2 Tessalonika 3:1-18
3 Ãliktata ro jeiũ im jatũ, kom̦win jar wõt kõn kõm bwe en m̦õkaj an ajeededl̦o̦k wõt naan eo an Jeova* im bwe armej ren kautieje, ãinwõt ami kautieje,
2 im bwe Anij en lo̦mo̦o̦ren kõm jãn armej ro renana im rej ko̦kkure kõm, kõnke ejjab aolep armej ewõr aer tõmak.
3 Bõtab Irooj etiljek, im enaaj kõkajoor im kõjparok kom̦ jãn eo enana.
4 Ejjab men in wõt, ak kõm eo kõmij ri-kal̦ooran Irooj, kõmij lõke bwe kom̦ij l̦oor naanin kakapilõk ko am im bwe eban bõjrak ami l̦oori.
5 Irooj en wõnm̦aanl̦o̦k wõt im tõl bũruomi ñan yokwe Anij, im ñan kijenmej wõt bwe kom̦win maroñ jerbal ñan Christ.
6 Kiiõ ro jeim im jatim, kõmij lewaj naanin jiroñ in ilo etan ad Irooj Jesus Christ, eñin bwe kom̦win bõjrak jãn ami kobal̦o̦k ippãn jabdewõt eo jeid im jatid ejjab jim̦we wãween an mour im ejjab l̦oor m̦anit* ko kom̦ar* bõk jãn kõm.
7 Kom̦ kanooj jel̦ã wãween ami maroñ l̦oore kõm kõnke ear jim̦we wãween ammim mour ke kõmar pãd ippemi,
8 im kõmar jab ebbõk m̦õñã jãn jabdewõt ilo ejjel̦o̦k on̦ããn. Bõtab kõmar jerbal im eñtaan raan im boñ bwe kõmin jab kõm̦m̦an an jabdewõt iaami eddodo im jol̦o̦k el̦ap jããn ñan jipañ kõm.
9 Ejjab bwe en ejjel̦o̦k ammim jim̦we im maroñ ilo men in, bõtab ej kõnke kõm kõn̦aan ajewaj kõm make ãinwõt juon joñak ñan kom̦ bwe kom̦win l̦oore.
10 Ilo m̦ool, ke kõmar pãd ippemi, kõm kõn jiroñ kom̦ im ba: “El̦aññe jabdewõt em̦akoko in jerbal, en jab m̦õñã.”
11 Unin ej kõnke kõmij roñ bwe ewõr jet iaami ejjab jim̦we wãween aer mour, rejjab jerbal ñan jidik, bõtab rej bõk kun̦aaer ilo men ko ejjel̦o̦k aer l̦o̦k ie.
12 Ñan armej rot in, kõmij jiroñ er im rõjañ er ilo Irooj Jesus Christ bwe ren mour ilo juon wãween ejjab kõm̦m̦an poktak im ren m̦õñã jãn leen jerbal ko aer make.
13 Ak ñan kom̦ ro jeiũ im jatũ, kom̦win jab m̦õk in kõm̦m̦an em̦m̦an.
14 Bõtab el̦aññe jabdewõt ejjab pokake naan ko am ilo lõta in, kom̦win kõkal̦l̦eik armej in im jab aetõle bwe en oktak im jook.
15 Ijoke, kom̦win jab watõke bwe ej ami ri-kõjdat, bõtab kom̦win wõnm̦aanl̦o̦k wõt im kakapilõke ãinwõt juon jeimi im jatimi.
16 Kiiõ, Irooj in aenõm̦m̦an en lewaj ñan kom̦ aenõm̦m̦an iien otemjej ilo jabdewõt wãween. Irooj en pãd ippemi aolep.
17 Ña Paul ij make jejewaj im jilkinwaj aõ naanin yokyokwe. Ãindein aõ jeje ilo aolep lõta ko aõ bwe kom̦win jel̦ã ke ña eo ij jejewaj.
18 Jouj eo el̦ap an ad Irooj Jesus Christ en pãd ippemi aolep.
