ISAMBILILO 11

Vino Mungacita Pakuti Mwaipakizya Ukusambilila Baibo

LIZYINI

Uzye mwatala mwelenganyapo ukutandika ukuomba umulimo umwi, nomba imulola ukuti umulimo uwo utale? Pakuti umulimo uwo wanguke limwi mungauomba panono panono. Vikwene avino caya nu ku kubelenga Baibo. Limwi mungayuzya ukuti, ‘Nimatandikila pi?’ Mwi sambililo lii, tumalanda pa vintu vimwi ivyangupale ivingamwavwa ukulaipakizya lino mukubelenga nu kuisambilizya Baibo.

1. U mulandu ci uno tulinzile ukulabelengela Baibo lyonsi?

Umuntu aakabelenga lyonsi Baibo, nanti “amazwi yakwe Yawe [nanti Yeova]” akaya ni nsansa nupya akatunguluka. (Belengini Masamu 1:1-3.) Mungatandikilapo ukulabelenga Baibo, apa mamineti anono cila wanda. Nga mwaelezya sana ivyeo ivyaya umwi Izwi lyakwe Leza, mulaipakizya ukubelenga Baibo.

2. I cani icilamwazwa ukuipakizya ukubelenga Baibo?

Pakuti tuipakizye lino tukubelenga Baibo, tulinzile ukuta panono nu kwelenganya pali vino twabelenga. Tulinzile ukubelenga nu kwelenganyapo. (Yoswa 1:8) Lino mukubelenga mwayuzya amauzyo wakwe yaa: ‘Uzye vino nabelenga vikunsambilizya cani pali Yeova Leza? Ningaviomvya uli umu umi wane? Ningaomvya uli ivikomo vii uku kwazwa yauze?’

3. Mungacita uli pakuti mwakwata insita ya kubelenga Baibo?

Uzye cikamutalila ukuzana insita ya kubelenga Baibo? Sweingi cikatutalila. Mwaezya ukuomvya “ningo insita.” (Efeso 5:16) Mungacita vivyo nga mwatantika insita ya kubelenga Baibo cila wanda. Yamwi yatantika ukulabelenga Baibo cila katondo. Yamwi nayo yasoololapo insita yuze, wakwe insita ya kasanya nanti lino ya kupuuza. Yauze nayo yakabelenga Baibo amanguzi lino yatatala yalaala. Nga mwemo insita ci ingamuzipila?

LONDELEZYINI NA VYUZE

Sambililini vino mungacita pakuti mwaipakizya ukubelenga Baibo. Mwapekanya ningo pakuti mwasambilila masambililo acindame lino mukuisambilizya Baibo.

Wakwe viivi kwene vino tungasambilila ukutemwa ukulya ivyakulya ivipusanepusane, avino tungasambilila nu kutemwa ukubelenga Baibo

4. Sambililini vino mungacita pakuti mwaipakizya ukubelenga Baibo

Limwi cingatutalila ukutandika ukubelenga Baibo. Lelo tungaya nu lusala lwa kucita vivyo, wakwe vino umwi aangalondesya ukulya ivyakulya vino atatala walyapo. Belengini 1 Petulo 2:2, alino mulanzyanye iuzyo lii:

Ndi cakuti mukubelenga Baibo cila wanda, uzye mukwelenganya ukuti mungatandika ukuipakizya nu kulondesya ukulabelengelapo na vyuze?

Tambini VIDYO pakuti mulole vino yamwi yatandike ukuipakizya ukubelenga Baibo. Lyene mulanzyanye amauzyo atiyalondelelapo.

VIDYO: Acance Yasambilila Kutemwa Izwi Lyakwe Leza (5:33)

Iintazi ci zino acance ali muli vidyo yacimvizye?
I vyani ivyayavwile ukutwalilila ukubelenga Baibo lyonsi?
Uzye yacisile uli pakuti yaipakizya sana ukubelenga Baibo?

Ivingamwavwa ukutandika ukubelenga Baibo:

Soololini Baibo ino yasenula ningo, umwaya amazwi angupale yano munguvwa. Mungezyako Baibo ya New World Translation ndi cakuti akuno yaya umu lulimi lwinu.
Tandikilinipo ukubelenga amabuku ya muli Baibo yano mwatemwa sana. Pakuti mumanye vino mungacita, lolini cati ikuti“Tandikini Ukubelenga Baibo.”
Mwalemba vino mwabelenga. Mungaomvya cati yakuti “Mwalemba Vino mukubelenga Muli Baibo” iili umu lupapulo kwene luu.
Mwaomvya JW Library^®. Mungabelenga nanti ukukutika kuli Baibo ikopelwe limwi ukuli konsi ukuomvya foni, tabuleti nanti utuombelo tuze.
Mungaomvya Ivyeo ivyaya umu kabuku kakuti Kabuku Aka Kutwazwa Ukusambilila Izwi Lyakwe Leza. Mwaya mamapu na macati, ivingalenga mwaipakizya lino mukubelenga Baibo.

5. Mwapekanya vino mumasambililapo

Belengini Masamu 119:34, alino mulanzyanye iuzyo lii:

U mulandu ci uno cazipila ukupepa lino mutatala mwatandika ukubelenga Baibo nanti lino mutatala mwatandika ukuisambilizya?

Mungacita uli pakuti mwaipakizya lyonsi lino mukuisambilizya? Lino mukupekanya vino mumasambililapo umwi buku lii, mwaezyako ukucita vii:

Mwabelenga amapalaglafu ya kutandikilapo umwi sambililo.
Mwalondelezya nu kubelenga amalembo alimo, nupya mwalola vino iyalemana na vino mukusambililapo.
Mungasila ivisinka ivikwasuka iuzyo lilyo; kucita vii kungamwazwa lino mukulanzyanya.

Uzye imumanya?

Ya Nte Yakwe Yeova yaomvyapo Mabaibo apusanepusane. Nomba, twatemwa sana Baibo ya New World Translation of the Holy Scriptures pano yangupala, ikauvwika, nupya mwaya izina lyakwe Leza.—Lolini Cipande ca pa intaneti “Uzya ya Nte Yakwe Yeova Yaikwatila Baibo?”

YAMWI YAKALANDA UKUTI: “Ukusambilila Baibo u mulimo ukome sana. Ntakwata insita na maka akucita vivyo.”

Uzye mukwelenganyapo uli?

VINO TWASAMBILILA

Pakuti mwaipakizya lino mukubelenga Baibo mwatantika insita yakubelengelapo, ukupepa pakuti mwauvwikisya vino mukubelenga, nu kupekanya vino mumasambililapo.