Baibo ikalanda ukuti caya sile ningo, nupya cikalondekwa kuitemwa ukulinge we mwisikulu. Mu kutemwa kuu mwaya kuisakamala wemwineco, kuicindika, nu kuyuvwa ukuti wacindama. (Mateo 10:31) Kuluta sile kuicindikisya nu kuitemwa, Baibo yalanda ningo pali vino kutemwa kulinzile ukuya.

A weni wino tulinzile kutemwa inkolelo?

1.   Kutemwa Leza u kulinzile ukuya inkolelo mu myenzo itu. Baibo ikasambilizya ukuti isunde likulu ukuluta i lyakuti: ‘Uwatemwa Yeova umwene Leza wako nu mwenzo wako onsi, nu umi wako onsi, na maka yako yonsi.’—Mako 12:28-30; Malango 6:5.

2.   Ni sunde likulu lyakwe ciili i lyakuti: “Uwatemwa umuzo ndi vino waitemwa.”—Mako 12:31; Aina Levi 19:18.

3.   Nanti icakuti Baibo italumbula isunde lya kulungatika pali vino umwi alinzile kuitemwa, isunde lyakuti “Uwatemwa umuzo ndi vino waitemwa” likalangilila ukuti kuitemwa mu nzila isuma alino nu kuicindika kwaya sile ningo nupya kungatwazwa.

A weni wino Yesu watemilwe inkolelo?

 Yesu walangilile vino tulinzile ukutemwa Leza, kutemwa anji, nu kuitemwa, nupya wanenyile alondezi yakwe kumukolanya.—Yoane 13:34, 35.

1.   Watemilwe Yeova Leza nupya waipeelisye kuomba mulimo wakwe manda yonsi. Walanzile ati, “Antu amu nsi yalinzile yamanye vino natemwa Tata, nkacita vyonsi vino wampeela ilamulo kuti ncite.”—Yoane 14:31.

2.   Yesu watemilwe yauze, walangilile ukupitila mu kuyasakamala muli vino yalondekwanga nu kufika sile ku kupeela umi wakwe pa mulandu wao.—Mateo 20:28.

3.   Walangilile ukuti waitemilwe umwisikulu lino wakwatanga insita yakupuuza, kulya, nu kuipakizya pamwi na alondezi yakwe alino na aali nu kuya asambi yakwe.—Mako 6:31, 32; Luka 5:29; Yoane 2:1, 2; 12:2.

Uzye kutemwa yauze kuluta kuitemwa kukalenga muntu kukanaya ni nsansa sana nu kukanaicindika?

 Awe, pano twaumbwa mu cata cakwe Leza uwakwata kutemwa kwa cumi. (Utandiko 1:27; 1 Yoane 4:8) Cii cikusenula ukuti twaumbwa mu nzila yakuti twalanga kutemwa kuli yauze. Icacumi tulinzile kuitemwa, lelo tukaaya sana ni nsansa ndi twatemwa Leza nu kuluta pali vyonsi nga nu tukucitila yauze visuma. Baibo ikalanda ukuti, “Mukupeela mwaya upolelelo ukulu cuze kuluta mukupokelela.”—Milimo 20:35.

 Ndakai antu yamwi yakati ungaya ni nsansa nga waitemwa sana we mwisikulu inkoleelo. Ku antu ya musango uu, “kuitemwa” akuno yapyanikizya pakuti “watemwa muzo.” Lelo, vimwi ivikacitika ndakai vikalangilila ukuti antu aaya nu umi usuma ndakai a yaaya aakalondela kusunda kwa muli Baibo ukwakuti: “Tulinzile kwelenganya pa vilondwa vya antu yauze, asi sile pa vilondwa vitu.”—1 Kolinto 10:24.