Uzye lino mwaweni cuza winu ali sana nu ulanda pa mulandu wa kufwilwa, mwelenginye ukuti pasi vino mungacita pakuti mumwavwe? Insita zimwi, limwi tungelenganya ukuti pasi vino tungalanda nanti ukucita pakuti twavwe wino ali sana nu ulanda. Lelo kwaya vimwi vino tungacita pakuti tuteekezye aali nu ulanda.

Ilingi, icikalondekwa u kuya uku ng’anda ya muntu wino atafwilwa alino nu kulanda sile amazwi angupale, wakwe yaaya aakuti: “Kwene caipa sana.” Umu mpanga zimwi, ukukumbatila umuntu umwi nanti ukumulema ukwikasa yaya ali nzila iyakulangilamo ukuti muli ni cikuuku uku muntu wiyo. Ndi cakuti umuntu atafwilwa akulonda ukulanda namwe, mulinzile ukukutikisya nu kuya sana ni cikuuku. Lyene ni cicindame sana cino mungacita, u kwavwako ya lupwa yako wiyo aatafwilwa, limwi mungaombako imilimo imwi ino atanga akwanisye ukuomba, ili wa kweleka, kusakamala ana, nanti sile ukuyavwa pali vino imipekanyizye ya cililo imaya ndi cakuti cingalondekwa ukucita vivyo. Ukucita vivyo kungaomba ningo sana ukucila ukulanda sile.

Insita zimwi, mungalandako pa visuma vimwi vino umuntu wiyo aatafwa wacitanga nanti pa miyele isuma ino wakweti. Limwi ukulanzyanya kwa musango uwo kungalenga ukuti umuntu aatafwilwa auvwa ningo, limwi angatandika nu kumwentula. Vikwene ali vino cali na kuli ya Pam, yano yafwililwe ya wao, ya Ian, ipapita  ni myaka 6. Yalanzile iyati: “Insita zimwi antu yanenangako ivisuma vino yawane yacisile vino nemo ntamanyile nu kumanya, nupya malyasi yayo yalenzile ukuti nauvwa ningo.”

Aakalondelezya amalyasi yakati, antu aingi aafwilwa yaka-avwiwa sana uku yauze, lelo ndi cakuti auze yapamviwa sana uku vintu vyuze cakuti yata nu kuyatandalila, yakailila zuwa uku visuma vino auze yayacitila. Fwandi mulinzile ukwezya sana na maka pakuti mwalanzyanya na yano yafwilwa, nupya ndi yafwilwa, mungaalanzyanya nayo imiku iingi. * Aingi aakauvwa ulanda, yakatemwa sana ndi cakuti mukulanzyanya nayo pakuti ulanda uno yakweti usile.

Tale elenganyini pa mukazyana uwa cance uwa ku Japan, Kaori, uwali sana nu ulanda pa mfwa yakwe ya nyina, nupya lino papisile sile imyezi 15 nyinalenzi wafwile. Lelo, uuvwanga ningo sana pali vino ya cuza yakwe yamwavwanga. Ya Ritsuko yizile iyaya sana ya cuza yakwe Kaori nupya yaali aikolo ukumucila. Kaori walanzile ati: “Ukulanda sile cisinka ntatemilwe pali vino ya Ritsuko yali aacuza yane. Ntalondanga ukuti nupya na-ama ali wensi ukuti yamayo, nupya ntelenganyanga nu kuti ica musango uwo cingacitika. Lelo vino ya Ritsuko yansakamile, i vyalenzile ukuti injatemwe sana. Cila mulungu, twayanga nayo umu mulimo wa kukosoola nupya twayanga nayo umu kulongana. Yangamanga ukumwao umu kulya cakulya, insita zimwi yandetelanga ivyakulya nupya yandembelangako na makalata alino na makaadi. Cumi kwene imiyele isuma ino ya Ritsuko yakweti yankomelizye wakwe cimwi.”

Ipapita imyaka 12 ukufuma pano ya nyina yakwe Kaori yafwilile, nupya ndakai Kaori capamwi na yawakwe yakaomba umulimo uwa nsita yonsi uwa kusambilizya antu Baibo. Kaori walanzile ati: “Ya Ritsuko yakansakamala lyonsi. Lyonsi ndi nawela pa ng’anda, nkayatandalila uku mwao nupya ndi tuli nayo nkauvwa ningo sana mazwi yano yakalanda aakukomelezya.”

Namuze uwali sana nu ulanda a Poli, Nte Wakwe Yeova akaikala uku Cyprus. Poli wakweti iya Sozos uwali sana ni cikuuku, nupya iya kwene wi wali ni miyele isuma ino ya kacema Aina Klistu yangakolanya, wamanga ana ya nsiwa na ya mukamfwilwa ukuti yaye umu kwizizya nu kulila capamwi cakulya uku mwao. (Yakobo 1:27) Nomba icaulanda i cakuti lino ya Sozos yali ni myaka 53, yafwile nu ulwale wakwe kansa ya kuli wongo-wongo. Ya Poli yalanzile iyati: “Nafwililwe ya wane ali ni cisinka yano nikazile nayo pa myaka 33 umu cupo.”

Lino cililo casizile, Poli wakuukile uku Canada capamwi nu mwanakwe umulumendo Daniel kasuli, uwali ni myaka 15. Yaile yatandika ukulongana umu cilongano cimwi cako ya Nte Yakwe Yeova icayelile uku mpanga kwene iiya. Poli walanzile ati: “Anji yano twalongananga nayo umu cilongano kwene cii icipya yatamanyile icili consi pali vino vyatucitikila alino na pa ntazi zino twakweti. Lelo ukukanamanya intazi zitu kutalenzile ukuti yaafilwa ukutukomelezya alino nu kutwavwa. Ala mwandi uwavwilizyo uuwa wazifile cuze, maka maka apa nsita ino umwanane walondekwanga sana ya isi! Yonsi aatungululanga umu cilongano yatemilwe sana Daniel. Umwi wasendangako na Daniel ukuti angaya akacinile capamwi na auze nanti ukuya umu kuteya bola.” Ndakai ya nyina nu mwanao yakacita ningo sana.

Kwaya inzila izingi sana zino tungaazwilamo nu kuteekezya antu aakuloosya pa mulandu wa kufwilwa. Baibo nayo ikatuteekezya pano ikalenga tutaile ukuti uku nkoleelo afwe yalatuutuluka.