ILYASI LYAKUTANDIKILAKO | MUNGAPALAMA KULI LEZA

Uzye Mukayuvwa Ukuti Leza Acuza Winu?

“Kuya cuza wakwe Leza, kukalenga umwi ukutandika ukuyuvwa ukuti wacingililwa, nu kuyuvwa ukuti vino akaacita ivya mpomvu, nupya atanga apumbulwe. Cikauvwika kwati lyonsi Leza akalukulonda ukukucitila ivisuma.”—KILISITOFA, UMULUMENDO UWA KU GANA.

“Leza aka-azwa yacuza yakwe muli vyonsi ivikayacuzya, ukuyatemwa sana nupya akayacitila ivingi kucila na vino yangalenga.” —ANA, UWA KU ALASKA, U.S.A., ALI NI MYAKA 13 IYA KUVYALWA.

“I cintu cisuma sana nupya cikasansamusya wakwe cimwi ukumanya ukuti wewe cuza wakwe Leza!”—YA GINA, AAKU JAMAIKA, YALI NI MYAKA YA KUVYALWA UKU MA 40.

Kilisitofa, Ana, na ya Gina asi aliyo sile akayuvwa vii. Antu aingi umu nsi yonsi yaasininkizya ukuti Leza akayalola ukuya ya cuza yakwe. Nga mwemo? Uzye mukayuvwa ukuti Leza acuza winu? Nanti uzye mungatemwa ukuti Leza aye cuza winu, nanti limwi ukuya sana pali ucuza na aliwe? Limwi mukaelenganya ukuti: ‘Uzye cingacitika ukuti umuntunze aye cuza wakwe Leza wa Maka Yonsi? Ngi cakuti cingacitika, umuntu angacita uli pakuti aye cuza wakwe Leza?

MUNTU AALI WENSI ANGAYA CUZA WAKWE LEZA

Ukulingana na vino Baibo ikalanda, umuntu aali-wensi angaya cuza wakwe Leza. Baibo ikati Leza wamile Abulaamu ati “cuza wane.” (Ezaya 41:8) Lolini na mazwi asuma cuze aaya pali Yakobo 4:8, aakuti: “Mupalame kuli Leza, nga nawe amapalama kunomuli.” Fwandi iiciloleka apaswe ukuti umuntu angaya cuza wakwe Leza. Nomba vino Leza asiloleka, mungacita uli pakuti “mupalame” kuli aliwe nu kuya cuza wakwe?

Pakuti muzane icasuko uku cuzyo cii, elenganyini pali cino cikacitika pakuti antu yaili yaye ivyuza. Antu yaayo yakatandikilapo ukumanyana amazina. Lyene, ndi yakulanzyanya lyonsi, nu kupandana amano, yakatandika ukuvwana sana. Nupya ndi yakwezya na maka ukucitilana ivintu ivisuma, ucuza wao ukakomelako. Avino cikaya na pakuti umuntu aye cuza wakwe Leza. Lekini tulole vino cii cayela icacumi.