Ukulingana ni buku lya kusyalikizyako muli Baibo, 666, i namba nanti izina lya cilyani ica mitwe 7 ni mpembe 10 icafumile mu luzi. (Umbwilo 13:1, 17, 18) Icilyani cii cikaimililako amapolitiki aya mu nsi yonsi, aakuteeka “pa mitundu yonsi, ni nko, ni ndimi, nga ni misango yonsi ya antu.” (Umbwilo 13:7) Inamba 666 ikalangilila ukuti Leza akalola ukuti amauteeko ya ndakai yafilililwa ukuzifya ivintu. U mulandu ci uno cayela vivyo?

  Cacila na pa cimanyililo. Amazina afuma kuli Leza yakwata upiliulo. Leza watemiile Abulamu, wino izina likapiliula ukuti ‘Isi wa Papela’, izina lyuze ilyakuti: Abulaamu, ilikapiliula ukuti ‘Isi wa Maumba’, lino walavile ukuti alalenga Abulaamu ukuya “cikolwe ca nko zivule.” (Utandiko 17:5) Avino caya nu ku cilyani, Leza watemela icilyani cii izina lyakuti 666 ukulangilila miyele ino cakwata.

  Inamba 6 ikapiliula ukukanamalilika. Ilingi, muli Baibo amanamba yakaomba wa vimanyililo. Inamba7 ikapiliula icintu icimalilike. Inamba 6 nayo vino yacepapo pali 7, ingapiliula icintu cimwi icisi cimalilike nanti icipe mu manso yakwe Leza, nupya yakaikolanya ku yalwani yakwe Leza.—1 Milandu 20:6; Danieli 3:1.

  Yaswilizyapo imiku itatu pakuti icisinka cuvwike. Insita zimwi Baibo ikaswilizyapo ukulumbula izwi ililimwi imiku itatu pakuti izwi lilyo limanyikwe ukuti ilicindama sana. (Umbwilo 4:8; 8:13) Fwandi izina lyakuti 666 likalangilila sile ukuti Leza akalola ukuti amauteeko ya untunze yafilililwa ukuzifya ivintu. Yafilwa ukucingilila antu nu kuleta mutende wa cumi cumi pano ivintu vivyo, U wene Wakwe Leza sile ulio ungavileta.

Cimanyililo ca cilyanyi

 Baibo ikalanda ukuti antu yalapokelela “cimanyililo ca cilyanyi” pa mulandu wakuti yakalondela cilyanyi cii ala yakucikumbwa nupya yakafika sile nu ku kucipepa. (Umbwilo 13:3, 4; 16:2) Yakacita vii lino yakucindika sana impanga yao, ivimanyililo ivikamanyisya impanga iyo, nanti sile ukuyuvwa pa maka yano impanga yao yakwata mu vya nkondo. Ibuuku limwi (The Encyclopedia of Religion) likalanda ukuti: “Ndakai muno nsi amu mipepele yakatemwisya sana impanga yao.” a

 Uzye icimanyililo ca cilyani yacikambatike api kasa lyakwe umwi nanti pa cipuma? (Umbwilo 13:16) Lino Leza wapeezile aina Izaeli masunde, walanzile ati: “Mwayanyepelela ku makasa inu nu kuyazwala pa mausyu inu wa mipango pakuti yangaya wa ciusizyo.” (Malango 11:18) Cii citapiliulanga ukuti aina Izlaeli yali nu kwika icimanyililo api kasa lya cumi cumi nanti pa cipuma kwene, lelo yalinzile ukutungululwa na amazwi yakwe Leza muli vyonsi vino yacitanga na vino yelenganyanga. Avino caya nu ku nambala 666, cisipiliula ukuti antu yakwata icikalaye ca namba iyo pa cipuma, lelo icimanyililo cii cikalozya ku antu akatungululwa na mapolitiki mu mikalile yao. Yayo akwata cimanyililo ca cilyani yaicita aineco ukuya alwani yakwe Leza.—Umbwilo 14:9, 10; 19:19-21.