Nakulile uku ncende ukutaali icongo, ukumpela ya muzi wa Tampere, uwayelile uku Finland. Ya lupwa yane yatatemilwe sana ivya mapepo lelo yacindike sana masambililo nu kuya ni mikalile isuma. Ya mayo aku Germany, nupya lino nali umwance, ilingi nayanga umukwikala uku West Germany kuno kuku na mama avyazi yakwe ya mayo ikalanga.

Natemilwe sana ivyangalo ukufuma sile uku wance wane. Lino nali umwance, nateyanga ivyangalo vyonsi ivipusane pusane, nomba lino nali ni myaka 14 nasoolwilepo ukwika mano ukukuteya tenesi. Lino nali ni myaka 16 nasambililanga ivyakuteya tenesi imiku iili nanti itatu cila wanda kuli kuti nakweti antu yaili aakunsambilizya ivyakuteya lyene manguzi naisambilizyanga nemwineco. Natemilwe sana vyonsi ivyacitikanga pa kuteya icangalo cii, nupya ukuteya tenesi kwangazwanga ukumanya ningo vino nkaelenganya na vino umi wane uli. Nanti icakuti naipakizyanga sana ukwizizya pamwi na anji nu kumwela pamwi uwengwa insita izingi, ntatazile injepo umu ntazi pa mulandu nu kuomvya imilembo ikavulunganya uwongo nanti pa mulandu nu wengwa. Nisile sana amano uku kuteya tenesi nupya acino nakolezyanga sana umu umi wane.

Natandike ukuya umu kuteya uku ncende izipusane pusane ukwakucimvyanya kuno yamanga yakuti ATP ala indi ni myaka 17. Pa cisila ca kucimvya ukupusane pusane namanyikwe sana umu mpanga itu. Lino nali ni myaka 22, nali pa antu 50 amanyile sana ukuteya tenesi umu nsi yonsi.

Pa myaka iingi, nayanga umu mpanga izipusane pusane ukuzinguluka insi ala nkuya umu kuteya tenesi. Natandalile incende izipusane pusane izisuma sana nomba calenzile manye sana intazi izyali umu nsi yonsi, ukwikako nu upondo, ukuomvya imilembo ikavulunganya uwongo uyi uyi alino sile ni ntazi zya mu wikazi. Lino nali uku United States, yatunenyile ukuti tutalinzile ukuya uku vifulo vimwi ivya mu musumba pa mulandu nu kuvula kwa upondo. Vyonsi vii vyansakamikanga sana. Nomba nanti icakuti nacitanga icintu cino natemilwe sana cila wanda nasyalanga nkusakamala.

Sanna, umwanaci wino nacinanga nawe watandike ukusambilila Baibo na ya Nte Yakwe Yeova. Imipepele ii yanguvwisyangako ningo panono nomba ntamulesyanga ukusambilila. Umu 1990 twatwaline, nupya wawatiziwe ukuya Inte Yakwe Yeova umwaka uwalondeliilepo. Nomba nemo ntailolanga nemwineco ukuti ningatemwa ivya mapepo nanti icakuti nazumile ukuti Leza akuno waya. Niusyanga ukuti mama umwina German wawelenganga sana Baibo nupya wansambilizyangako ni vya kupepa.

Uwanda umwi, lino twatandalanga na Sanna alino na atwalane yamwi ya Nte, ya Kari, ya iya yandanzile vino Baibo yasoowile pa “manda akusyalikizya.” (2 Timoti 3:1-5) Usoowelo uu wanzanzizye lino nilwike umulandu uno ivintu vipiile sana umu nsi. Uwanda uwa, tutalanzile ivingi pa mipepele. Nomba ukufuma lilikwene, natandike ukulanzyanya na ya Kari pali Baibo nupya vyonsi vino nasambililanga vyamfikanga pa mwenzo. Nali sana umupamviwe nupya napitananga fwandi catutaliile sana ukusambilila cila nsita nomba ya Kari yatatoovwike. Yasukanga sile mauzyo yano nuzyanga lino tukusambilila ukuomvya kalata. Mauzyo yonsi acindame sana yano tukauzya umu umi yaswikwe ukuomvya Baibo nupya panono panono natandike ukulola icintu icikalamba cino yalandangapo icakuti Uwene Wakwe Leza ulafikilizya ukulonda kwakwe Leza. Ukumanya izina lyakwe Leza ilyakuti Yeova nu kulola vino watucitila vyalenzile nsenuke sana. (Masamu 83:18) Nupya cino natemilwe sana pali vyonsi i mpolelwa ino watupeela, atatupeezile sile ukuti avino ciye vivyo kwene nanti ukuti avino walinzile ukucita, lelo watulangilile vino watutemwa. (Yoane 3:16) Nupya nasambilile nu kuti nakweti isyuko lya kuya cuza wakwe Leza nu kwikala amanda pe umu paladaise impanga ya mutende. (Yakobo 4:8) Natandike ukuyuzya nemwineco inti, “Ningacita uli pakuti ndange ukuti nkutaizya?”

