Bwe kõmin maroñ kwal̦o̦k kõn “ennaan eo em̦m̦an” ñan “aelõñ otemjej im bwij im kajin im joi otemjej,” kõmij kõm̦m̦ani bok ko im kein katak ko jet ilo elõñl̦o̦k jãn 750 kajin ko. (Revelesõn 14:6, UBS) Ewi wãween am maroñ kõm̦m̦ani men in? Eokwe, ewõr amim ri jeje jãn ipel̦aakin lal̦ in im bareinwõt ewõr juon ammim kumi in rukok ro me el̦ap aer kijejeto im tiljek. Aolep armej rein rej Ri Kõnnaan ro an Jeova.

Kar je katak ko ilo kajin Pãlle m̦okta. Kumi eo me ej lale aolep eklejia ko an Ri Kõnnaan ro an Jeova ej bõk eddon je katak kein. Opij eo an ri jeje ro amim ej pãd ilo opij ko am ilo New York. Opij in ej bõk eddon aolep ri jeje ro me rej pãd ilo New York im bareinwõt ilo ra ko jet ipel̦aakin lal̦ in. Kõnke ri jeje rein am rej itok jãn aelõñ ko reoktak jãn doon, men in ej kõm̦m̦an bwe bok kein am ren lukkuun jejjet im ekkar ñan armej ro wõj ipel̦aakin lal̦ in.

Rej jilkinl̦o̦k katak kein ñan ri ukok ro. Ãlikin an dedel̦o̦k katak kein im m̦õj kõweeppãni, eokwe rej kõjerbal computer im jilkinl̦o̦ki ñan ri ukok ro wõj ipel̦aakin lal̦ in. Ri ukok rein rej jerbal ippãn doon ilo kajin ko aer ñan ukote katak kein. Rej kate er joñan wõt aer maroñ ñan kõjerbale “naan ko rem̦ool” im jejjet ilo kajin eo aer ñan kalikkar ejja mel̦el̦e ko wõt ilo kajin Pãlle.​—Ekklisiastis 12:10.

Computer ko rej kam̦õkajl̦o̦k jerbal eo. Computer ko relukkuun aorõk, bõtab reban bõk jikin armej ro me rej jeje im ukok. Bõtab, el̦ap an computer jipañ bwe en m̦õkajl̦o̦k jerbal ko an ri jeje ro im ri ukok ro. Ewi wãween? Eokwe, ewõr tikjinere ko, bũrookraam̦ ko, im bareinwõt kein jerbal ko jet ilo computer ko. Bareinwõt, Ri Kõnnaan ro an Jeova rar kõm̦m̦ane juon bũrookraam̦ etan MEPS (Multilanguage Electronic Publishing System). Rej kõjerbale bũrookraam̦ in ñan je naan ko ilo elõñ buki kajin ko. Ãlikin, rej kobaiki naan kein ippãn pija ko. Ilo wãween in, epojak katak kein bwe ren print ak kõm̦m̦ani ilo bok.

Etke kõmij kõm̦m̦ane aolep men kein, meñe ñan kajin ko me jejjo wõt to̦ujin armej rej kõjerbale? Kõnke Jeova ekõn̦aan “lo̦mo̦o̦ren armej otemjej, im bwe ren item jel̦ã m̦ool” eo.​—1 Timote 2:3, 4.

• Ewi wãween kõmij je bok ko amim?

• Etke kõmij ukoti bok ko amim ilo elõñ kajin ko?