsi vino Labani akucita kuli wewe.
13 Nene Leza wa cumi uwalolekile kuli wewe uku Betele, pa ncende ino witiile mafuta pi we lino wimike nupya pano walapiile umulapo kuli nene. Fwandi katuka, ufume umu mpanga yii nu kuswilila uku mpanga ino wavyaliilweko.’”
14 Lino Lakeli na Leya yuvwile vivyo, yanenyile Yakobo iyati: “Kusi icili consi icasyala umu ng’anda yakwe tata cino tungapyana.
15 Ya tata yakatulola wa yantu aku mpanga yuze, pano yaatukazya nupya yakaomvya impiya zino mwalipile.
16 Ivyuma vyonsi vino Leza waposile ya tata, i vitu nupya i vya yana itu. Fwandi citini consi cino Leza watamunena ukucita.”
17 Lyene Yakobo wakatwike nu kukwezya ana yakwe na ya mama yakwe pa ngamali,
18 nupya wasenzile iviteekwa vyakwe vyonsi ni vyuma vyonsi vino walonsile umu Padani-alamu nu kuya kuli Isaki isi umu mpanga ya Kenani.
19 Lino Labani waile umu kupela imfwele, Lakeli wasyazile amwiila utulubi.
20 Nupya Yakobo waomvizye umucenjelo kuli Labani umwina Alamu, pano ataamunenyile ukuti wali nu kupita.
21 Wapisile aya alamba nu Luzi,* kumwi ni vintu vyonsi vino wakweti. Lyene walungime ku ncende ya myamba iya Gilyadi.
22 Pa wanda wakwe citatu, Labani uvwile ukuti Yakobo watapuuka.
23 Fwandi wasenzile aina* yakwe nu kumukonka pa lwendo ulwa manda 7 nupya wamuzanyile umu ncende ya myamba iya Gilyadi.
24 Lyene Leza walolike kuli Labani umwina Alamu umu ciloto usiku nu kumunena ati: “Ucenjele pali vino ukulonda ukulanda kuli Yakobo, viye ivisuma nanti iviipe.”
25 Fwandi Labani waile kuli Yakobo, Yakobo alanga watapangila itenti ku mwamba nupya Labani na ina yakwe nayo alanga iyapangila matenti umu ncende ya myamba iya Gilyadi.
26 Lyene Labani uzizye Yakobo ati: “U mulandu ci uno wacitila vii? U mulandu ci uno watuomvezya umucenjelo nu kusenda ana yane kwati anaci yano iyasendwa umu nkondo?
27 U mulandu ci uno wapuukiile nu kuomvya umucenjelo ukwaula ukuti uneene? Ndi cakuti uneena, nga nalesile ukuti upite ni nsansa nupya nga nakwimbiile inyimbo nu kukulizizya ingoma na mazeeze.
28 Lelo utalesile ukuti ntonsole aizikulu yane na ana yane. Watucita ica uwelewele.
29 Ninkwata maka ya kukucita iciipe, lelo Leza wakwe tata wako iwaneena usiku wati, ‘Ucenjele vino ukulonda ukulanda kuli Yakobo, viye i visuma nanti viipe.’
30 Lyene watupita pano walondanga ukuswilila ku ng’anda yakwe tata wako, nomba u mulandu ci uno watunjiila ya leza?”
31 Yakobo waswike Labani ati: “Napuusile pa mulandu wakuti nuvwile intete, nelenginye ukuti, ‘Mungampoka ana inu uku maka.’
32 Wensi wino mumazana ali na ya Leza inu, alinzile ukukomwa. Londelezyini muli vino nkweti, pa manso ya ina itu nu kutola ivintu vinu.” Lelo Yakobo ataamanyile ukuti Lakeli u wivile.
33 Labani walondelizye umwi tenti lyakwe Yakobo nu mwi tenti lyakwe Leya nu mwi tenti lya yaomvi yaili akazyana, lelo ataazanyilemo ya leza. Lyene waile umwi tenti lyakwe Lakeli.
34 Lelo Lakeli alanga watatola ivilubi nu kuvika muli vino anaci ikalilanga pa ngamali, nupya wikaliilepo. Fwandi Labani walondelizye umwi tenti lyonsi lelo ataavizanyile.
35 Lyene Lakeli wanenyile isi ati: “Mutasoka musambazi, ntanga nkatuke pali mwemwe, pano indi ku mwezi.” Fwandi Labani walondelizye sana nomba ataazanyile ivilubi.