Nelenginye sana pa wikalo wane. Nasambililanga muli Baibo ukuti insansa zya cumi zikafuma umu kupeela nupya natandike ukulondesya ukulanenako yauze pali vino nazumile. (Milimo 20:35) Vino namanyile sana ukuteya icangalo cakwe tenesi ntikalanga apa ng’anda pa manda 200 umu mwaka pano nayanga uku kucimvyanya kwa cangalo kwene cii. Uwikalo wa lupwa lwane lonsi wasintilile pali nene, kuli kuti pali vino nasambililanga, miombele yane alino nu mulimo uno naombanga. Nilwike ukuti nalondekwanga ukusenuka.

Namanyile ukuti ukuta incito ino naombanga pa mulandu sile na ukapepa kwali nu kulenga antu ingi ukukanauvwikisya vino nasoololapo ukucita. Nomba isyuko lino nakweti ilya kumanya Yeova ningo nu kuya nu umi wa manda pe ali cilambu cicindame sana cino ningakwata ukuluta icaya umu kuteya tenesi, fwandi ukupingulapo ukuta cali i canguke sana. Naipeelisye ukukanaika amano kuli vino antu yauze yangavwanga pano nene nalinzile ukupingulapo. Ilembelo lyonga ilyankomelizye sana ukukanalondelela vino antu yauze yakunena a Masamu 118:6 apakati: ‘Nemo twaya pamwi na Yeova ni ntete ntakwata foo. Icani fwandi cino umuntu angancita nene?’

Pa nsita ii, antu yamwi yaipeelisye ukundipilila ukuya umukuteyako tenesi pakuti nkakwate impiya izingi, ukwaula ukusakamala apa myaka iingi. Nomba ala nantimpingulapo mpiti, fwandi nakanyile nupya natiile nu kuteeyako umu kucimvyanya kwakwe ATP. Natwalilile ukusambilila Baibo, nupya pa 2 Julai 1994 nawatiziwe nu kuya Inte Yakwe Yeova.

Nemo ntacuzile sana nanti ukusumba insita ukwelenganyapo pali Leza. Nupya ntailolanga wa muntu uwafumile akulondalonda icumi. Nayuvwanga ukuti umi wane waliko ningo nu kuti ntange ndenge navyuze. Nomba ukwaula nu kwenekela, cali kwati icumi ca muli Baibo candolelanga ukuti ncizane, nizile imanya ukuti umi wakwata upiliulo nu kuti umi wane wazifile ukucila vino nelenganyanga. Ulupwa lwitu lwalemiine sana ukucila vino cali lyonsi. Nupya naya sana ni nsansa ukuti ana yane aonsi yatatu yakankolanya asi umu kuteya tenesi lelo a muli vyakwe Leza.

Ncili nkaipakizya ukuteya tenesi. Pa myaka yonsi ii nkazana impiya zya kusungilamo ulupwa umu milimo iyalemenkana na vyakwe tenesi, nene kooci nupya nene mukalamba wa pa cikulwa pano yakasambilizizya nu kulanzyanya vyakwe tenesi. Nomba ntika sana amano ku mulimo uu. Mpiti nasambililanga ivya kuya kateya musuma nupya kacimvya wakwe tenesi maawala aingi cila mulungu. Nomba ndakai nene kasimikila wa nsita yonsi, nupya natemwa sana ukuomvya insita yane ukwazwa yauze ukusambilila nu kulondela ivisinte vya muli Baibo ivyalenzile nsenuke. Ukukoleezya ucuza wane na Yeova Leza nu kunenako yauze pa upalilo ulalenga antu ukuya nu umi usuma sana uku nkoleelo u kukandetela sana insansa.—1 Timoti 6:19.