Izina lyakuti Mikaeli, lino amu mipepele imwi yakalanda ukuti “Mikaeli Mutakatifu,” aali zina ilyapeezilwe kuli Yesu lino atali aize pano nsi na lino waswilile ukwi iyulu. a Mikaeli yapaazyanyizye na Satana pa cisila ca mfwa yakwe Mose nupya wazwilizyeko na malaika umwi ukuyanena kasesema Danieli amazwi yakwe Leza. (Danieli 10:13, 21; Yuda 9) Vino Mikaeli akacita kuli kuti ukucingilila ukateeka wakwe Leza nu kulwisya alwani yakwe Leza, vyalingana na vino izina lyakwe likapiliula kuli kuti “Uwakolana na Leza”—Danieli 12:1; Kusokolola 12:7.

 Loliniko vimwi ivikalangilila umulandu uno cayela sile ningo ukulanda ukuti Yesu aali Mikaeli mukalamba.

•   Mikaeli a “malaika mukalamba.” (Yuda 9) Ilumbo lyakuti “malaika mukalamba,” ilikapiliula “umukalamba wakwe ya malaika yonsi,” likazanwa sile mu vikomo viili muli Baibo. Vikomo vii vyoili vikalangilila ukuti kwaya sile malaika wenga uwakwata ilumbo lii. Icikomo cimwi cikalondolola ukuti Umwene Yesu uwatuutulwilwe “aliza ukufuma kwi yulu, ni izwi lyakwe ilya maka liluvwika, kuli kuti izwi lyakwe malaika mukalamba.” (1 Tesalonika 4:16) Yesu wakwata izwi lyakwe “malaika mukalamba” pano aali Mikaeli Malaika mukalamba.

•   Mikaeli akatungulula ya malaika aingi sana. “Mikaeli na ya malaika yakwe yalwile ni cizoka,” kuli kuti Satana. (Kusokolola 12:7) Mikaeli wakwata amaka sana umu viumbwa vya ku mupasi, pano akaamwa ukuti “wenga uwa mu akalamba ya angeli” nu ku ti “[cilolo] mukulu.” (Danieli 10:13, 21; 12:1) Umonsi umwi uwi zina lyakuti Aune David E. uwasambilila sana pa Malembo ya Nsi Ipya, walanzile ukuti malumbo yaa yakalangilila ukuti Mikaeli “u mwimilizi mukalamba wakwe ya malaika.”

   Baibo yalumbula izina lyakwe wino wakwata amaka pali ya malaika yonsi. Yamulondolola ukuti “Umwene Yesu alasokololwa ukufuma ukwi yulu pamwi na ya malaika yakwe aamaka umu cimbilimbili ca moto.” (2 Tesalonika 1:7, 8; Mateo 16:27) Yesu “waile ukwi yulu, nupya ya malaika na ya kateeka na aapeelwa amaka yakamuvwila.” (1 Petulo 3:21, 22) Citanga ciloleke ningo ukuti Leza asoolole yaili, kuli kuti Yesu na Mikaeli yatungulula ya malaika ya muzilo. Fwandi tungalanda sile ukuti mazina yoili, Yesu na Mikaeli yakalozya uku muntu wenga.

•   Mikaeli “alaloleka” umu “nsita ya macuzi iipisye.” (Danieli 12:1) Umwi buku lyakwe Danieli izwi lyakuti “alaloleka” likalozya sana uku mwene wino akulonda ukuomba umulimo umwi ucindame. (Danieli 11:2-4, 21) Vino Yesu Klistu u “Mwene wakwe ya mwene,” uwamanyikwa nu kuti “Izwi lyakwe Leza,” alaomba umulimo uiyele pa konona alwani yakwe Leza nu kucingilila antu yakwe Leza. (Kusokolola 19:11-16) Alacita vivyo lino “kulaya ucuzi ukalamba utatala wayako ukufuma pa kutandika kwa nsi.”—Mateo 24:21, 42.