1
Uzye Naya Uli?
I VYANI VINO UNGACITA?
Elenganya ukuti vii vikucitika: Karen ali ku pate patatala papita na mamineti 10 pano iwafikila, lyene uvwa izwi lya mukaya kwi tundu lyakwe.
“I cani cino watuwimililila sile papo?”
Lyene Karen lino wapiliuka kuti alole umuze Jessica walola alemile ma botolo yaili ayule. Watamanya kuti muli wengwa. Jessica watola ibotolo lyonga nu kupeela Karen alino wati, “Usi mwance sana uwakuti uwafilwa nu kucina, uzye wewe mwance vwile?”
Karen akulonda kukana, lelo kwene Jessica acuza wakwe. Nupya Karen atakulonda kuti muze aelenganye ukuti wasisita. Cuze, Jessica waya pa vyuza visuma vino Karen wakwata. Nupya ndi akumwa uwengwa, asimwa sana. Karen akuivwanzya ati: ‘I vyakumwa sile vii, vitaya wa kuomvya milembo ikavulunganya uongo.’
Ndi wewe wali Karen, ungacita uli?
TALA ELENGANYA PALI VII!
Pa kuti upingulepo ningo ivyakucita ngi vya musango uu vyakucitikila, ulinzile kuya ni miyele isuma. Imiyele ii i miyele ino wakwata ikalenga umanye ningo vino waya na vino ungacita. Nga wamanya vivyo,lyene ulakwata maka yakuitungulula mu umi ukucila kuti yauze aliyo yakutungulula.—1 Kolinto 9:26, 27.
Uzye ungalundulula uli amaka yayo? Ukwasuka mauzyo amalondelelapo kumakulangilila ningo pa kwambila.
1 I MIYELE CI INO NAKWATA INGALENGA NTWALILILE UKUYA NU UTAILO?
Ukumanya ivintu vino mwacenjela sana ukuomba ni miyele isuma ino mwakwata cilalenga mutwalilile ukukomelako umu utailo.
VINO TUNGASAMBILILA MULI BAIBO: Umutumwa Paulo walemvile ati: “Nemo ntange ndande ndi vino yene yakalanda, lelo manyile vingi.” (2 Kolinto 11:6) Ukuwelenga Malembelo nu kwelenganyapo sana, kwalenzile Paulo ukutwalilila ukukoma umu utailo lino yauze yamucuzyanga. Atalenzile ivintu ivipe vino yauze yalandanga uku mutoovola.—2 Kolinto 10:10; 11:5.
ICECETE WEMWINECO: Lemba apisika, icaupe cino wakwata nanti umulimo uno wamanya sana ukuomba.
Lyene landa imiyele imwi ino wakwata sana. (Limwi ukasakamala sana antu. Limwi waya na ukapekape. Nanti limwi ukasunga sana insita.)
2 UUTONTE CI UNO NAKWATA?
Viivi kwene vino ceni umukome cuze akaputuka ndi cakuti pali pamwi apali indema, avino cingaya na kuli wewe ndi cakuti waleka utonte uno wakwata watandika ukukutungulula, imiyele yako ingasenuka nupya ungatandika ukuya ni miyele iipe.
VINO TUNGASAMBILILA MULI BAIBO: Paulo wamanyile utonte uno wakweti. Walemvile ati: “Kwene mwenzo wane onsi ukazumilizya Masunde yakwe Leza. Lelo mu mwili wane mwene nkazana isunde lyuze ilikalwisya sunde lino melenganyo yane yakazumilizya. Isunde lii i likantwala ku kwifya.”—Loma 7:22, 23.
ICECETE WEMWINECO: I viyelezyo ci ivipe vino ulinzile ukuta?
3 AMAUYO CI YANO NIMIKA?
Uzye ungingila muli motoka nu kunena akupisya ukuti aazinguluka sile pali pamwi mpaka amafuta yasile? Citanga ciye ica mano ukucita cico pano ni mpiya izingi zingononeka.
I vyani vino ukusambililako? Ndi cakuti utuwimika mauyo cingakwazwa ukumanya vino umi wako ulaya nupya cilalenga utakazinguluka sile pali pamwi. Ulakwata ukwakuya nu kumanya ivya kucita pakuti ufike kuko.
VINO TUNGASAMBILILA MULI BAIBO: Paulo walemvile ati: “Nemo nkasimula kuti mfikilizye simwililo lyane.” (1 Kolinto 9:26) Ukucila ukulacita sile ivyacicitecite, Paulo wimike amauyo umu umi wakwe nu kutwalilila ukuombesya pakuti ayafikilizye.—Filipi 3:12-14.
ICECETE WEMWINECO: Lemba apisika, amauyo yatatu yano wimika yano ukulonda ukufikilizya umwaka ukwiza.
4 I VYANI VINO NAZUMILAMO?
Ndi cakuti wamanya ningo ningo vino waya, ungaya kwati icimuti cino yaalema icitanga cipone nandi umuza ungakoma uli
Ukwaula ukuzumila, utange usininkizye. Wakwe vino lumvu akacita, ungaakonkelezya sile vino auzo yakucita, nupya cii cingalangilila ukuti usiicitila sile ivintu wemwineco.
Nomba ndi cakuti vino ukucita vyativisintilila pali vino wazumilamo, ulatwalilila ukuya ni miyele ino waya nayo asi mulandu na vino yauze yakucita.
VINO TUNGASAMBILILA MULI BAIBO: Nanti icakuti kasema Danieli wali acili umwance, ‘waipingulanga’ ukuti alinzile ukuvwila amasunde yakwe Leza, nanti icakuti kuno wali kwali ukutali na kuno ulupwa lwakwe lwali. (Danieli 1:8) Ukucita vivyo kwalenzile atwalilile ukucita ivintu ukulingana na vino umwineco walondanga. Danieli watwalilile ukukonka vino wazumilemo.
ICECETE WEMWINECO: I vyani vino wazumilamo? Uzye wazumila muli Leza? Ndi avino caya u mulandu ci uno wazumilila vivyo? I vyani vyalenga uzumile ukuti Leza akuno waya?
Uzye wazumila ukuti ndi cakuti uli ni miyele ino Leza akalonda tuye nayo ilakwazwa? Ndi cakuti wazumila vivyo u mulandu ci?
Uzye pali vii ungatemwapo cani: ukuya wifwa ilikaululwa nu muza unono sile cilawanda nanti cilansita nanti ukuya wa cimuti icitangapona nanti kungaya icimuza icikome uli? Twalililini ukuya ni miyele isuma ingamukomya, cilalenga muye wa cimuti icimililila ndi. Nupya cilamwazwa ukwasuka iuzyo lyakuti Uzye naya uli?
Limwi Mungatemwa Ukulolako na Vii
ACANCE YAKAUZYA
I Vyani Vino Mfwile Ukumanya pa Wengwa?
Sambilila umanye vino ungataluka ivintu ivingakuletelela ku uteeko, kuzewana, kuomviwa mu nzila ya uzelele, kuteekwa uzya, ni imfwa.
ACANCE YAKAUZYA
Ningacimvya Uli Matunko?
Lola ivintu vitatu ivicindame ivingakwazwa ukucimvya matunko ya kucita iviipe.
MAVIDYO YAKWE TUKADOLI TWAKULENGA
Utakonkelezya Auzo!
Vintu 4 vino ungacita pakuti wakwata amaka ya kukana umupatikizya wa yauzo.
