1 Timote 4:1-16
4 Bõtab, naan ko em̦õj kakũrm̦ooli rej* kaalikkar bwe ilo raan ko rej pãd im̦aan, ewõr jet renaaj buñ jãn tõmak, renaaj roñjake ennaan ko reriab* im katak ko an jetõb ko rettoon*
2 ikijjeen etao ko an ro rej kõnono riab, ro emej bõklõkõt ko aer ãinwõt ñe kar tũli kõn aen.
3 Bareinwõt, rej kõmo̦ an armej m̦are, im rej kakien armej bwe ren jab kañ jet kain m̦õñã, bõtab Anij ear kõm̦m̦ani m̦õñã kein bwe ro rej tõmak im ejim̦we jel̦ã eo aer kõn m̦ool eo ren m̦õñã im kwal̦o̦k kam̦m̦oolol.
4 Aolep menin kõm̦anm̦an ko an Anij rem̦m̦an, im ejjel̦o̦k juon iaaer jen kõjekdo̦o̦ni el̦aññe jej bũki ilo kam̦m̦oolol,
5 bwe em̦õj kokkwõjarjari ikijjeen naanin Anij im ikijjeen jar.
6 El̦aññe kwõj lel̦o̦k naanin kakapilõk in ñan ro jeid im jatid, kwõnaaj juon ri-karejar eo em̦m̦an an Christ Jesus, juon eo em̦õj naajidiki kõn ennaan eo kõn tõmak im katak ko rem̦m̦an, ko kwaar kanooj l̦oori.
7 Kwõn jab roñjake bwebwenato ko reriab im ejjel̦o̦k kautiej ie, ãinwõt bwebwenato ko lel̦l̦ap ro rej kwal̦o̦ki, bõtab kwõn kammineneik eok make ñan mour ñan Anij, im en kõttõpar eo am̦ in.
8 Ñe juon ej kammineneik ãnbwinnin,* jidik wõt an wõr tokjãn, bõtab ñe ej mour ñan Anij, ewõr tokjãn ilo men otemjej, kõnke ej letok kallim̦ur ko kõn mour in kiiõ im mour eo ej itok wõt.
9 Ennaan in em̦ool, im ekkar bwe jen lukkuun lõke im tõmake.
10 Eñin unin jej lukkuun jerbal im kanooj kate kõj kõnke jej likũt ad kõjatdikdik ilo Anij eo emour, eo ej ri-Lo̦mo̦o̦r ñan jabdewõt armej, el̦aptata ñan ro rej tiljek.
11 Kwõn wõnm̦aanl̦o̦k wõt ilo am̦ lel̦o̦k naanin jiroñ kein im katakin ro jet kaki.
12 Jab kõtl̦o̦k bwe jabdewõt en reilal̦waj ñan kwe kõn am̦ dik. Bõtab, kwõn juon joñak ñan ro retiljek ilo am̦ kõnono, ilo kõm̦m̦an, ilo yokwe, ilo tõmak, im ilo erreo.
13 M̦ae iien inaaj iwõj, kwõn wõnm̦aanl̦o̦k wõt im kate eok ilo am̦ riit ilo̦bwilej, lel̦o̦k naanin jiroñ,* im katakin.
14 Kwõn jab jerwaane menin lewaj eo am̦ im kar lewaje ikijjeen juon kanaan, ke kumi in em̦m̦aan ro rej lale eklejia rar likũt peier ioom̦.
15 Kwõn lukkuun kõl̦mãnl̦o̦kjen̦* kake men kein; lel̦o̦k aolepen am̦ ñani bwe am̦ wõnm̦aanl̦o̦k en lukkuun alikkar ñan armej otemjej.
16 Kwõn kanooj kõjparok eok make im am̦ katakin. Kwõn kate eok kõm̦m̦ani men kein kõnke ilo am̦ ãindein, kwõnaaj lo̦mo̦o̦ren eok im ro rej roñjake eok.
Footnotes
^ Kajin Grik, “jetõb kwõjarjar ej.”
^ Kajin Grik, “jetõb ko retao.”
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Ak “kãjjimourur.”
^ Ak “rõjañ.”
^ Ak “l̦õmn̦ak.”
