2 Korint 1:1-24
1 Jãn Paul, juon rijjilõk an Christ Jesus ikijjeen ankilaan Anij, im jãn Timote, eo jeid im jatid, ñan eklejia eo an Anij ilo Korint, ekoba aolep ro rekkwõjarjar ilo aolep jikin ko ilo Akeia:
2 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
3 Nõbar en ilo̦k ñan Anij, eo ej Jemãn ad Irooj Jesus Christ. Ej juon Jemãn eo el̦ap an tũriam̦o, im ej Anij in kaenõm̦m̦an otemjej.
4 Ej kaenõm̦m̦an* kõj ilo aolep apañ* ko jej iiooni bwe jen maroñ kaenõm̦m̦an ro jet ilo jabdewõt kain apañ* ko rej iiooni, ilo ad kõjerbal ejja kaenõm̦m̦an eo wõt jej bõk jãn Anij.
5 Ãinwõt an lõñ menin kaeñtaan ko jej iiooni kõnke jej ri-kal̦ooran Christ, ãindein an bar lõñ menin kaenõm̦m̦an kõj ikijjeen Christ.
6 Ñe kõmij iioon apañ,* unin ej bwe kom̦win bõk kaenõm̦m̦an im lo̦mo̦o̦r; im el̦aññe kõmij bõk kaenõm̦m̦an, unin ej ñan kaenõm̦m̦an kom̦, im men in ej jipañ kom̦ ñan kijenmej ilo ami eñtaan kõn ejja eñtaan ko wõt kõmij iiooni.
7 Kõjatdikdik eo ammim kõn kom̦ elukkuun pen, im kõm jel̦ã bwe ãinwõt ami iioon eñtaan ko kõmij bar iiooni, kom̦ naaj bar bõk kaenõm̦m̦an eo kõmij bõke.
8 Ro jeim im jatim, kõmij jab kõn̦aan bwe kom̦win jaje kõn ammim kar eñtaan ilo jikin ko ilo Eijia.* Joñan ammim kar eñtaan elukkuun l̦e jãn joñan am maroñ, im kõmar jaje el̦aññe kõm naaj kar mour.
9 Ilo m̦ool, kõmar l̦õmn̦ak bwe kõm naaj kar mej. Men in kõmar iioone ear katakin kõm bwe kõmin jab lõke kõm make, bõtab bwe kõmin lõke Anij, eo ej kõjerkakpeje ro remej.
10 Ke mour ko am rar pãd ilo kauwõtata, ear lo̦mo̦o̦ren kõm, im kõmij kõjatdikdik ilo E bwe enaaj wõnm̦aanl̦o̦k wõt im lo̦mo̦o̦ren kõm.
11 Kom̦ bareinwõt maroñ jipañ kõm ilo ami jar im akwel̦ap kõn kõm. El̦aññe elõñ rej jar kõn kõm, Anij enaaj eo̦roñ er im jipañ kõm, im kõn men in elõñ renaaj kwal̦o̦k aer kam̦m̦oolol.
12 Eñin ej men eo kõmij kõmjãje kake: Bõklõkõt eo ammim ej kam̦ool bwe ke kõmar pãd ibwiljin armej ro ilo lal̦ in, im el̦aptata ibwiljimi, kõmar mour ilo kwõjarjar im ilo m̦ool, eo ej itok jãn Anij. Kõmar jab mour ekkar ñan jel̦ãl̦o̦kjen̦ eo an lal̦ in, bõtab ekkar ñan jouj eo el̦ap an Anij.
13 Kõmij jab jeje waj ñan kom̦ kõn jabdewõt men, ijello̦kun wõt men ko kom̦ maroñ riiti* im mel̦el̦e kaki. Ij kõjatdikdik bwe kom̦ naaj wõnm̦aanl̦o̦k wõt im lukkuun mel̦el̦e kõn men kein,*
14 ãinwõt an jet iaami mel̦el̦e bwe kõmij ami kein kõmjãje; kõm bareinwõt naaj kõmjãje kõn kom̦ ilo raan eo an Jesus ad Irooj.
15 Kõn aõ lukkuun tõmak men in, iar pepe in iwõj m̦okta ñan ippemi bwe en ruo kõttan ami lañlõñ.*
16 Unin aõ ba men in ej kõnke iar pepe in lowaj kom̦ ilo ial̦ eo aõ lo̦k ñan Masedonia, im ãlikin aõ pãd ilo Masedonia, inaaj bar jepl̦aak waj ñan ippemi, innem kom̦ naaj itok ippatok jidik ilo ial̦ eo aõ lo̦k ñan Judia.
17 Ke kar pepe eo aõ in, ta iar kajejtokjãn ke? Ta ñe ij kõm̦m̦an pepe, ij ãinwõt armej ro jet ke ilo aõ ba “Aet, aet” innem tokãlik ij ba “Jaab, jaab”?
18 Ãinwõt ami maroñ lõke Anij, kom̦ maroñ bar lõke naan kein ammim. Kõm ban ba “Aet” innem tokãlik ba “Jaab.”
19 Jesus Christ, eo ej nejin Anij, eo ña im Timote im Silvenõs* kõmar kwal̦o̦k kake ñan kom̦, ear jab ba “Aet” innem oktak im ba “Jaab,” bõtab an “Aet” rej aolep iien “Aet.”
20 Jekdo̦o̦n ewi joñan lõñin kallim̦ur ko an Anij, aolepeer rej “aet” kõn wõt Jesus. Kõn men in, kõn wõt e, jemaroñ bareinwõt ba “Amen” ñan Anij, im ilo ad ãindein jej bõktok aiboojoj ñan Anij.
21 Bõtab Anij eo ej lukkuun kaalikkar bwe kwe im ña jej doon Christ, im E eo ear kapit* kõj.
22 Bareinwõt, ear kõkal̦l̦eik kõj im ear likũt jetõb kwõjarjar* ilo bũruod, eo ej ãinwõt kein kam̦ool* kõn men ko rej pojakin wal̦o̦k.
23 Unin aõ jañin iwõj ñan Korint ej kõnke ijjab kõn̦aan kõnanaikl̦o̦k wõt ami mour, im Anij ej aõ ri-kam̦ool ilo men in.
24 Ejjab bwe kõmin irooj ioon ami tõmak, kõnke unin ami jutak pen ej kõn wõt tõmak n̦e ami, ijoke jej ri-jerbal ippãn doon bwe kom̦win lañlõñ.
Footnotes
^ Ak “rõjañ.”
^ Ak “mãlejjoñ.”
^ Ak “mãlejjoñ.”
^ Ak “mãlejjoñ.”
^ Lale “Eijia” ilo Kõmel̦el̦e Ko.
^ Ak emaroñ, “kom̦ kanooj jel̦ã kadede.”
^ Kajin Grik, “wõnm̦aanl̦o̦k wõt im mel̦el̦e kõn men kein ñan jem̦l̦o̦kin.”
^ Ak emaroñ, “en ruo alen ami bõk tokjãn.”
^ Ãt eo juon etan Sailas.
^ Ak “kããlõt.”
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Ak “ãinwõt juon kallim̦ur.”
