Uzye Leza a Weni Izina? Leza umwineco walanda ukuti “Nene indi Yawe” [Yeova]. Lilyo ali zina lyane. (Ezaya 42:8) Izina lyakwe Leza likazanwa imiku 7,000 muli Baibo. Lelo, mu mabaibo aingi yano yasenula yafumyamo izina lyakwe Leza nu kupyanikizyapo mazina ya mucinzi, wakwe “Umwene.” Leza akalonda ukuti muye ya cuza yakwe, fwandi akamukomelezya ukuti ‘mwaama api Izina lyakwe.’—Masamu 105:1, NWT.

Mazina ya Mucinzi Yakwe Yeova. Baibo ikalanda pali Yeova ukuomvya mazina ya mucinzi, wakwe “Leza,” “Uwa Maka yonsi,” “Kaumba,” “Tata,” na “Mwene.” Mu mapepo aingi alembwa muli Baibo yaomvya mazina  ya mucinzi alino ni izina lyakwe kwene ilyakuti Yeova.—Danieli 9:4.

Vino Leza Waya. Leza u mupasi usiloleka. (Yoane 4:24) Baibo ikalanda ukuti “pasi umuntu watala alola Leza.” (Yoane 1:18) Baibo ikatunena pali vino Leza akauvwa. Antu yangamulenga ukuya nu ulanda nanti kulenga aye ni nsansa.—Mapinda 11:20; Masamu 78:40, 41.

Miyele Isuma Yakwe Leza. Leza ataya na kasozi ku antu amu nko zyonsi nanti kuno yakulila. (Milimo 10:34, 35) Nupya wakwata “uluse na mizu, asisoka zuwa, uwazula nu kutemwa kwa manda pe, uwatailwa” (Kufuma 34:6, 7) Lelo wakwata miyele 4 icindamisye sana.

Maka. Pa mulandu wakuti a “Leza wa maka yonsi,” wakwata sana amaka ya kucita vyonsi nu kufikilizya vyonsi vino walaya.—Utandiko 17:1.

Mano. Leza wakwatisya mano kuluta ali wensi. Fwandi ali mulandu kwene uno Baibo ikalandila ukuti “wenga uwaya uwa mano.”—Loma 16:27.

Mulinganya. Leza lyonsi akacita visuma. “Ivicitwa vyakwe vyaya ivifumaluke nupya visi vyalufyengo.”—Malango 32:4.

Kutemwa. Baibo ikati “Leza u kutemwa.” (1 Yoane 4:8) Leza asilanga sile kutemwa, lelo ali kutemwa kwene. Kutemwa kukalenga acita vyonsi vino akacita nupya vikatwazwa mu nzila izingi.

Ucuza Wakwe Leza na Antu. Leza a Tata witu uwaya nu kutemwa. (Mateo 6:9) Ndi cakuti twamutaila, tungaya ya cuza yakwe. (Masamu 25:14) Leza kwene aliwe akalonda ukuti tupalame kuli aliwe kupitila umwi pepo alino nu ‘kwika masakamiko itu pali aliwe pano wene akatusakamala.’—1 Petulo 5:7; Yakobo 4:8.

Yesu Asi Leza. Yesu waiyela pano ali muntu wino Leza waiumbiile sile umwineco. Ali mulandu uno Baibo ikaamila Yesu ukuti umwana wakwe Leza. (Yoane 1:14) Lino Yeova waumvile Yesu, wamuomvizye ukuya “ciinda wa milimo” ku kuumba ivintu kumwi na antu yonsi.—Mapinda 8:30, 31; Kolose 1:15, 16.

Yesu Klistu atatazile alande ukuti a Leza. Lelo walondolwile ukuti: “Nafuma kunoli, nupya aliwe uwantuma.”  (Yoane 7:29) Lino walandanga na wenga uwa mu alondezi yakwe, Yesu wamile Yeova ukuti “Tata, ali So, Leza wane nupya Leza winu.” (Yoane 20:17) Lino Yesu wafwile, Yeova wamutuutulwile nu umi wa kwi yulu nupya wamupeezile amaka nupya wikazile ukwi kasa lilunji lyakwe Leza.—Mateo 28:18; Milimo 2:32, 33.

Yesu Klistu Angamwazwa Kupalama Kuli Leza

Yesu wizile pano nsi ku kutusambizya pali Isi. Yeova umwisikulu walanzile pali Yesu ukuti: “Wii, u Mwanane mukundwe, mwamuvwa!” (Mako 9:7) Yesu wamanyile Leza kuluta muntu ali wensi. Walanzile ukuti: “Pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.”—Luka 10:22.

Yesu wakweti miyele ino Leza wakwata. Yesu wakolanyanga sana imiyele yakwe Isi ali cino walandiile ukuti: “Wino wandola, walola na Tata kwene.” (Yoane 14:9) Pa mulandu wakuti Yesu wakolanyanga kutemwa kwakwe Isi muli vino walandanga na muli vino wacitanga, calenzile antu yapalame sana kuli Leza. Walanzile ukuti: “Nene ndi nzila, ni cumi, nu umi. Pasi umwi angiza kuli Tata suka wizila muli nene.” (Yoane 14:6) Walanzile nu kuti: “Ya kapepa acumi yalapepa Tata mu mupasi nu mu cumi, pano ali ndi yaa, ayano Tata watemwa kuti yamupepa.” (Yoane 4:23) Elenganyini pa mazwi yayo! Yeova akalonda antu wakwe mwemwe akulonda kumanya icumi pali aliwe.