36 Lyene Yakobo wasosile nu kutandika ukukalipila Labani. Wanenyile Labani ati: “I cani cino induvyanya, nupya u luyembu ci luno incita ulwalenga kuti munkonke mu ukali?
37 Lyene vino imulondelezya umu viya vyane vyonsi, i cintu ci icinu cino imuzana? Cikiini pa nkoleelo ya ina yane na ina inu, nupya lekini kuti ayano yatupingule.
38 Pa myaka yii 20 ino nikala namwe, imfwele zinu ni mbuzi zinu zitaatala zyapulumula, nupya ntatala nalya imfwele inu.
39 Ntaatazile imuletele inyama ili yonsi iyakomilwe uku vilyanyi. Wayanga u mulandu wane. Nupya ndi cakuti yamwi iya inyama umusanya nanti usiku, mwandifyanga.
40 Musanya napyanga na kasanya nupya usiku nazakazanga, nafilwanga ukukasula.
41 Inikala imyaka 20 umu ng’anda inu. Namuombela pa myaka 14 pakuti mumpeele aninu akazyana yaili alino ni myaka 6 namucemela iviteekwa vinu nupya mwasenula malipilo yane imiku 10.
42 Ndi cakuti Leza wakwe tata, Leza wakwe Abulahamu nupya Leza wino Isaki akatiina ataya nani, nga mwalesile ukuti impite sile minwe. Lelo Leza watalola ukucula kwane nu kuombesya kwane, uli mulandu uno iwamukalipilila usiku.”
43 Lyene Labani wanenyile Yakobo ati: “Anaci yaa aanane na ana yaa a izikulu yane ni viteekwa vii i vyane na vyonsi vino ukulola i vyane nupya i vya yana yane akazyana. Nga ningacita uli iciipe kuli aliyo nanti ku yana yao?
44 Fwandi leka tupangane upangano, wewe nani, nupya umaya ali ukambone pali sweswe.”
45 Fwandi Yakobo watozile iwe nu kulimika.
46 Lyene wanenyile aina yakwe ati: “Tolini mawe!” Nayo yatozile mawe nu kuyatulika pali pamwi. Lyene pa cisila yaliilile ivyakulya pa mawe kwene yayo yano yatuulike.
47 Nupya Labani watandike ukwama umutumba uwo ukuti Yegala-sahaduta,* nomba Yakobo wene wamanga umutumba uwo ukuti Galeedi.*
48 Lyene Labani walanzile ati: “Mutumba uu uwa mawe aali ukambone pali nene naawe ilelo.” Ali mulandu uno mutumba uwo wamilwanga ukuti Galeedi,
49 nupya wamwanga nu kuti Ulupungu Lwa Mulinzi, pano Labani walanzile ati: “Si Yeova atwalilile ukutulinda ndi cakuti twapaatukana.
50 Ndi cakuti ulacuzya anane nu kutandika ukutwala ya mama yauze ukulunda pa yana yane, nanti icakuti kusi umuntu aakutulola, uwaiusya ukuti Leza alaya akambone pali wewe nani.”
51 Labani watwalilile ukunena Yakobo ati: “Lola umutumba wa mawe aewu, nupya ni we lino inimika pakasi kakwe wewe nani aeli.
52 Mutumba uu uwa mawe alino ni we lii vikwimililako ukambone, ukuti ntalapuzya pa mutumba uu uwa mawe nu kwiza kucita iciipe, nupya naawe utalapuzya pa mutumba uu uwa mawe na pi we lii nu kwizancita iciipe.
53 Leka Leza wakwe Abulahamu nupya Leza wakwe Nawoli, Leza wakwe isi wao, atupingule.” Nupya Yakobo walafile umulapo umwi zina lyakwe Leza wino Isaki isi watiinanga.
54 Lyene pa cisila Yakobo wapeezile ilambo umu mwamba nupya wamile aina yakwe kuti yalye ivyakulya. Fwandi yaliile nu kulala usiku umu mwamba kwene.
55 Lelo Labani wakatwike katondotondo nupya watonswile aizikulu yakwe na ana yakwe akazyana nu kuyapaala. Lyene wakatwike nu kuswilila ukwakwe.
Mafutunoti
^ Kuli kuti Uluzi Lwa Yufuleti.
^ Nanti “ya lupwa.”
^ Izwi lii ilya Cialamaiki likapiliula ukuti “Ukambone wa Mutumba.”
^ Izwi lii ilya Ciebele likapiliula ukuti “Ukambone wa Mutumba.”
