TWALILILINI UKUYA AITEYANYE!
U mulandu ci Uno Antu Yalekela ukuya ni Miyele Isuma Uku Antu Yauze?—I Vyani Vino Baibo Yalandapo?
Antu anono sile alino yano yali ni miyele isuma ndakai. Aalwale yamwi yakapusana na ya dokota; Antu aakaya umu kulya ivyakulya umu vikuulwa muno yakakazizya ivyakulya, yasilanga ukutaizya nupya yataya nu mucinzi kuli yano yakayapekanyizizya; antu yamwi nayo aakakwela umu ndeke yakasaalula nanti ukuuma yano iyayasenda; ana yacipondoka nayo yakasaalula, ukutuka alino sile nu kuuma ya mwalimu yao; nupya antu yamwi aya umu vikanza vya miteekele yakaacita iviipe, yamwi nayo ale yakuilumba ukuti yaya ni miyele isuma.
Muli Baibo mwaya ivingazwa sana umuntu ukuya ni miyele isuma. Nupya Baibo yalanda na pa mulandu uno antu aingi yalekela ukuya ni miyele isuma ndakai.
U mulandu ci Uno Antu Yalekela ukuya ni Miyele Isuma Uku Antu Yauze?
Umu nsi muli sana antu aataya ningo nupya aataya ni miyele isuma.
Ukulingana na vino kaungwe kamwi (Gallup) kalondelizye, antu aakaikala umu United States of America yawelela sana pansi umu kulanga imiyele isuma ukucila vino yali apa myaka 22 ukucisila.
Umu kulondelezya kuze ukwacitike, yuzizye antu ukucila pali 32, 000 aakaikala umu mpanga 28, nupya aingi (65 pesenti) yalanzile ukuti antu aingi yali sana ni miyele iipe ukucila vino cali mpiti.
Baibo yasoowile pa miyele ii iiliko ndakai.
“Umu manda akusyalikizya mulaya insita izitale sana. Pano antu . . . yalaya na mataki, yalaitutumula, amiponto, aasiuvwila avyazi yao, aasitaizya, . . . aankalwe, aatatemwa usuma.”—2 Timoti 3:1-3, Baibo wa Malembo ya Nsi Ipya.
Pakuti mumanyilepo na vyuze pali vino usesemo uu ukufikiliziwa, Belengini icipande icakuti “Did the Bible Predict the Way People Think and Act Today?”
Icingalenga antu ukuya ni miyele isuma
Lino tukwikala umu nsi ii umwaya antu aataya ni miyele isuma, antu aingi yazana ukuti Baibo yayazwa sana ukuya ni miyele isuma. Amazwi ayamo “Yaya amuyayaya.” (Masamu 111:8) Kusunda kumwi ukwayamo aeku:
Vino Baibo yalanda: “Acino vyonsi vino mukalonda ukuti antu yamucitile avino namwe mulinzile ukuyacitila.”—Mateo 7:12.
Vino cikapiliula: Tulinzile ukulalanga icikuuku alino nu mucinzi kuli yauze wakwe vino tungatemwa yatucitile.
Vino Baibo yalanda: “Lyene vino mwata ukubepa, mwalanda icisinka uku yauzo.”—Efeso 4:25.
Vino cikapiliula: Tulinzile ukuya a cisinka muli vyonsi vino tukacita alino na vino tukalanda.
Pakuti mumanyilepo na vyuze api lyasi lii, belengini:
Ulupungu lwa Mulinzi ulwakwata umutwe wakuti “Icingamwazwa Ukumanya Icisuma ni Ciipe.”
Cipande icakuti “Tolerance—How the Bible Can Help.”
Limwi Mungatemwa Ukulolako na Vii
LUPUNGU LWA MULINZI
I Cani Cingatwazwa Pakuti Tukakwate Umi Usuma ku Nkoleelo?
Ilingi nga tukulonda ukupingula pali vimwi tukauzyako umuntu uwikolo pali sweswe nupya uwamanya ivintu ukutucila. Umu nzila ili imwi kwene tungazana utunguluzi utailwe pakuti tukaye nu umi usuma ku nkoleelo.
MASAMBILILO AA MULI BAIBO AACINDAME
Tungasininkizya Uli Ukuti Vino Baibo Ikalanda I Vya Cumi?
Ndi cakuti Baibo yalemvilwe na Leza, ale yene yapusana sana na mabuku yonsi yano antu yalemba.
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.
