Rom 1:1-32
1 Paul, juon ri-karejeran Christ Jesus im juon eo em̦õj kũri bwe en rijjilõk, im em̦õj kõjenolo̦k e ñan ennaan eo em̦m̦an an Anij.
2 Anij ear kallim̦ur kake ennaan in em̦m̦an m̦oktal̦o̦k ilo Jeje ko rekkwõjarjar ikijjeen ri-kanaan ro an,
3 im ennaan in ej kõn eo Nejin, eo ear l̦otaktok ãinwõt juon armej jãn bwijjin* Devid.
4 Bõtab kar kaalikkar kõn kajoorin jetõb kwõjarjar* bwe e ej Nejin Anij, men in ear alikkar ikijjeen an kar jerkakpeje, im armej in ej Jesus Christ ad Irooj.
5 Kõn wõt e, jaar bõk jouj eo el̦ap im jerbalin rijjilõk bwe ri-aelõñ otemjej ren maroñ kwal̦o̦k aer tõmak im pokake e ñan kautiej ãt eo etan,
6 im kom̦ij uwaan ri-aelõñ ko kar kũr er bwe ren doon Jesus Christ.
7 Ij jejewaj ñan kom̦ aolep ro ilo Rom, kom̦ ro rejitõnbõro ippãn Anij me ear kũr er bwe ren ro doon rekkwõjarjar:
Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
8 M̦oktata, ij kam̦m̦oolol aõ Anij ikijjeen Jesus Christ kõn kom̦ aolep, kõnke ami tõmak ej menin kõnnaan ilo jikin otemjej ipel̦aakin lal̦ in.
9 Anij, eo ij jerbal ñane kõn aolepen bũruõ* ilo aõ kwal̦o̦k kõn ennaan eo em̦m̦an kõn eo Nejin, e eo ej aõ ri-kam̦ool bwe aolep iien ejjab bõjrak aõ likũt kom̦ ilo jar ko aõ
10 im akwel̦ap bwe en maroñ tõprak aõ iwõj ñan ippemi, el̦aññe ej ankilaan Anij.
11 Unin ej kõnke ilukkuun kõn̦aan lo kom̦, bwe in maroñ lewaj menin letok ko jãn Anij bwe kom̦win pen wõt ilo tõmak.
12 Mel̦el̦e eo aõ in ej bwe jen kõkajoor doon ikijjeen tõmak ko ad, tõmak ko ami im tõmak e aõ.
13 Ro jeiũ im jatũ, ikõn̦aan bwe kom̦win jel̦ã bwe elõñ alen aõ kajjioñ in jibadekwaj kom̦ bwe en wõr leen aõ jerbal ibwiljimi ãinwõt an kar bar wal̦o̦k ibwiljin ri-aelõñ ko jet, bõtab aolep iien ewõr men en̦ ej bõbraik eõ.
14 Ña im̦uri ñan ri-Grik im ñan ri-aelõñ ko,* ñan ro remãlõtlõt im ñan ro rejajel̦o̦kjen̦.
15 Kõn men in, ikijooror in kwal̦o̦k kõn ennaan eo em̦m̦an ñan kom̦ ilo Rom.
16 Ijjab jook kõn ennaan eo em̦m̦an, ilo m̦ool, ennaan eo em̦m̦an ej wãween eo Anij ej kõjerbale ñan kwal̦o̦k kajoor eo an ñan bõktok lo̦mo̦o̦r ñan aolep ro rej tõmak, m̦oktata ñan ri-Ju ro im bareinwõt ñan ri-Grik ro.
17 Ro rej tõmak rej kile bwe Anij ej kwal̦o̦k kõn an wãnõk ikijjeen ennaan eo em̦m̦an, im men in ej kõkajoorl̦o̦k tõmak eo aer, ãinwõt an jeje ko ba: “Eo ewãnõk enaaj mour kõn wõt an tõmak.”
18 Bwe illu eo an Anij enaaj wal̦o̦ktok jãn lañ n̦ae armej ro rejjab pokake im ro renana me rej kajjioñ bõbraik m̦ool eo ilo juon wãween enana,
19 kõnke men ko remaroñ jel̦ã kaki kõn Anij relukkuun alikkar ñan er, bwe em̦õj an Anij kwal̦o̦ki ñan er.
