Uzye Leza Akauvwa Mapepo Itu?
Uzye mwatala mwayuvwapo ukuti Leza asikwasuka amapepo inu? Nga vino cili, ale mutaya mwenga. Aingi yatala yapepapo ukuti Leza ayazwe, nomba intazi zicili zikatwalilila. Uzye cikupiliula ukuti Leza asilonda ukuvwa amapepo itu? Awe foo! Baibo ikatunena ukuti Leza akauvwa amapepo ndi cakuti twapepa umu nzila isuma. Lekini tulole vino Baibo ikalanda.
LEZA AKAKUTIKA.
“Pano wemo ukauvwa amapepo, antu yonsi yamaizanga kuli wewe.”—Masamu 65:2.
Antu yamwi yakapepa pa mulandu wakuti yakauvwa ningo, nanti cakuti yatazumila ukuti kwaya umwi akauvwa mapepo yao. Lelo ipepo asi cintu cimwi cino tukacita pakuti tuvwe ningo nanti ukuzizimizya intazi. Nomba Baibo ikatunena ukuti: “Wene [Yeova] * waya umupipi na yonsi akakuuta kunoli, yonsi akakuuta kunoli umusi mwisyente. . . . akauvwa ukukuuta kwao nu kuyatuula.”—Masamu 145:18, 19.
Fwandi tungasininkizya ukuti Yeova Leza akauvwa mapepo yakwe yakapepa yakwe. Watunena ukuti: “Alino lyene mulampunda nu kumpapata, nga nani ndamuvwa.”—Yelemiya 29:12.
LEZA AKALONDA UKUTI MWAPEPA KULI ALIWE.
‘Mwapepa nsita zyonsi.’—Loma 12:12.
Baibo ikatukomelezya ukutwalilila ukupepa nu kulapepa insita zyonsi. Ukwaula nu kutwisika Yeova Leza akalonda twapepa kuli aliwe.—Mateo 26:41; Efeso 6:18.
U mulandu ci uno Leza akalondela ukuti twapepa kuli aliwe? Elenganyini pali cii: U muvyazi ci asiuvwa ningo ndi cakuti umwana akulenga uwazwilizyo kuli aliwe? Ukuya kwene, limwi umuvyazi angamanya vino mwana akulondekwa, nomba nga uvwa kuno umwana akuleenga uwazwilizyo cikalenga amanye ukuti umwana wamutaila nupya wapalama sana kuli aliwe. Vikwene, avino cikaya nga tukupepa kuli Yeova Leza, tukalanga ukuti twamutaila nupya tukalonda ukupalama kuli aliwe.—Mapinda 15:8; Yakobo 4:8.
LEZA AKAMUSAKAMALA SANA.
“Ikini masakamiko inu pali Leza, pano wene akamusakamala.”—1 Petulo 5:7.
Leza akalonda ukuti twapepa kuli aliwe pa mulandu wakuti watutemwa nupya akatusakamala. Wamanya intazi zino twakwata ni vikatusakamika nupya akalonda ukutwazwa.
Umwene Davidi wapepanga kuli Yeova Leza umu umi wakwe onsi pakuti amwazwe nupya wamunenanga vino welenganyanga na vino wayuvwanga. (Masamu 23:1-6) Uzye Leza wayuvwanga uli pali Davidi? Leza watemilwe sana Davidi nupya wasukanga mapepo yakwe aingi. (Milimo 13:22) Naswe kwene Leza akaasuka mapepo itu pano akatusakamala.
“NEMO NATEMWA YAWE [YEOVA] PANO AKANGUVWA”
Yaa amazwi amuli Baibo yano kalemba umwi uwa masamu walemvile. Wamanyile ukuti Leza waswike mapepo yakwe, nupya cico camwazwile sana. Wayuvwile ukuti watapalama sana kuli Leza nupya calenzile akwate amaka akuzizimizya intazi zya mu umi.—Masamu 116:1-9.
Nga twasininkizya ukuti Leza akauvwa mapepo itu, tulatwalilila ukupepa kuli aliwe. Elenganyini pali vino vyacitikile ya Pedro akaikala ku katutu ka Spain. Umwana wao umulumendo uwa myaka 19 wafwile umu uzanzo wa pa museo. Lino yali nu ulanda, ya Pedro yalondolwelanga Leza vino yayuvwanga nupya yapepanga lyonsi pakuti ayakomelezye nu kuyazwa. I vyani ivyacitike? Ya Pedro yalanzile ukuti: “Yeova waswike mapepo yane ukupitila umukutekeziwa nu kwazwiliziwa kuno twapokelile ukufuma ku Aina Klistu yanji.”
Nanti icakuti mapepo yatalenzile ukuti umwana wao aye nu umi, yazwile ya Pedro nu lupwa lwao umu nzila izingi. Aci yao, ya María Carmen yalanzile ukuti: “Ukupepa kwangazwile ukuzizimizya intazi. Namanyile ukuti Yeova Leza wanguvwanga pano nga napepa, nuvwanga ningo nu kuteekeziwa.”
Amasuko uku mapepo itu ilingi yakafuma umu kukomeleziwa nu kwazwiwa kupitila muli ya cuza atutemwa
Ivyaya muli Baibo alino na vino vyacitikila antu mu umi vikalangilila ukuti Leza akaasuka amapepo. Nupya, icisinka i cakuti Leza asiasuka mapepo yonsi. U mulandu ci uno Leza asiasukila mapepo yonsi?
^ pala. 5 Yeova ali zina lyakwe Leza.—Masamu 83:18.
