Ilingi Baibo ikaama Yesu ukuti a “Mwana Leza.” (Yoani 1:49) Amazwi yakuti “Mwana Leza” yakalangilila ukuti Leza a Kaumba, ali Ntulo ya vintu vyonsi ivya umi, ukwikako sile na Yesu. (Masamu 36:9; Kusokolola 4:11) Baibo isisambilizya ukuti Leza waviile umwana wakwe vino antu yakavyala ana.

 Nupya Baibo ikaama ya malaika ukuti ‘ana aonsi yakwe Leza wa cumi.’ (Yobo 1:6) Nupya Baibo ikati umuntu wa kutandikilapo, Adamu, wali a “mwana Leza.” (Luka 3:38) Lelo pa mulandu wakuti Yesu ali ciumbwa vino Leza watandikilepo ukuumba, nupya ali wino Leza waiumbiile umwineco, Baibo ikalanda ukuti Yesu ali Mwana mukalamba wakwe Leza.

•  Uzye Yesu wali ukwi yulu lino atali aize avyalwe pano nsi?

•  I vyani vino Yesu wacitanga lino atali aize pano nsi?

 Ee. Yesu wali iciumbwa ca mupasi ukwi yulu lino atali aize avyalwe ukuya muntu pano nsi. Yesu umwineco walanzile ati: “Nafuma ukwi yulu.”—Yoani 6:38; 8:23.

 Leza waumvile Yesu lino atali aumbe vyonsi ivyasyala. Ukulozya kuli Yesu Baibo ikati:

•   “Wene . . . iiyeli pa viumbwa vyonsi.”—Kolose 1:15.

•   Wene a “wino Leza watandikilepo ukuumba.”—Kusokolola 3:14.

 Yesu wafikilizye usesemo wakwe wino “intuntuko yakwe . . . iya mpiti mpiti, kutandikila sile uku katalili.”—Mika 5:2; Mateo 2:4-6.

 Wakweti icifulo icikalamba ukwi yulu. Yesu walozizye uku cifulo kwene cii lino wapefile ati: ‘Tata leka ncindamikwe . . . vino nacindamikwe lino nali pamwi nawe ala insi itali iyeko.’—Yoani 17:5.

 Wazwilizye Isi ukuumba ivintu vyonsi ivyasyala. Yesu waombanga umupiipi na Leza, wali a “ciinda wa milimo.” (Mapinda 8:30) Ukulozya kuli Yesu, Baibo ikati: “Muli aliwe amuno vyonsi ivyasyala vyaumbiilwe, ivya mwi yulu ni vya pano nsi.”—Kolose 1:16.

 Leza waomvizye Yesu ukuumba ivintu vyonsi ivyasyala. Pali vivyo paali nu kuumba ya malaika yonsi alino ni yulu. (Kusokolola 5:11) Umu nzila imwi, ukuombela pamwi ukwali pali Leza na Yesu kwakolana na vino aakaleenga mapulani ya vikuulwa akaombela pamwi na kakuula. Aakaleenga mapulani ya vikuulwa, akaleenga sile mapulani vivyo kwene; lyene aakakuula akaomvya mapulani yayo ku kukuula ivikuulwa.

 Wali a Izwi. Baibo ikalanda pali Yesu ukuti lino atali aye umuntu wali a “Izwi.” (Yoani 1:1) Cii cikupiliula ukuti Leza waomvyanga Umwanakwe pa kunena ya malaika yauze ivyeo na vino yalinzile ukulondela.

 Nupya cikaloleka ukuti Yesu ali wino Leza waomvyanga ukumulandilako ku yantu pano nsi. Cikaloleka ukuti Leza waomvizye Yesu wino wali Izwi pa kunena Adamu na Eva ivya kucita umu calo ca Edeni. (Utandiko 2:16, 17) Yesu limwi ali malaika uwatungulwile aina Izlaeli aliko mpiti umu lwanga nupya wino aina Izlaeli yalondekwanga ukuvwila izwi lyakwe.—Kufuma 23:20-23. a