20 Kadkad ko kadkadin Anij im jejjab maroñ loi, ãinwõt kajoor eo an ñan indeeo im bwe e ej Anij, rar alikkar wõt jãn jinoin kõm̦anm̦an lal̦ ñan kiiõ, kõnke men kein rej alikkar ilo menin kõm̦anm̦an ko an. Kõn men in, ejjel̦o̦k an armej rein kein jekpen.
21 Meñe rejel̦ã kõn Anij ak rar jab kaiboojoje ãinwõt ke e Anij im rar jab kam̦m̦oolole, bõtab rar oktak im ãinwõt jet ro ejjel̦o̦k tokjãn l̦õmn̦ak ko aer, im jajel̦o̦kjen̦ ko an bũrueer rar oktak im marok.
22 Meñe rej ba bwe remãlõtlõt, ak rar oktak im ri-jajel̦o̦kjen̦
23 im rar ukote aiboojoj eo an Anij, eo ejjãmin jako, ñan annañin armej, ro me remaroñ jako, im ñan annañin bao ko im menninmour ko emãn neer im menninmour ko rej tõbalbal.
24 Kõn men in, Anij ear kõtl̦o̦k aer kõm̦m̦ani men ko rettoon kõnke en po ñan kõn̦aan ko an bũrueer, im bwe ren kõm̦m̦ani men ko rekajjookok ñan ãnbwinnier make.
25 Rar make kããlõt ñan tõmak men eo eriab ijello̦kun aer tõmak m̦ool eo kõn Anij, im rar kautiej* im jerbal ñan menin kõm̦anm̦an ko im jab ñan ri-Kõm̦anm̦an eo, eo ej tõllo̦kũn bõk nõbar ñan indeeo. Amen.
26 Eñin unin Anij ear lel̦o̦k er ñan m̦õm̦ ko rekajjookok, bwe kõrã ro ibwiljier rar ukot wãween aer kõjerbal ãnbwinnier ñan wãween ko rejekkar.
27 Bareinwõt, em̦m̦aan ro ren kar babu ippãn kõrã ro, ak rar ilo̦k jãn wãween in ejim̦we im kiiõ em̦m̦aan ñan em̦m̦aan eurur kõn̦aan ko aer ñan doon im rej kõm̦m̦ani men ko rekajjõjõ, im rej lo leen* kõm̦m̦an ko aer, eo ej tõllo̦kũn aer bõke kõn wõt nana ko aer.
28 Kõnke armej rein rar m̦akoko in kile Anij,* Anij ear lel̦o̦k er ñan wãween l̦õmn̦ak ko ejjab buñbũruon kaki, bwe ren kõm̦m̦ani men ko rejekkar.
29 Innem rar obrak kõn men ko rejjab jim̦we, jerawiwi, arõk,* nana, ebbanban, uror, poktak, etao, im lãj. Rein rej ri-ruruwe,*
30 ri-ñidãmij, ri-kõjdate Anij, rejãjjãj, eutiej bũrueer, ri-kõmjãje, ro rej pepe in kõm̦m̦an jorrããn* im ro rejjab pokake jineer im jemãer,
31 repenawiia, rejjab kam̦ool kallim̦ur ko aer, ejjel̦o̦k yokwe ippãer, im rejaje tũriam̦o.
32 Meñe armej rein relukkuun jel̦ã kõn kien eo ewãnõk an Anij—bwe ro rej kõm̦m̦ani men kein rej aikuj mej—bõtab rejjab baj wõnm̦aanl̦o̦k wõt im kõm̦m̦ani men kein, ak rej bar rejetake ro rej kõm̦m̦ani.
Footnotes
^ Kajin Grik, “ro ineen.”
^ Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “ro rejjab ri-Grik.”
^ Ak “kabuñ.”
^ Ak “bõk on̦ããn.”
^ Ak “rar jab kõn̦aan bõk jel̦ãl̦o̦kjen̦ eo ejim̦we kõn Anij.”
^ Ak “an̦okn̦ak.”
^ Ak “ri-wũnoojdikdik.”
^ Ak “ro rej kine men ko renana.”
