Navyalilwe mu musumba wa Ciudad Obregón ku katutu ka mpanga ya Mexico nene naali umwana walenga 5 pa yana 9. Twikalilanga ukutali sana nu ku tauni, kuno yatata yakwatile ka famu akanono. Yali i ncende isuma sana ukwikalako nupya ulupwa lwitu lwali ululemane nupya lwali ni nsansa. Ica ulanda i cakuti, lino nali sile ni myaka 5, imvula ya cimuza izile iyonona famu witu nupya twali nu kukula kwi tauni lyuze.

Ya tata yatandike ukukwata impiya. Nomba pa nsita iliyonga, yatandike ukukoleka sana. Nupya ci caleesile intazi ku cupo cao alino na kuli swe yana. Nemo na yatatalenzi yaili twatandike ukupeepa fwaka wino twiyanga kuli ya tata. Lino naali sile ni myaka 6, nakolike pa muku wa kutandikilapo. Pataalengile ukufuma papo, avyazi yane yapatuukine nupya ivicitwa vyane vipiileko.

Ya mayo yatusenzile lino yaile mu kwikala nu monsi muze. Umonsi wiyo atayapeelanga impiya, nupya impiya zino yakwatanga zyali izinono sana icakuti tutakwatanga vyonsi vino twalondekwanga. Fwandi nemo na inane twatandike ukuomba umulimo uli onsi uno tungaomba, nomba twakwatanga sile impiya zya kukala vino tukulonda. Napolisizyanga antu insapato nu kukazya buledi, manyunzipepa, mababugamu alino ni vintu vyuze. Nupya nazingulukanga mu musumba ala nkulonda ivya kulya mu vipeepala vino akankala yakasumbamo ivikoona.

Lino naali ni myaka 10, umonsi umwi wanenyile ukuti twaomba nawe kuno amu musumba yakaya yakwita ivikoona. Nazumile nupya natiile isukulu imfuma na pa ng’anda. Wamfolesyanga ulupiya ulutafisile na kuli dola wenga nupya wampeelanga ni vya kulya vino wasoolanga mu vipeepala vino antu iyasumba. Nikalanga mu kang’anda kano nakuuzile ukuomvya ivintu vino nalombolanga kuno antu yakasumba ivikoona. Antu ali mu ncende iiya yaomvyanga amazwi aipe nupya yacitanga sana uzelele. Aingi yaomvyanga imilembo ikavulunganya uwongo nupya yakolekanga sana. Yii yali ali nsita iyaifiile sana mu umi wane, nalilanga usiku lyonsi ala nkuzakaza nu kuzakaza ku ntete. Pa mulandu wakuti naali sana umupiina nupya ntasambilile, nayuvwanga ukuti nali umuzewane. Nikazile kuno yakaita ivikoona mupipi ni myaka itatu, mpaka lino nakuukile kwi tauni lyuze mu Mexico. Lino naali kuuku, natandike ukuomba mu vyalo, ukutema amaluwa na kotoni, ukukoma ivisaali nu kuzombola imbataata.

Lino papisile imyaka 4 naswilile ku Ciudad Obregón. Ya mayosenge aali ya sing’anga, yampeezile muputule mu ng’anda mu mwao. Natandike ukulota iviloto iviipe sana nupya nuvwanga sana uyi icakuti natandike ukwelenganya pa kuikulika. Wanda umwi usiku napefile kuli Leza inti: “Mwene ndi cakuti akuno waya, nkulonda kukumanya nupya ndatwalilila ukukuombela amanda pe. Ndi cakuti kwaya ukupepa kwa cumi, nkulonda nkumanye.”

Nalondesyanga ukusambilila pali Leza. Nanti sile alino nali umwance, nayanga ku ma calici apusanepusane, nomba pasi ivya mpomvu vino nazanangako. Kutaali icalici ilili lyonsi ilyalandanga ivingi ivya muli Baibo nanti ilyangavwile ukumanya ningo Leza. Yamwi yalondesyanga sana impiya, yauze nayo ayanga sana nu ku calici yali a cizelele.

Lino nali ni myaka 19, ya mulamu aatwazile ya mangulenzi ya namba 2 mu mwitu yanenyile yati ya Nte Yakwe Yeova yayalanzile vino Baibo ikalanda pa kuomvya viluwi pa kupepa. Yambelengile ilembelo lyakwe Kufuma 20:4, 5. Lyalanzile ukuti tutalinzile ukupepa viluwi. Pa cikomo 5 pakati: ‘Mutafukamila unkolanya wakwe tuleza nanti kutupepa. Pano ne Yeova Leza winu, nsizumilizya kuti mwapepa tuleza tuze.’ Lyene ya mulamu yanguzizye yati: “Ndi cakuti Leza akaomvya viluwi pa kucita ivizungusyo nupya akalonda ukuti twaviomvya lino tukupepa, u mulandu ci uno angalesezya ukuti twaviomvya?” Iuzyo lino yanguzizye lyalenzile ntandike ukwelenganyapo. Ukufuma papo twalanzyanyanga amalyasi aingi amuli Baibo. Natemiilwe sana ukulanzyanya kuuku icakuti calolekanga kwati insita ya kulanzyanya ikusila zuwa.

Pa cisila, ya mulamu yansenzile uku kulongana kwakwe ya Nte Yakwe Yeova. Natemilwe sana vino naweni na vino nuvwile kuuku. Na ance kwene yacitangako vimwi mu mapulogilamu aacitikanga kuuku, nupya yalandanga ningo sana ndi yaya pa pulatifomu. Naivwanzizye umu mwenzo inti, ‘Kwene antu yaa yakasambilila ningo!’ Nanti i cakuti naali ni nyele izitali nupya izisakalale, ya Nte yampokelile ningo sana. Nupya ulupwa lumwi lwangamile ukuti tukaliile pamwi icakulya ca manguzi pa cisila ca kulongana.

Ukufuma pano natandikiile ukusambilila Baibo na ya Nte, nasambilile ukuti Leza a Tata uwaya nu kutemwa aakatusakamala asi mulandu nu upiina, vino twamanyikwa, inkanda nanti masambililo yano twakwata. Ataya na kapatulula. (Mili. 10:34, 35) Lyene, namanyile icumi. Natiile ukuya nu ulanda nu kuvwa ukuti kwali cino nuliizye mu umi wane.

Umi wane wayanga ukuzipilako sile! Natiile ukupeepa, ukumwesya uwenga, alino ku kuomvya amazwi aipe. Uyi uno nuvwanga kufuma lino nali umwance watandike ukusila nupya ni viloto iviipe vino nalotanga navyo kwene vyasizile. Nupya nacimvizye ni intazi ino nakweti ukufuma ku wance iya kuilola ukuti ntacindama pa mulandu nu upiina alino nu kukanafika patali mu masambililo.

Nakwata mamane uwatemwa Yeova nupya akantungilila sana. Lyene ndakai nene mwangalizi wa ciputulwa mwi uvi lyakwe Yeova, nkatandalila ivilongano pakuti nkomelezye nu kusambilizya aina na ya nkazi aya kwati a lupwa yane. Nkataizya sana pali vino Baibo yangavwa ukusenuka na pa visuma vino Leza akatusambilizya, nupya nata ukuvwa insonyi.