Aaweni Akaya Ukwi Yulu?
Vino Baibo yalandapo
Leza akasoolola antu yamwi umu Ina Klistu aya ni cisinka yano yakatuutulukila ukwi yulu ndi yafwa sile. (1 Petulo 1:3, 4) Ndi yasoololwa, yalinzile ukutwalilila ukuya autailo nu kuya ni miyele ino Aina Klistu yalinzile ukukwata pakuti yatakapanye isyuko lya kupokelela upyani wao uwa kuya ukwi yulu.—Efeso 5:5; Filipi 3:12-14.
I vyani vino akaya ukwi yulu yakaya umu kucita?
Yalaombela pamwi na Yesu ukuya ya kateeka nupya ya simapepo pa myaka 1,000. (Umbwilo 5:9, 10; 20:6) Yalapanga “iyulu ilipya” nanti uteeko wa kwi yulu ulateeka “insi ipya” na antu apano nsi. Ya kateeka yaa akwi yulu yalazwilizyako ukukuwezezya antunze ivintu ukuya ivyololoke wakwe vino Leza walondanga.—Ezaya 65:17; 2 Petulo 3:13.
Ayanga aalatuutulukila ukwi yulu?
Baibo ikalanda ukuti antu 144,000 yalatuutulukila ukwi yulu. (Umbwilo 7:4) Umu cilolwa icalembwa pa Umbwilo 14:1-3, Yoane waweni “Umwana wa mfwele aimi pa mwamba wa Zioni. Wene wali pamwi na antu mazimbi mwanda onga makumi yani na yani (144,000).” Umu cilolwa cii “Umwana wa mfwele” akaimililako Yesu wino watuutulwilwe. (Yoane 1:29; 1 Petulo 1:19) “Mwamba wa Zioni” ukaimililako cifulo cikalamba cakwe Yesu na ya 144,000 alateeka pamwi nawe ukwi yulu.—Masamu 2:6; Ayebulai 12:22.
Yayo ‘aamwa nupya asololwe’ ukuteeka pamwi na Klistu umu Wene yakaamwa ukuti “ufyo unono.” (Umbwilo 17:14; Luka 12:32) Cii cikalangilila ukuti yalaya sile anono ngu kulinganya uku mfwele zyakwe Yesu zyonsi.—Yoane 10:16.
Ivya ufi pa antu akaya ukwi yulu
Ufi: Antu yonsi asuma yakaya ukwi yulu.
Icisinka: Leza walaya ukuti umi wa manda pe ulaya pano nsi uku antu aingi asuma.—Masamu 37:11, 29, 34.
Yesu watiile: “Pasi umuntu watala wakwela kwi yulu.” (Yoane 3:13) Fwandi walangilile ukuti antu asuma afwile lino atatala wiza pano nsi aali wakwe Abulaamu, Mose, Yobo na David yatalaya ukwi yulu. (Milimo 2:29, 34) Lelo yakweti upalilo wa kwiza ikala pano nsi.—Yobo 14:13-15.
Ukutuutulukila ukwi yulu kukaamwa ukuti ‘kuzyukuka kwa nkoleelo.’ (Umbwilo 20:6) Cii cikulangilila ukuti kulaya ukutuutuluka na kuze. Kutuutuluka kuko kulaya pano nsi.
Baibo ikatusambilizya ukuti lino Uwene Wakwe Leza ulateeka, “kutalaya imfwa.” (Umbwilo 21:3, 4) Ulayo uu uwakuombwa pano nsi, pano ukwi yulu kutatala kwayapo imfwa.
Ufi: Cila muntu akaisoolwela ndi cakuti alaya ukwi yulu nanti alaya pano nsi.
Icisinka: Leza aliwe akasoolola Umwina Klistu uwa cisinka angapokelela “cilambu kwi yulu, icili ulwamo” kuli kuti upalilo wakwikala ukwi yulu. (Filipi 3:14) Vino umuntu akalonda vitange vilenge umuntu asoololwe ukuya ukwi yulu.—Mateo 20:20-23.
Ufi: Upalilo wa kwikala pano nsi utacindama, waya sile uku yantu atalinga ukuya ukwi yulu.
Icisinka: Leza akaama antu alapokelala icilambu ca kwikala pano nsi ukuti “antu yane,” “asoololwe yane” nu kuti “uluko lumwi ulupolelelwe kuli Leza.” (Ezaya 65:21-23) Yalakwata isyuko lya kufikilizya vino Leza walondanga antu yaikala pa kutandika kuli kuti ukwikala amanda pe nu umi umalilike muli paladaise pano nsi.—Utandiko 1:28; Masamu 115:16; Ezaya 45:18.
Ufi: Inamba yakwe 144,000 iyalumbulwa umu Umbwilo asi ya cumi cumi ikaimilako sile cimwi.
Icisinka: Nanti icakuti umu Umbwilo mwaya amanamba aakaimililako vimwi, ama namba yamwi yene acumi. Ibuku lya Umbwilo likati “mazina ya atumwa ikumi na yaili a Mwana wa Mfwele.” (Umbwilo 21:14) Fwandi uu usininkizyo wakuti inamba yakwe 144,000 nayo kwene i ya cumi.
Pa Umbwilo 7:4 paya “impendwa yakwe yao yano ikilwe cimanyililo cakwe Leza yali mazimbi mwanda onga na makumi yani na yani.” Mazwi alondelelapo umu cikomo cii yakalanda ukuti kwali iumba lyakwe ciili ilyapanzile ilikaamwa ukuti: “iumba likulu cuze. Kutali nanti wenga uwange apende antu onsi.” (Umbwilo 7:9, 10) Ndi cakuti inamba yakwe 144,000 ikaimililako antu atakwata impendwa ale pa ma umba yaa yaili pali upusano ukulu cuze nupya icikulandwapo citange cuvwike. a
Nupya ya 144,000 yalondololwa ukuti ‘yakazilwe ukufuma mu yantu yonsi pakuti yaya ivizao vya nkoleelo.’ (Umbwilo 14:4) Mazwi akuti ‘ivizao vya nkoleelo’ yakalozya uku antu anono sile asoololwe. Yakalondolola yayo alateeka umwi yulu pamwi na Klistu, ukuteeka antu imintapendwa ni mintapendwa alaya pano nsi.—Umbwilo 5:10.
a Vivyo kwene avino na Professor Robert L. Thomas walemvile pa mpendwa yakwe 144,000 iyalumbulwa pa Umbwilo 7:4, watiile: “Inamba iyamanyikwa ningo yapusana ni namba itamanyikwa ningo iyaya pa cipande 7 cikomo 9. Ndi cakuti twati inamba iiyo ikaimililako cimwi ala mabuku yonsi aya umwi buku lii asi ya cumi.”—Umbwilo 1–7: Umwi buku lyakuti An Exegetical Commentary, apifwa 474.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Iyulu I Cani?
Kulingana na vino izwi lii lyaomviwa muli Baibo, likasenula ivintu vitatu.
MASAMBILILO AA MULI BAIBO AACINDAME
Uzye Uwene Wakwe Leza I Cani?
Mu mulimo wakwe onsi, Yesu wasambizyanga antu pa Wene Wakwe Leza kucila vino wasambizya pa vintu vyuze. Pa myaka iingi, alondezi yakwe yakapepa ukuti Uwene uwo wize.