ISUNDE lyakwe Mose lyazumilizye ukulapa pano calinga ukucita vivyo. Nomba antu yatandike ukulapa icilapelape umu manda yano Yesu wali pano nsi, antu yalapanga sile apa mazwi yonsi yano yalanda. Ukucita vii kwalanganga ukuti vino umwi akulanda i vya cumi, nomba Yesu wakanyizye ukucita vivyo pa miku iili. Wasambilizye ukuti: “Lelo lino mukuzumila mazwi inu muvwange muti, ‘Ee’ nanti lino mukukana muti, ‘Awe.’”—Mate. 5:33-37; 23:16-22.

Ukulingana ni buku limwi (Theological Dictionary of the New Testament) likati, “Vino Ayuda yatemilwe sana ukulapa muli vyonsi vino yalandanga” vikazanwa umwi buku lino yakati Talmud, ilikalondolola ningo sana ivintu vino Ayuda ndi yalapa yalondekwanga ukufikilizya alino na vino vitacindime ukuti yafikilizye nanti yalapa.

Asi Yesu sile uwapasile ukulapa kwa musango uu. Umu Yuda uwamanyile sana ilyasi lya mpiti wino yakaama ukuti Flavius Josephus walanzile pa Ayuda aipaatwile ukuti: “Antu kwene ya yazumiile ukuti ukulapa kwaifile sana ukucila ukusomba. Yalolanga ukuti ndi cakuti umuntu walapa pakuti sile yauze yazumile vino akulanda ukuti ivya cumi, lyene umuntu wiyo ala u waufi.” Ivyalembwa vya Ayuda vino yakaama ukuti Mano yakwe Sirach, navyo vikalanda ukuti: “Umuntu uwatemwa ukulapa ala asiuvwila masunde.” Yesu wapasile ukulapa sile na patalinzile. Fwandi ndi cakuti lyonsi tukalanda icumi, tutalinzile ukulapa pakuti sile antu yazumile vino twalanda.